ރަޝިއާއިން ޔޫކުރެއިންގައި ކެމިކަލް ހަތިޔާރު ބޭނުން ކޮށްފައިވާކަން "މިވަގުތަށް" ޔަގީން ކުރެވިފައި ނުވާކަމުގައި، އެމެރިކާގެ ދިފާޢީ ވުޒާރާ ޕެންޓަގަންއިން ބުނެފައިވާ ކަމުގައި އެމެރިކާގެ އޮފިޝަލުން ބުނެފިއެވެ.
"އަހަރެމެން މިދަނީ މި ތުހުމަތުތައް ބެލެން އޮތް އެންމެ ބޮޑަކަށް ބަލަމުން، އެހެންނަމަވެސް މި ރިޕޯޓުތައް މިވަގުތަށް އަދި ޔަގީން ކުރެވިފައެއް ނުވޭ،" ޔޫކުރެއިންގެ މަރިއޮޕޯލްގައި ރަޝިއާއިން ކެމިކަލް ހަތިޔާރު ބޭނުން ކޮށްފައިވާތޯ ސުވާކުރުމުން އެމެރިކާގެ އޮފިޝަލުން ވިދާޅުވެފައި ވާކަމަށް ބައެއް މީޑިއާތަކުން ރިޕޯޓު ކޮށްފައި ވެއެވެ.
"ކުރިމަތިވެފައިވާ އެންމެ ބޮޑު ގޮންޖެހުމަކީ އަހަރެމެންނަށް އެތާގައި ނުތިބެވުން. އަދި އެތަނުގައި އެއްވެސް ކެމިކަލް ހަތިޔާރެއް ބޭނުން ކޮށްފައިވާކަމެއް ނޭގޭ. މިއީ، އެތަނަށް ހާޒިރުނުވެ، ޔަގީން ކުރުން ދަތި ކަންކަން،" އޮފިޝަލް ވިދާޅުވެފައި ވެއެވެ.
އެމެރިކާއިން އަންދާޒާ ކޮށްފައިވާ ގޮތުގައި ރަޝިއާއިން މިހާރުވަނީ ޔޫކުރެއިންއަށް ހަމަލާ ދިނުމަށް އެގައުމުން ޖަމާކޮށްފައިވާ ހަނގުރާމައިގެ ހަތިޔާރާއި ސިފައިންގެ %80 މިހާރު ބޭނުންކޮށްފައެވެ. އަދި މީގެ ކުރިން، ވިންޓާރގައި ގަނޑުވެފައިވާ ކޯރުތަކާއި ޕޮންޑުތަކުގައި ހަރަކާތްތެރި ވަމުން އައިނަމަވެސް، މިހާރު ރަޝިއާ ސިފައިންނަށް ހަރަކާތްތެރި ވާން ޖެހިފައިވަނީ މަގުމަތީގެ ޕޭވްމަންޓްތައް މަތީގައި ކަމަށްވެސް އޮފިޝަލުން ވިދާޅުވެފައި ވެއެވެ.
އޮފިޝަލުން ވިދާޅުވެފައިވާ ގޮތުގައި، މި ހަފްތާގައި ޑޮންބަސް ސަރަހައްދުގެ ކައިރިން ފެނިފައިވާ 8 މޭލުގެ ދިގު، ރަޝިއާ ސިފައިންގެ ފައުޖު މިހާރު ފެންނާން ހުރީ، ޔޫކުރެއިންގެ ސިޓީއެއް ކަމުގައިވާ އިޒްޔުމްގެ އިރުން 40 މޭލު ދިގު ފައުޖެއްގެ ގޮތުގައެވެ. އޮފިޝަލުން ވިދާޅުވެފައިވާ ގޮތުގައި ރަޝިއާގެ މިފައުޖުގެ މިސްރާބު ހުރީ ޔޫކުރެއިންގެ އުތުރަށެވެ.
