ފާއިތުވި ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށިފަހުން، މި ހަގުރާމާގައި މިހާތަނަށް 191 ކުޑަކުދިން މަރުވެފައި ވާކަމަށް، ޔޫކުރެއިންގެ އޮމްބުޑްސްވުމެން ޔުޑްމިލާ ޑެނިސޯވާ ވިދާޅުވެއްޖެއެވެ. އޭނާ ވިދާޅުވި ގޮތުގައި، މީގެ ތެރޭގައި، ފާއިތުވި 24 ގަޑިއިރު ތެރޭގައި މަރުވެފައިވާ 5 ކުދިންވެސް ހިމެނެއެވެ.
ޑެނިސޯވާގެ ޓެލެގްރާމް އެކައުންޓުގައި އޭނާ ވިދާޅުވެފައިވާ ގޮތުގައި، ހަގުރާމާގައި މިހާތަނަށް 349 ކުޑަކުދިންނަށް ވަނީ އަނިޔާ ވެފައެވެ.
ޔޫކުރެއިންގެ ޕްރޮސެކިއުޓަރުން ވިދާޅުވެފައި ވާގޮތުގައި، ހަގުރާމާގައި މަރުވެފައިވާ ގިނަ މީހުން މަރުވެފައިވަނީ، ވަކިވެގަތުމަށް ހަގުރާމަ ކުރަމުންދާ ހަގުރާމަވެރިން ހަރަކާތްތެރި ވަމުންދާ، އެގައުމުގެ އިރު ދެކުނުގެ ޑޮންބަސް ސަރަހައްދުގައެވެ. އަދި މީގެ އިތުރުން އެގައުމުގެ ވެރިރަށް ކީވްގެ ވަށައިގެންވާ، އިރުމަތީގައި އޮންނަ ކާކިވްގެ ސަރަހައްދުގައެވެ.
މީގެ އިތުރުން، ރަޝިއާއިން ހިސޯރު ކޮށްފައިވާ، ޔޫކުރެއިންގެ މަރިއޮޕޯލްގެ މޭޔަރު ވިދާޅުވެފައިވާ ގޮތުގައި، ރަޝިއާއިން އެސިޓީ ހިސޯރުކޮށް، ދީފައިވާ ހަމަލާތަކުގައި މިހާތަނަށް 10،000 މީހުން ވަނީ މަރުވެފައެވެ. އަދި އޭނާ ވިދާޅުވެފައިވާ ގޮތުގައި، މަގުމަތީގައި މަރުވެ ކުނިވަމުންދާ މީހުންގެ ގަބުރުތައް ނަގާ ސާފުކުރުމުން މި އަދަދު 20،000 އަށް އަރައިގެން ދާނެއެވެ.
އަދި އޭއެފްޕީއާއި ވާހަކަ ދައްކަވަމުން އޭނާ ވިދާޅުވެފަ ވާގޮތުގައި، ރަޝިއާ ސިފައިން މިހާރުވަނީ އެސިޓީއަށް، މަރުވެފައިވާ މީހުންގެ ހަށިތައް އެންދުމަށްޓަކާ މޯބައިލް ކުރިމޭޝަން އެކުއިޕްމަންޓްތައް (މަރުވެފައިވާ މީހުންގެ ހަށިތައް އަންދާ ނައްތާލުމަށް ބޭނުންކުރާ މެޝިނަރީ) ގެނެސްފައެވެ.
އަދި އޭނާ ވިދާޅުވި ގޮތުގައި، މިއީ އެ ސިޓީގައި ރަޝިއާ ސިފައިން ހިންގާފައިވާ އިންސާނިއްޔަތާ ޚިލާފް ޖަރީމާތައް ފޮރުވުމުގެ މަގުސަދުގައި ކުރަމުންދާ ކަމެކެވެ.
