ކުރިޔަށްދާ އެމްޑީޕީގެ ޗެއަރ ޕާރސަން އިންތިޚާބަކީ ގިނަބަޔަކަށް އެތައް ގޮތަކުން ހައިރާންކަން ލިބިގެންދިޔަ އިންތިޚާބަކަށް ވެގެން ގޮސްފައިވާއިރު، މިއިންތިޚާބުން ފެނިގެންދާ އެންމެ ޝައުގުވެރި ވަނިވި އެއްކަމަކީ، މި އިންތިޚާބަކީ އޭގެ ޒާތުގައި އެމްޑީޕީގެ އިސް ދެލީޑަރުން ދެމެދުގައި އޮތް ވާދަވެރިކަމަށްވެސް ވެގެން ދިއުމެވެ.

މިގޮތުން، މި ސަރުކާރުގެ އިކޮނޮމިކް މިނިސްޓަރ ފައްޔާޒު އިސްމާއިލް އެމްޑީޕީގެ ޗެއަރޕާރސަންކަމަށް ރައީސް ސާލިހުގެ ތާއީދާއެކީ ވާދަ ކުރައްވަމުން ގެންދަވާއިރު، ރައްޔިތުންގެ މަޖިލިހު މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ އިންތިޚާބުގައި ވާދަކުރައްމަވަމުން ގެންދަވަނީ އެމްޑީޕީގެ ރައީސް އަދި ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ ތާއީދާއެކީއެވެ.

އަދި ދެ ކެނޑިޑޭޓުންނަށް ތާއީދު ކުރައްވާ، ކެމްޕޭނުގައި އަމަލީގޮތުން އުޅުއްވަމުން ނުގެންދެވި ނަމަވެސް، ޗެއަރޕާރސަންކަމުގެ މަގާމް ކާމިޔާބު ކުރެއްވުމަށް ދެރައީސުން ގެންދަވަނީ ވަރަށްވެސް ބޮޑަށް ކެމްޕޭންގައި އެކި ގޮތްގޮތުން ޝާމިލްވެ ވަޑައިގެން މަސައްކަތް ކުރައްވަމުންކަން މިފިރުސަތުގައި ފާހަގަ ކޮށްލާން ޖެހެއެވެ، މިގޮތުން، ދާދިފަހުން އިންޑިއާއަށް ކުރެއްވި ދަތުރުފުޅުގައި، އެގައުމުގެ ނޫހަކަށް އިންޓަރވިއު ދެއްވަމުން ނަޝީދު ވިދާޅުވެފައިވަނީ، ތާއީދު ކުރައްވާނީ ފަސްބައި ސާފު ކެނޑިޑޭޓަކަށް ކަމުގައެވެ. އަދި އިމްތިޔާޒު ފަހުމީގެ ނަން ވިދާޅުނުވެ، އެހެންނަމަވެސް، އިމްތިޔާޒު ފަހުމީއަށް ތާއީދު ކުރައްވާކަން މި އިންޓަރވިއުގައި ނަޝީދު ވަނީ ވަރަށްވެސް ސާފުކޮށް ވިދާޅުވެ ދެއްވާފައެވެ.

އޭގެ އިތުރުންވެސް، ޕާޓީގެ ލީޑަރޝިޕްގައި ނަޝީދަށް ތާއީދު ކުރައްވައިގެން ތިއްބެވި ގިނަ ބޭފުޅުން ގެންދަވަނީ އިމްތިޔާޒު ފަހުމީއާއެކު ކެމްޕޭނުގައި ރަށްރަށަށް ވަޑައިގަންނަވަމުންވެސް މެއެވެ.

ހަމައެއާއެކު، ސަރުކާރުގެ ވަޒީރުންނާއި، ކުންފުނިތަކުގެ އެމްޑީންނާއި، އަދި ވަޒީފާތަކުގައި ތިއްބެވި ގިނަ ސިޔާސީ މުވައްޒަފުން ގެންދަވަނީ އިކޮނޮމިކް މިނިސްޓަރު ފައްޔާޒު އިސްމާއިލަށް ތާއީދު ހޯއްދެވުމަށް އަމަލީގޮތުން މަސައްކަތް ކުރައްވަމުންނެވެ. އަދި މުޅި ސަރުކާރު ފައްޔާޒު ހޮވުމަށް ކެމްޕޭނަށް ނިކުމެ އޮތުމުން، މިއިންތިޚާބުގައި ރައީސް ސާލިހު ހުންނެވިގޮތް އެއްވެސް އޮޅުމެއްނެތި އެގެން އޮތުމުގެ އިތުރުން، ޚުދު ރައީސް ސާލިހުވެސް ބައެއް ފަރާތްތަކަށް ގުޅުއްވާ، ފައްޔާޒް އިސްމާއިލަށް ތާއީދު ހޯދެއްވުމަށް މަސައްކަތް ކުރައްވަމުން ގެންދަވާކަން މިފުރުސަތުގައި ފާހަގަ ކޮށްލާން ޖެހެއެވެ.

ނަޝީދުގެ އަރިސް ބައެއް ބޭފުޅުންގެ ނިންމެވުމުން ހައިރާންކަން!

ހިގަމުންދާ، އެމްޑީޕީގެ ޗެއަރޕާސަން އިންތިޚާބުގެ ވާދަވެރިކަން ބޮޑުވެ، މީގެ ކުރިޔަށްވުރެވެސް ބޮޑަށް މިހާރު ޕާޓީވަނީ ބައިބައިވެ، ޕާޓީގެ އެތެރޭގައިވަނީ ފެކްޝަންވެސް އުފެދިގެން ގޮސްފައެވެ. ރައީސް ސާލިހާއި ރައީސް ނަޝީދަށް ތާއީދުކުރާ މަޖިލިސް މެމްބަރުންނާއި، އަދި އާންމު މެމްބަރުންވެސް ގެންދަނީ އެއްބަޔަކު އަނެއް ބަޔަކަށް، ހަމަޔާއި އުސޫލުން ބޭރުން، ވަގަށް ގޮވާ، ޒިނޭއާއި ރާބުއިމުގެ ތުހުމަތަށް ދާންދެން އެއްބަޔަކު އަނެއްބައެއްގެ ބޮލުގައި އަޅުވަމުންނެވެ.

އަދި މީގެ އިތުރަށް، ކުރިޔަށްދާ ޗެއަރޕާރސަން އިންތިޚާބުގެ ކެމްޕޭންގެ ތެރެއިން ގިނަ ބަޔަކަށް ހައިރާންކަން ގެނުވި އެއްކަމެއްގެ ގޮތުގައި ފާހަގަވާން އޮތް އެއްކަަކީ، މިހާތަނަށް ނަޝީދުގެ ސިޔާސީ ވިސްނުމަށް ނުވަތަ ސިޔާސީ ފިކުރަށް މެނުވީ ތާއީދު ނުކުރާނޭކަމަށް ގިނަބަޔަކު ދެކެމުން އައި، ޕާޓީގެ ބައެއް އިސްފަރާތްތަކުން، ކުރިޔަށްދާ ގަދަ ހިފުމުގައި، ނަޝީދުގެ ފިކުރާއި ދުރަށްޖެހި، ފައްޔާޒް އިސްމާއީލަށް ތާއީދުކުރާކަން އިއުލާން ކުރެއްވުމެވެ.

މިގޮތުން އެންމެ ފުރަތަމަ ފާހަގަވެގެން ދިޔައީ ތުޅާދޫ ދާއިރާގެ މަޖިލިސް މެމްބަރު ހިސާން ހުސެއިންގެ ނިންމެވުމެވެ. އޭނާއަކީ ނަޝީދުގެ ގާނޫނީ ވަކީލްގެ އިތުރުން، ފާއިތުވެދިޔަ އަހަރު، ނަފްރަތުގެ ބިލާގުޅިގެން ރައްޔިތުންގެ މަޖިލިހުގައި ހިނގި ހައިޖާނުގައިވެސް ނަޝީދުގެ ފެކްޝަނަށް ތާއީދުކޮށްގެ ހުރިކަމަށް ގިނަބަޔަކަށް ގަބޫލުކުރެވުނު މެމްބަރެކެވެ.

އެހެންނަމެސް، ކުރިޔަށްދާ ޗެއަރޕާރސަން އިންތިޚާބުގައި، ރައީސް ނަޝީދުގެ ފަޅި ދޫކޮށް އޭނާވަނީ ސަރުކާރު ފަޅިއަށް ތާއީދުކުރުމަށް ނިންމަވާފައެވެ.

މިއިންތިޚާބުގައި ފެނިގެންދިޔަ ދެވަނަ ބޮޑު ނިންމުމަކަށް ވެގެން ދިޔައީ، މިހާރުގެ ހެލްތު މިނިސްޓަރު އަހުމަދު ނަސީމް، (ކެރަފާ ނަސީމް) ފައްޔާޒަށް ތާއީދުކުރެއްވުމަށް ނިންމެވި ނިންމެވުމެވެ. ނަސީމްއަކީ ނަޝީދުގެ އާއީލީ ބޭފުޅަކަށް ވެގެން ދިއުމުގެ އިތުރުން، އާނާއަކީ ނަޝީދުގެ ވެރިކަމުގައި ވަޒީރުކަންވެސް ކުރެއްވި ބޭފުޅެކެވެ. އަދި އޭނާ މިހާތަނަށް ބެލެވިގެން ގޮސްފައިވަނީ، ވަރަށް ސާބިތުކަމާއެކު ނަޝީދާއެކީ ހުންނެވި ބޭފުޅެއްގެ ގޮތުގައިވެސްމެއެވެ. ނަތީޖާއަކަށް ވެގެންދިޔއީ އޭނާގެ ނިންމެވުން، މިއިންތިޚާބިގައި ގިނަބަޔަކަށް ލިބިގެންދިޔަ ބޮޑު ހައިރާންކަމަށް ވެގެން ދިއުމެވެ.

އެއަށްފަހު ދެން ފެނިގެން ދިތައީ، ކެމްޕޭންގެ ވަރަށް ފަހަކާ ޖެހެންދެން މަޑު ކުރެއްވުމަށްފަހު، ސަރުކާރުގެ ޓެކްނޮލިޖީ މިނިސްޓަރު އާމިނަތު ޝައުނާ ފައްޔާޒް އިސްމާއީލަށް ތާއީދު ކުރައްވާކަން ވީޑިއޯއެއް މެދުވެރިކޮށް ހާމަކުރެއްވި ތަނެވެ. ޝައުނާއަކީ، އެމްޑީޕީ އުފެދުނީއްސުރެ ނަޝީދާއެކީ ހުންނެވި، އަދި އެމްޑީޕީގެ ނާއިބު ރައީސާ އީވާ އަބުދުﷲއާވެސް ވަރަށް ގާތްކަން އޮންނަ ބޭފުޅޭއްގެ އިތުރުން އޭނާވަނީ ނަޝީދުގެ ވެރިކަމުގައިވެސް ރައީސް އޮފީހުގައި އިސްކޮށް މަސައްކަތް ކުރައްވާފައެވެ.

އެހެންނަމަވެސް، ޝައުނާ ފައްޔާޒަށް ތާއީދު ކުރައްވާކަން ހާމަ ކުރެއްވި ހިސާބުން، ނަޝީދުގެ ޖަޒްބާތު ބަންޑުންވިތަން ޓުވިޓަރއިން ވަނީ ފެނިގެން ގޮސްފައެވެ. އަދި ނަޝީދުވަނީ އަމިއްލަފުޅު ޓުވިޓަރ އެކައުންޓުން ޝައުނާއަށް ބަހުގެ ހަމަލާ ރައްދު ކުރައްވާ ޓުވީޓުވެސް ކުރައްވާފައެވެ.

Minister Shauna ge amilla vazeefa ge edhumah fahikoh MDP akee kobaakan bayaan kuravvan noolhuvva. MDP ge aanmu memberunah MDP akee kobakan varah saafuvaane

— Mohamed Nasheed (@MohamedNasheed) May 4, 2022

ނަޝީދު ވިދާޅުވި ގޮތުގައި ޝައުނާ ފައްޔާޒަށް ތާއީދު ކުރައްވަން ނިންމެވީ އަމިއްލަ އެދުން އިސް ކުރައްވައިގެން، ވަޒީފާގެ ދިފާއުގައެވެ. ނަޝީދު ވިދާޅުވީ ޝައުނާއަށް އޭނާގެ އަމިއްލަ ވަޒީފާގެ ހިމާޔަތުގައި އަމިއްލަ މަސްލަހަތު އިސްކުރި ކަމުގައި ވީނަމަވެސް އެމްޑީޕީއަށް ރަނގަޅުގޮތް އެގޭނީ އެމްޑީޕީ މެމްބަރުންނަށް ކަމަށެވެ.

މިނިސްޓަރ ޝައުނާގެ އަމިއްލަ ވަޒީފާގެ އެދުމަށް ފަހިކޮށް އެމްޑީޕީއަކީ ކޮބައިކަން ބަޔާން ކުރަން ނޫޅުއްވާ. އެމްޑީޕީގެ އާންމު މެމްބަރުންނަށް އެމްޑީޕީ ކޮބައިކަން ވަރަށް ސާފުވާނެ.

– ނަޝީދު ވިދާޅުވިއެވެ.

ސިޔާސީ ހަގީގަތާއި ދުރަށް ވަޑައިގެންނެވުނީތަ؟

ރައީސް ޔާމިންގެ ވެރިކަމުގައިވެސް، ރައީސް ޔާމީނާއި، ރައީސް މައުމޫނާ ދެބޭފުޅުންގެ މެދުގައި އުފެދު ސިޔާސީ އަރާރުމުގައި، ވަކި އަތެއް އިޚްތިޔާރު ކުރެއްވުމަށް، ދެބޭފުޅުންގެ ވަރަށް އަރިސް ވަރަށް ގިނަ ބަޔަކަށް ޖެހިގެން ދިޔައެވެ. އޭގެ ތެރޭގައި އޭރުގެ ސަރުކާރުގެ މަޖިލިސް މެމްބަރުންގެ ގޮތުގައާއި، އަދި ސަރުކާރުގެ އިސް މަގާމްތަކުގައި ތިއްބެވި، ޒަމާނުއްސުރެ ރައީސް މައުމޫންއާއި އާއިލީގޮތުންވެސް ގުޅުން ބާއްވަމުން ގެންދެވި ގިނަ ބޭފުޅުން ހިމެނި ވަޑައިގަތެވެ. މީގެތެރޭ ޚުދު ރައީސް މައުމޫންގެ އަމިއްލަފުޅު ދަރިންވެސް ހިމެނިގެން ދިޔައެވެ.

އެހެންނަމަވެސް، އޭރު އުފެދިގެންދިޔަ ސިޔާސީ އަރާރުމުގައި، ހަމަ މިއަދު މިފެނިންގެދާ މަންޒަރު ހަމަ މި ބީދައިން ވަނީ ފެނިގެން ގޮސްފައެވެ. ސަރުކާރުގެ ކެބިނެޓްގައާއި، އަދި އިސް މަގާމްތަކުގައި ތިއްބެވި ގިނަ ބޭފުޅުން، ރައީސް މައުމޫނާ ދުރަށް ޖެހިވަޑައިގަތެވެ. ޚުދު ރައީސް މައުމޫންގެ އަމިއްލަފުޅު ބައެއް ދަރިންވެސް އެމަނިކްފާނާ ދުރަށް ޖެހިވަަޑައިގެން، ނަންގަވާފައިވަނީ ސަރުކާރު ފަޅިއެވެ.

އެހެންކަމުން، ކެބިނެޓާއި ސަރުކާރުގެ އިސްމަގާމްތަކުގައި ތިއްބެވި އިސް ގިނަ ބޭފުޅުން، ހިނގަމުންދާ ޗެއަރޕާސަން އިންތިޚާބުގައި ސަރުކާރު ފަޅި ދޫކޮށް، ނަޝީދުގެ ވިސްނުމަށް ތާއީދު ކުރައްވާނޭކަމުގައި ނަޝީދަށް މިހާތަނަށް ހީފުޅު ކުރެއްވިފައި އޮތްނަމަ އެއީ، ޖަޒުބާތުގައި ނަމަވެސް، ރާއްޖޭގެ ސިޔާސީ ހަގީގަތާއި ދުރަށް ވަރަށްވެސް ބޮޑުތަނުން ވަޑައިގެންނެވުނީ ކަމުގައި މެނުވީ ބެލެވޭކަށް ނެތެވެ. ދިވެހިރާއްޖޭގެ ސިޔާސީ ހަގީގަތަކީ، ފެން އޮތް ދިމާލަކަށް މަސްދުވުމެވެ. މޮޅުވާ އަތަކަށް ގިނަބަޔަކު އެރުމެވެ. އޭރަކު އޮންނަ ސަރުކާރަކާއެކު ގިނަ ބަޔަކު ތިބުމެވެ.

މިހަގީގަތް މި ނޫން ބީދައަކުން ނަޝީދަށް ގަބޫލު ކުރެއްވޭނަމަ، އެއީ އަދި މާބޮތަނުން ހައިރާންވާންޖެހޭ މައްސަލައެއް ކަމުގައި ދަންނަވާން ޖެހެއެވެ.