ރަޝިއާއި ދެކޮޅަށް މިހާތަނަށް އިގްތިސާދީގޮތުން އަޅާ އެންމެ ވަރުގަދަ ދަތިކުރުމުގެ ފިޔަވަޅުތައް ޔޫޕިއަން އިއްތިހާދު، އީޔޫއިން އިއުލާން ކޮށްފިއެވެ. މީގެ ތެރޭގައި ހިމެނެނީ، ޔޫރަޕް ބައްރުން، ރަޝިއާއިން ހަކަތަ ގަތުން އެކީ ހުއްޓުމަކަށް ގެނައުމެވެ.
މި ފިޔަވަޅުތައް އިއުލާން ކުރައްވަމުން، ޔޫރަޕިއަން ކޮމިޝަންގެ ރައީސާ އުރުސުލާ ޑަރ ލެޔެން ވިދާޅުވި ގޮތުގައި، ރަޝިއާއި ދެކޮޅަށް އަޅާ، އިގްތިސާދީ ގޮތުން ދަތިކުރުމުގެ އާފިޔަވަޅުތައް ބައްޓަން ކޮށްފައިވަނީ، ރަޝިއާގެ އިގްތިސާދަށް ވީހާ ބޮޑަކަށް ގެއްލުންދީ، އަދި މިފިޔަވަޅުތަކުގެ އަސަރު ޔޫރަޕް ބައްރަށް ކުރާމިންވަރު ވީހާވެސް ކުޑަކުރުމަށް އަމާޒު ކޮށްގެން ކަމުގައެވެ.
އަދި އޭނާ ވިދާޅުވި ގޮތުގައި، ކުރިޔަށް އޮތް 6 މަސްދުވަހުގެ ތެރޭގައި، ރަޝިއާގެ ކުރޫޑް އޮއިލް ޔޫރަޕް ބައްރަށް އެތެރެކުރުން އެކީ ހުއްޓުމަކަށް ގެނެވޭނެ ކަމުގައެވެ.
މީގެ އިތުރުން، ޔޫރަޕުގެ އިއްތިހާދުން އަލަށް އިއުލާންކުރި ދަތިކުރުމުގެ ފިޔަވަޅުތަކުގެ ތެރޭގައި، ޔޫކުރެއިންގެ ބުޗާއާއި މަރިއޮޕޯލްގައި ރަޝިއާއިން ހިންގާފައިވާ އިންސާނިއްޔަތާއި ޚިލާފް ޖަރީމާތަކުގައި ބައިވެރިވެފައިވާ ރަޝިއާގެ އަސްކަރީ އޮފިޝަލުންނާއި ދެކޮޅަށް އަޅާފައިވާ ފިޔަވަޅުތައްވެސް ހިމެނެއެވެ.
"މި ފިވަޅުތަކުން، ކެރެމްލިންގެ ހަގުރާމައިގައި ޖަރީމާތައް ހިންގާފައިވާ ހުރިހާ ފަރާތްތަކަށްވެސް ޚާއްސަ މެސެޖެއް ރައްދު ކޮށްދޭނެ: މިޖަރީމާތައް ހިންގީ ކޮންބައެއްކަން އަހަރެމެންނަށް އިގޭކަން، އަދި މި ހުރިހާ އެންމެންވެސް ޒިންމާދާރު ކުރުވޭނެކަން،" ޔޫރަޕިއަން ޕާރލަމެންޓުގައި ވާހަކަ ދައްކަވަމުން އުރުސުލާ ޑަރ ލެޔެން ވިދާޅުވެފައި ވެއެވެ.
އީޔޫންވަނީ، ރަޝިއާގެ ތެޔޮ އެތެރެ ނުކޮށް ވާންހުރި ގޮތްތައް ހޯދުމުގައި އެތައް ހަފްތާއެއް ހޭދަ ކޮށްފައެވެ. އަދި އީޔޫއިންވަނީ، މިއަހަރު ނިމުމުގެ ކުރިން، ރަޝިއާއިން އެތެރެކުރާ ތެލުގެ މިންވަރު ތިންބައި ކޮށްފަ ދެބަޔަށް މަދުކުރާނެކަން މީގެކުރިން ހާމަ ކޮށްފައެވެ. އަދި މިހާރު އިއުލާން ކޮށްފައިވާ ގޮތުގައި، ރަޝިއާއިން އެތެރެކުރާ ކުރޫޑް އޮއިލް (ސާފު ނުކުރާ ތެޔޮ) ރަޝިއާއިން ގަތުން ކުރިޔަށް އޮތް 6 މަސްދުވަހުގެ ތެރޭ އެކީ ހުއްޓުމަކަށް ގެނެވޭނެއެވެ. އަދި ސާފުކުރި ތެޔޮގަތުން 2022ގެ ނިޔަލަށް އެކީ ހުއްޓުމަކަށް ގެނެވޭނެއެވެ.
"ރަޝިއާއިން ތެޔޮގަތުން އެކީ ހުއްޓުމަކަށް ގެނެވޭނެކަން އަހަރެމެން ޔަގީން ކުރާނަން،" ޔޫރަޕިއަން ކޮމިޝަންގެ ރައީސާ ވިދާޅުވެފައި ވެއެވެ.
އީޔުއިން އަލަށް އިއުލާންކުރި، ދަތުކުރުމުގެ ފިޔަވަޅުތަކުގެ މި ޕެކޭޖަށް އީޔޫގެ އެމްބެސެޑަރުންގެ ތާއީދު ލިބުމަށްފަހު، ކުރިޔަށް އޮތް މަދު ދުވަސްކޮޅުގެ ތެރޭގައި ސޮއިކުރުމަށް ވަނީ ހަމެޖެހިފައެވެ.
ރަޝިއާއިން ތެޔޮގަތުން ހުއްޓުމަކަށް ގެނައުމަށް އީޔުއިން އެބަސްވެފައިވާ ޕެކޭޖުގައި ވާގޮތުން، އިއްތިހާދުގެ ދެގައުމު ކަމުގައިވާ، ހަންގޭރީއާއި ސްލޮވާކިއާއަށް ރަޝިއާއިން ތެޔޮ ގަތުން ހުއްޓާލާ، އެހެން ސަޕްލަޔަރުން ހޯދުމަށް އެއް އަހަރުގެ މުއްދަތެއް ދިނުމަށް ވަނީ ހަމަޖެހިފައެވެ. މި ދެގައުމަކީ ރަޝިއާގެ ތެލަށް ވަރަށް ބޮޑަށް ބަރޯސާވާ ދެގައުމެވެ. އެހެންނަމަވެސް، ހަންގޭރީގެ ސަރުކާރުގެ ތަރުޖަމާން ވިދާޅުވެފައިވަނީ، ތެޔޮ ގަތުން ހުއްޓާލުމުގެ އިންތިގާލީ މަރުހަލާގެ ޕްލޭންތައް ނުވަތަ އެމުއްދަތުގައި އެގައުމަށް ލިބިގެންދާ ސެކިއުރިޓީގެ ރައްކާތެރިކަމުގެ ތަފްސީލުތައް އަދި ފެނިފައި ނުވާ ކަމުގައެވެ. އަދި ސްލޮވާކިއާއިން ބުނެފައިވަނީ، ރަޝިއާގެ ތެޔޮގަތުން ހުއްޓާލުމަށް އެގައުމަށް 3 އަހަރުގެ މުއްދަތެއް ބޭނުންވާ ކަމުގައެވެ.
ޔޫރަޕިއަން އިއްތިހާދުން އެއްވެސް ކަމެއް ފާސްކުރެވެނީ، އެ އިއްތިހާދުގެ 27 ގައުމުގެ އެކަމަކަށް އާބަސް ބުނުމުންނެވެ.
