ތައުލީމީ ދާއިރާގެ ހުރިހާ މުވައްޒަފުންގެ މުސާރަ މާދަމާއިން ފެށިގެން ބޮޑުކުރައްވާއިރު، ރާއްޖޭގެ ޤައުމީ ޔުނިވާސިޓީގެ ލެކްޗަރާއިންނަށްވެސް މުސާރަ ބޮޑުކޮށްދެއްވުމަށް ދީނީ އިލްމުވެރިޔާ ޝައިޚު އަލީ ޒައިދު ގޮވާލައްވައިފިއެވެ.

ތަޢުލީމީ ދާއިރާގެ ހުރިހާ މުވައްޒަފުންގެ މުސާރަ މާދަމާއިން ފެށިގެން ބޮޑުކުރައްވައި މުސާރައިގެ އޮނިގަނޑު މާދަމާ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިއުލާންކުރައްވަން ވަނީ ނިންމަވާފައެވެ. ރައީސުލްޖުމްހޫރިއްޔާގެ އޮފީހުން ވިދާޅުވީ ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް، ތަޢުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކޮށް، އެކަމާގުޅޭ މަޢުލޫމާތުތައް ޤައުމާ މުޚާޠަބުކުރައްވައި ރައީސް ހާމަކުރައްވާނެކަމަށެވެ.

މާދަމާ ޓީޗަރުންގެ މުސާރަ ބޮޑު ކުރުމަށް ނިންމަވާފައިވާއިރު، ހަޔަރ އެޑިއުކޭޝަންގެ ދާއިރާގައި ރާއްޖޭގެ ޤައުމީ ޔުނިވާސިޓީގެ ލެކްޗަރާއިންނަށް މުސާރަ ބޮޑު ކުރުމަށް ނިންމާފައި ނުވެއެވެ. މިކަމުގެ ކަންބޮޑުވުން ފާޅު ކުރައްވަމުން ޝައިޚު ޒައިދު ވިދާޅުވީ މިހާރުވެސް ކުރަމުންދާ މަސައްކަތާއި ބަލާފަ، ލެކްޗަރާއިންގެ އަތަށް ލިބެނީ ކުޑަ އުޖޫރައެއް ކަމަށެވެ. ހަމަހަމަ ކަމާއިއެކު ތައުލީމީ ދާއިރާގައި މަސައްކަތްކުރާ އެންމެނަނަށް އެއް ހަމައަކުން މުސާރައިގެ ކުރިއެރުން ލިބެންޖެހޭކަމަށް ޒައިދު ވިދާޅުވިއެވެ.

ޓީޗަރުންނަށް މުސާރަ ބޮޑުވާއިރު، ރާއްޖޭގެ ޤައުމީ ޔުނިވާސިޓީގެ ލެކްޗަރާއިންނަށް އެއްވެސް ވަރަކަށް މުސާރަ ބޮޑު ނުވާތީ ހިތާމަކުރަން! މިހާރު މާސްޓާސް ސެޓެފިކެޓް އޮތް ލެކްޗަރާ އަކަށްވެސް އަތަށް ލިބެނީ 17،000 ރުފިޔާ! މިއީ މަސްއޫލިއްޔަތާއި އަޅާބަލާއި، ވަރަށް ކުޑަ މިންވަރެއް! ބޮޑުކޮށް ދެއްވާ.

– ލެކްޗަރާއިންގެ މުސާރަ ބޮޑުކޮށް ދެއްވުމަށް އެދި ޒައިދު ކުރެއްވި ޓުވީޓުގައި ވިދާޅުވިއެވެ.

ރާއްޖޭގެ ތަޢުލީމީ ދާއިރާގައި މި ވަގުތު 9،119 މުދައްރިސުން އަންނަނީ މަސައްކަތްކުރަމުންނެގެ. އޭގެ ތެރޭގައި 6،498 ދާއިމީ ދިވެހި މުދައްރިސުންނާއި، 1،730 ބިދޭސީ މުވައްޒަފުންނާއި ވަގުތީ 891 މުދައްރިސުން ހިމެނެއެވެ.

ރައީސް ވިދާޅުވެފައިވާގޮތުގައި ތަޢުލީމީ ދާއިރާގެ މުސާރަ ބޮޑުކުރުމާއެކު ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ އިތުރުގަޑި ނުލާ 12628 ރުފިޔާއިން 19740 ރުފިޔާއަށް ބޮޑުވެގެން ދާނެއެވެ. މިއީ 56 ޕަސެންޓްގެ ކުރިއެރުމެކެވެ. އަދި އިތުރުގަޑި ހިމަނައިފިނަމަ އެއަށްވުރެ ބޮޑުވެގެންދާނެއެވެ. މިގޮތުން މި ބަދަލާއެކު 21،000 ރުފިޔާ ލިބޭ ޕްރިންސިޕަލެއްގެ މުސާރަ 32،000އަށް ބޮޑުވެގެންދާނެއެވެ. އަދި 14،000 ލިބޭ މުވައްޒަފެއްގެ މުސާރަ 28،000އަށް އިތުރުވާނެއެވެ.