ކަރީނާ ކަޕޫރާއި ސާރާ އަލީ ޚާނަކީ ވަރަށް ހުނަރުވެރި، ބޮލީވުޑްގެ ކާމިޔާބު ދެ ބަތަލާއިންނެވެ. ކަރީނާ އަކީ މިހާރު ވެސް ބޮލީވުޑްގައި އެންމެ ގަދަޔަށް ފިޔަޖަހަމުން އަންނަ އެއްތަރިއެވެ. އަދި ހަމަ އެހެންމެ ސާރާގެ ފިލްމީ ހަޔާތުގެ ކުރީކޮޅާ ބަލާފައި އޭނާއަށް ލިބޭ ތަރުހީބުވެސް ކުޑައެއް ނޫނެވެ.
ސާރާ އާއި ކަރީނާގެ މެދުގައި އޮންނަ އާއިލީ ގުޅުމަކީ އެކަކަށްވެސް އޮޅިފައި އޮންނާނެ ގުޅުމެއް ނޫނެވެ. ކަރީނާއަކީ ސާރާގެ ބައްޕަ ސައިފް އަލީ ޚާންގެ މިހާރުގެ އަނބިމީހާ ކަމަށްވުމުން، އާއިލީ ގޮތުން ކަރީނާއަކީ ސާރާގެ ދޮންމަންމައެވެ. އެކަމަކު، ދޮންމަންމައަކާއި ދޮންދަރިއެއްގެ މެދުގައި އޮންނަ ގުޅުމަށްވުރެ، އެދެމީހުންގެ މެދުގައި އޮންނަނީ ގާތް އެކުވެރި ގުޅުމެކެވެ.
އެކަން ވަނީ އެތައް އިންޓަވިއުތަކަކުން ވެސް ފެނިގެންގޮސްފައެވެ. އޭގެތެރެއިން "ކޮފީ ވިތު ކަރަން" ޝޯގައި ސާރާ ބައިވެރިވުމުން އޭނާއާ ކުރެވުނު ސުވާލަކީ، ކަރީނާއާ ދިމާއަށް މުޚާތަބު ކުރަނީ ކޮންނަމަކުންތޯ އެވެ. މި ޝޯގައި ސާރާ އާއެކު ބައިވެރިވީ އޭނާގެ ބައްޕަ ސައިފް އަލީ ޚާނެވެ.
މި ސުވާލަށް ޖަވާބުދެމުން ޒުވާން ބަތަލާ ބުނީ، އެހެން ކުދިން އެކުދިންގެ ދޮންމަންމައަށް "ޗޯޓީ މާ" (ކުޑަ މަންމަ) ފަދަ މައިވަންތައް ނަންތަކުން މުޚާތަބުކޮށް ހެދިޔަސް، އޭނާ މުޚާތަބު ކުރަނީ ކަރީނާގެ އަސްލު ނަމުން ކަމަށެވެ. ސަބަބަކީ އޭނާ ކަރީނާ ދެކެނީ ގާތް އެކުވެރިއެއްގެ ނަޒަރުން ކަމަށްވާތީ ކަމަށާއި އަދި ކަރީނާ އާއި އޭނާއާ ދެމެދު އޮންނަނީ ވަރަށް ގާތް، ރައްޓެހި ރަހުމަތެރި ގުޅުމެއް ކަމަށްވެސް ބުންޏެވެ.
މީގެ އިތުރުން ސާރާގެ ބައްޕަ ސައިފް، މަންމަ އަމްރީތާ ސިންގްއާ ވަރިވެ، ކަރީނާއާ ކައިވެނިކުރިޔަސް ސާރާގެ ހިތުގައި އެއްވެސް ދެކޮޅުވެރިކަމެއް ނެތް ކަމަށާއި، އޭގެ ބަދަލުގައި އޭނާ ދެކެނީ، ދެ އާއިލާ ލިބިފައިވުމުން ވަަރަށް ނަސީބުވެރި މީހެއްގެ ގޮތުގައި ކަމަށްވެސް ބުންޏެވެ.
ކަރީނާއާއި ސާރާގެ އުމުރުގައި ވަނީ 15 އަހަރުގެ ފަރަގެވެ. އަދި ކަރީނާ ބޮލީވުޑްގައި މަސައްކަތްކުރާތާ އަހަރުތަކެއް ވެފައިވާއިރު، ސާރާ ފިލްމީ ދާއިރާއަށް ނުކުތީ 2018 ގައެވެ.
