ރަޝިއާއިން ޔޫކުރެއިންއަށް ދޭންފެށި އުދުވާނީ ހަމަލާތަކާއި ގުޅިގެން، ޔޫކުރެއިންގެ ވެރިރަށް ކީވްގައި ހުންނަ އެމެރިކާގެ އެމްބަސީ ބަންދު ކޮށްފައި ހުންނަތާ 3 މަހަށްފަހު، އަލުން އެމެރިކާގެ އެމްބަސީ ހުޅުވާފައިވާކަން، ސެކެޓްރީ އޮފް ސްޓޭޓް އެންތަނީ ބްލިންކަން ހާމަ ކުރައްވައިފިއެވެ.
"މިއަދު އަހަރެމެން ވާނީ، ކީވްގައި ހުންނަ އެމްބަސީގެ މައްސައްކަތް އަލުން ރަސްމީކޮށް ފަށާފަ. އަހަރެމެންގެ އެހީތެރިކަމާއެކު، ޔޫކުރެއިންގެ ރައްޔިތުންވަނީ، ރަޝިއާގެ އުދުވާންގެ ކުރިމަތީ އެމީހުންގެ އަމިއްލަ ބިން ހިމާޔަތް ކޮށްފަ. އޭގެ ނަތީޖާއެއްގެ ގޮތުން ތަރިތަކާއި ރިބަންތައް (އެމެރިކާގެ ދިދަ) އަލުންވަނީ އެމްބަސީގެ ޖައްވުގައި ވިހުރެން ފަށާފަ،" ބްލިންކަން ނެރުއްވި ބަޔާނުގައި ވިދާޅުވެފައި ވެއެވެ.
އެހެންނަމަވެސް އޭނާ ވިދާޅުވި ގޮތުގައި، ޔޫކުރެއިންއަށް އެބުރިދާ ޑިޕްލޮމޭޓުންގެ ސަލާމަތަށްޓަކާ އެމެރިކާއިންވަނީ އިތުރު ފިޔަވަޅުތައް އަޅާފައެވެ.
The Stars and Stripes fly again over Embassy Kyiv. I can announce that we have officially resumed Embassy operations in Ukraine’s capital. We stand proudly with the government and people of Ukraine as they bravely defend their country from Putin’s brutal invasion. Slava Ukraini! pic.twitter.com/lGRdzqbVbG
— Secretary Antony Blinken (@SecBlinken) May 18, 2022
ހިނގަމުންދާ ހަގުރާމަ ނިމެން އަދި ކައިރިވެސް ނުވާކަމުގައި ވިދާޅުވަމުން ބްލިންކަންވަނީ، އެމެރިކާއިން ޔޫކުރެއިންއަށް ފޯރުކޮށްދެމުންދާ އެހީތެރިކަން މެދު ނުކެނޑި ފޯރުކޮށްދެއްވާނެކަމުގެ ޔަގީންކަންވެސް އަރުވާފައެވެ.
"ޔޫކުރެއިންގެ ސަރުކާރާއި އަދި ރައްޔިތުންވެސް، ރަޝިއާގެ އަނިޔާވެރި އުދުވާނުން އެގައުމު ދިފާޢު ކުރަމުންދާއިރު، ޔޫކުރެއިންއަށް އެހީތެރިވެ ދިނުމުގައި، ފަޚުރުވެރިކަމާއެކު އެމެރިކާ ދެމި އޮންނާނެ،" ބްލިންކަން ވިދާޅުވެފައި ވެއެވެ.
ޔޫއެސް އެމްބަސީގެ އޮފިޝަލަކު ރޮއިޓާރސްއަށް މައުލޫމާތު ދީފައިވާ ގޮތުގައި، އެމްބަސީގެ މައްސަކަތްތައް ފެށިގެން ދިޔަނަމަވެސް، ކޮންސިއުލާ މަސައްކަތް އަދި ފެށުމަށް ހަމަޖެހިފައެއް ނުވެއެވެ.
