ﷲގެ ކަލާމްފުޅު، ކީރިތި ގުރުއާންގެ ހުރުމަތް ކެނޑުމަށް، ސުވިޑްންގެ ހައްދުފަހަނައެޅި ފަރާތްތަކުން ގަސްތުގައި ހިންގަމުންދާ އަމަލުތައް ސައުދީއަރަބިއާއިން ކުށްވެރިކޮށްފިއެވެ. ސައުދީ އަރަބިއާއިން މިކަން ކުށްވެރި ކޮށްފައިވަނީ، ހޯމަދުވަހު އެގައުމުގެ ފޮރިންގ މިނިސްޓްރީން ނެރެފައިވާ ބަޔާނެއްގައެވެ.
"ކީރިތި ޤުރުއާންގެ ހުރުމަތް ކެނޑުމަށް ގަސްތުގައި ހިންގަމުންދާ އަމަލްތަކާއި، މުސްލިމުންގެ މެދުގައި ރުޅިވެރިކަން އުފެއްދުމަށް ސުވިޑްންގެ ހައްދުފަހަނައެޅި ފަރާތްތަކުން ރާވައިގެން ހިންގަމުންދާ އަމަލްތައް ޚާރިޖީ ވުޒާރާއިން ހަރުކަށި އިބާރާތުން ކުށްވެރި ކުރަން،" ފޮރިންގ މިނިސްޓްރީން ނެރެފައިވާ ބަޔާނެއްގައި ބުނެފައި ވެއެވެ.
"މަޝްވަރާ ކުރުމާއި، އެކީގައި ދިރިއުޅުމާއި، ދެކޮޅުވެރިކަމާއި ނަފްރަތު ނައްތާލުމާއި، ހައްދުފަހަނައަޅާ ދިއުމާއި ތެދުވުމާއި، ދީނީގޮތުން ހުރުމަތްތެރިވެގެންވާ ތަނަށް ޖެއްސުން ކުރުން ހުއްޓާލުމުގެ މުހިންމުކަން ފާހަގަކުރަން،" ސައުދީ އަރަބިއާގެ ބަޔާނުގައި ބުނެފައި ވެއެވެ.
ސުވިޑްންގެ ކަނާތު ފިޔައިގެ، އިމިގްރޭޝަނާއި ދެކޮޅު، ހައްދުފަހަނައަޅާފައިވާ ގުރޫޕަކުން، މާތްވެގެންވާ ކީރިތި ޤުރުއާން އަންދާލާނެކަމަށް ބުނެ، އެކަން އިއުލާން ކުރުމާއި ގުޅިގެން އެގައުމުގެ އެކި ސިޓީތަކުގައި ބޮޑެތި ހަމަނުޖެހުންތަކެއް ދަނީ ހިގަމުންނެވެ.
އަދި މިގޮތުން ހިގަމުންދާ ހަމަނުޖެހުންތައް މެދުނުކެނޑި ކުރިޔަށް ދާތާ މިއަދަށް 4 ދުވަސް ފާއިތުވެގެން ގޮސްފައިވާއިރު، ސުވިޑްންގެ ލޯކަލް މީޑިއާތަކުން ރިޕޯޓު ކޮށްފައިވާ ގޮތުގައި، އެގައުމުގެ އިރުމަތީ ސިޓީއެއް ކަމުގައިވާ ނޯކޮޕިންގ ސިޓީގައި އާދީއްތަ ދުވަހު ހިގި ހަމަނުޖެހުންތަކުގައި 3 މީހަކަށް އަނިޔާވެފައި ވެއެވެ. މި ހަމަނުޖެހުން ކޮންޓްރޯލް ކުރުމަށް ފުލުހުން ވަޔަށް ބަޑިޖަހާފައި ވެއެވެ.
އަދި މީގެ އިތުރުން ސުވިޑްންގެ އެކި ހިސާބުތަކުގައި އެއްގަމު އުޅަނދުތަކުގައި ރޯކޮށްލުމުގެ ސަބަބުން 17 މީހަކުވަނީ ހައްޔަރުވެސް ކޮށްފައެވެ.
އަދި މި ހަފްތާގެ ހޮނިހިރު ދުވަހު، ސުވިޑްންގެ ދެކުނުގެ ސިޓީއެއްކަމުގައިވާ މަލްމޯގައި ކަނާތުފިޔައިގެ އެކްޓިވިސްޓުން ބޭއްވި އެއްވުމެއްގައި ވަނީ އެއްގަމު އުޅަނދުތަކާއި ބައެއް ބަސްތަކުގައިވެސް ރޯކޮށްލާފައެވެ.
ސުވިޑްންގެ ހައްދުފަހަނަ އެޅި މި ގުރޫޕުން ޤުރުއާންގައި ރޯކުރާނެކަމަށް ބުނުމުން، މިކަމާއި ދެކޮޅު ހެދުމުގެ ގޮތުން، އިރާންއާއި އިރާގުންވަނީ، އެގައުމުތަކުގައި ތިއްބަވާ ސުވިޑްންގެ ސަފީރުން ހާޒިރުކޮށްފައެވެ.
ހައްދުފަހަނައެޅި މޫވްމަންޓެއް ކަމުގައިވާ، ސްޓްރަމް ކުރުސް މޫވްމަންޓުގެ ވެރިޔާ، ޑެނިޝް-ސުވިޑިޝްގެ ހައްދުފަހަނަ އެޅި މީހެއް ކަމުގައިވާ ރަމަސުސް ޕަލުޑާން ބުނެފައިވަނީ، އިސްލާމް ދީނުގެ އެންމެ މުގައްދަސް ފޮތް ކަމުގައިވާ ކީރިތި ޤުރުއާން މީގެ ކުރިންވެސް އޭނާ ވަނީ އަންދާލާފައި ކަމަށާއި، އޭނާގެ އެ އަމަލު އަދިވެސް ތަކުރާރު ކުރާނެ ކަމުގައެވެ.
ސުވިޑްންގެ ހައްދު ފަހަނަ އެޅި މި ގުރޫޕުން ޤުރުއާން އަންދާލަން ހަމަޖައްސާފައިވާ ސަރަހައްދުތަކުގައި، ފާއިތުވެދިޔަ ބުރާސްފަތި، ހުކުރު އަދި ހޮނިހިރު ދުވަހު ހިގާފައިވާ ހަމަނުޖެހުންތަކުގައި ސުވިޑްންގެ 16 ފުލުހަކަށް އަނިޔާވެ ފުލުހުންގެ ގިނަ އެއްގަމު އުޅަނދުތަކެއް ވަނީ ހަލާކު ކޮށްލާފައެވެ. ހަމަނުޖެހުންތައް ހިނގަމުންދާ ސަރަހައްދުތަކުގެ ތެރޭގައި، ސްޓޮކްހޮމްގެ ކައިރި އަވަށްތަކާއި، ލިންކޮޕިންގ ސިޓީއާއި ނޯރކޮޕިންގ ސިޓީވެސް ހިމެނެއެވެ.
ޕަލުޑާން ވަނީ، ނޯރކޮޕިންގ ސިޓީގައި އާދީއްތަ ދުވަހު އެއްވާނެކަމަށް ބުނެފައެވެ. އޭގެ ނަތީޖާއެއްގެ ގޮތުން، ބަދަލުގައި ހަމަ އެސަރަހައްދަށް މި އެއްވުމާއި ދެކޮޅަށް މީހުން އެއްވާނެކަމުގެ ބިރު މިހާރުވަނީ ހީވެފައެވެ.
ހައްދުފަހަނަ އެޅި މޫވްމަންޓެއް ކަމުގައިވާ، ސްޓްރަމް ކުރުސް މޫވްމަންޓްއިން މީގެ ކުރިންވެސް ޤުރުއާން އަންދާލުމަށް ކުރި ޕްލޭންތަކާއި ގުޅިގެން ސުވިޑްންގައި ބޮޑެތި ހަމަނުޖެހުންތަކެއް ވަނީ ހިގާފައެވެ. 2020ވަނަ އަހަރު، ސުވިޑްންގެ މަލްމޯ ސިޓީގައި ހިނގި މި ހަމަނުޖެހުންތަކުގައި ކާރުތަކުގައި ރޯކޮށް، ފިހާރަތަކަށް ގެއްލުން ދީފައިވެއެވެ.
ޑެންމާކުގައި، ނަސްލީ ތަފާތު ކުރުންތަކަށް ހިތްވަރު ދީގެން، 2020ވަނަ އަހަރު އެއް މަސްދުވަހަށް ޖަލަށް ލާފައިވާ ޕަލުޑާން ވަނީ މީގެ ކުރިން، ޔޫރަޕް އެހެން ދެގައުމެއް ކަމުގައިވާ ފްރާންސް އަދި ބެލްޖިއަމްގައިވެސް ޤުރުއާން އަންދާލުމަށް ޕްލޭންތަކެއް ކޮށްފައެވެ.
