ރަޝިއާއިން ހިފާފައިވާ، ޔޫކުރެއިންގެ ސިޓީއެއް ކަމުގައިވާ ޚާރސޮން ސިޓީގައި، މޭމަހުގެ 1 ވަނަ ދުވަހުން ފެށިގެން، ރަޝިއާގެ ރަސްމީ ފައިސާ ރުބެލް ބޭނުން ކުރަނ ފަށާގޮތަށް ހަމަޖައްސާފައިވާކަމަށް، އެސިޓީ ހިންގުމުގެ ކަންކަން ހަވާލުކޮށްފައިވާ، ރަޝިއާއަށް ތާޢީދުކުރާ ކޮމިޓީ، "މިލިޓަރީ-ސިވިލް އެޑްމިނިސްޓްރޭޝަން"އާއި ހަވާލާދީ، ރަޝިއާގެ ގައުމީ ނޫސް އޭޖެންސީ RIA އިން ރިޕޯޓު ކޮށްފިއެވެ.
ކޮމިޓިގެ އޮފިޝަލް، ކިރިލް ސްޓެރެމޯސޯވްއާއި ހަވާލާދީ RIAއިން ރިޕޯޓު ކޮށްފައިވާ ގޮތުގައި، މި ސިޓީގައި ރަޝިއާގެ ފައިސާ ރުބެލް އެކީ ބޭނުން ކުރަން 4 މަސްދުވަސް ހޭދަވާނެ ކަމަށެވެ. އަދި މި މުއްދަތުގައި ރަޝިއާގެ ފައިސާ ބޭނުން ކުރެވެމުން ދާނީ، ޔޫކުއިންގެ ފައިސާ ރިނިއާއާއެކީ ކަމަށްވެސް އޮފިޝަލާއި ހަވާލާދީ RIAއިން ރިޕޯޓު ކޮށްފައި ވެއެވެ.
މި ހަފްތާގެ އަންގާރަ ދުވަހު ރަޝިއާއިން ބުނެފައިވަނީ، ޚާރސޮން ސިޓީގެ ހުރިހާ ކޮންޓްރޯލެއް މިހާރުވަނީ ރަޝިއާގެ އަސްކަރިއްޔާގެ ދަށަށް ގޮސްފައެވެ. މިސިޓީއަކީ މުހިންމު ސިޓީއަކަށް ރަޝިއާއަށް ވެފައިވަނީ، މި ސިޓީއަކީ، 2014ވަނަ އަހަރު ރަޝިއާއިން ހިފާފައިވާ ޔޫކުރެއިންގެ ކްރައިމިއާ ސަރަހައްދާއި، ޔޫކުރެއިންގައި ވަކިވެގަތުމަށް ހަނގުރާމަ ކުރާ، ޔޫކުރެއިންގެ އިރިމަތީގެ ސަރަހައްދުތަކާއި އެއްގަމުން ގުޅުވައިދޭ ސިޓީއަކަށް ވާތީއެވެ.
ޔޫކުރެއިންގެ އޮފިޝަލުން ވިދާޅުވެފައިވާ ގޮތުގައި، ރަޝިއާއިން މިހާރުވަނީ މިސިޓީއަށް މޭޔަރަކު އައްޔަން ކޮށްފައެވެ. އަދި ރަޝިއާއިން މިސިޓީގެ ރީޖަނަލް ހެޑްކުއާޓާރސްއަށް ވެރިވެގެންފައިވާ ކަމަށްވެސް އޮފިޝަލުން ވިދާޅުވެފައި ވެއެވެ. ޚާރސޮން ސިޓީއަކީ، ރަޝިއާއިން ފާއިތުވި ފެބްރުއަރީމަހުގެ 24ވަނަ ދުވަހު ޔޫކުރެއިންއަށް އުދުވާނީ ހަމަލާ ދޭންފެށިފަހުން، އެގައުމުގެ ބާރުގެދަށަށް އައިސްފައި، ބޮޑު އާބާދީއެއް އޮންނަ ޔޫކުރެއިންގެ ހަމައެކަނި ސިޓީއެވެ.
