ކޯވިޑް19ގެ ހާލަތު އެންމެ ގޯސްވެގެންދިޔަ ދަނޑިވަޅުގައި އިނގިރޭސިވިލާތުގައި އާންމުކޮށްފައި އޮތް ލޮކްޑައުންއާއި ޚިލާފްވެގެން އިނގިރޭސި ބޮޑުވަޒީރު ބޮރިސް ޖޯންސަންއާއި އޭނާގެ އަނބިކަބަލުން ކެރީ ޖޯންސަން ޖުރިމަނާ ކުރުމަށް އިނގިރޭސި ފުލުހުން ނިންމައިފިއެވެ. އަދި ލޮކްޑައުން ގާނޫނާއި ޚިލާފްވެގެން ޖޯންސަންގެ ދެކަނބަލުންގެ އިތުރުން ޗާންސެލަރ ރިޝީ ސުނަކްވެސް ޖޫރިމަނާ ކުރުމަށް ފުލުހުންވަނީ ނިންމާފައެވެ.
އިނގިރޭސި ސަރުކާރުގެ އޮފިޝަލުން ވިދާޅުވެފައިވަނީ، މި ތިން ބޭފުޅުންނަށްވެސް މެޓްރޯޕޮލިޓަން ފުލުހުންގެ ފަރާތުން ޕެނަލްޓީ ނޯޓިސް މިހާރު އަރުވާފައި ވާކަމުގައެވެ.
އިންގިރޭސިވިލާތުގެ ލޮކްޑައުން ގާނޫނާ ޚިލާފްވެގެން ބޮރިސް ޖޯންސަން ޖޫރިމަނާ ކުރުމަށް ފުލުހުން ނިންމުމާއި ގުޅިގެން، އިދިކޮޅު ލޭބަރ ޕާޓީގެ ލީޑަރ ސާރ ކެއިރ ސްޓާރމަރ ވިދާޅުވެފައިވަނީ ޖޯންސަންއާއި ސުކަން އިސްތިއުފާ ދެއްވަން ޖެހިވަޑައިގަންނަވާނޭ ކަމުގައެވެ.
އިންގިރޭސިވިލާތުގެ ފުލުހުން ގެންދަނީ ކޯވިޑް ލޮކްޑައުން ގާނޫނާއި ޚިލާފަށް، ވައިޓްހޯލްގައާއި ޑައުނިންގ ސްޓްރީޓްގައި ބޭއްވުނު 12 އެއްވުމެއް ތަހުގީގު ކުރަމުންނެވެ. އައި މި ތަހުގީގުގައި މިހާތަނަށް 50 ފަރާތެއްވަނީ ޖޫރިމަނާ ކޮށްފައެވެ.
ފުލުހުންގެ ބުނެފައިވަނީ ތަހުގީގަށްފަހު ޖޫރިމަނާ ކުރާފަރާތްތަކުގެ ނަންތައް ފުލުހުން ހާމަ ނުކުރާނޭ ކަމުގައެވެ. އެހެންނަމަވެސް އިނގިރޭސި ސަރުކާރުން ބުނެފައިވަނީ ފުލުހުން ޖޫރިމަނާ ކުރާ ފަރާތްތަކުގެ ތެރޭގައި ބޮޑުވަޒީރު ޖޯންސަންއާއި ޗާންސެލަރ ސުނަކް ހިމެނިވަޑައި ގަންނަވާނަމަ އެކަން އާންމު ކުރާނޭ ކަމުގައެވެ.
ލޭބާ ޕާޓީގެ ލީޑަރ ސަރ ކެއިރ ވިދާޅުވެފަވަނީ، ކޯވިޑް ލޮކްޑައުން ގާނޫނާ ޚިލާފްވެގެން ބޮޑުވަޒީރު ޖޯންސަން ޖޫރިމަނާ ކުރުމުން އޭގެއިން ދޭހަ ކޮށްދެނީ ސަރުކާރު ހިންގުމަށް ކޮންޒަރވޭޓިވް ޕާޓީގެ ގާބިލްކަމެއް ނެތްކަން ކަމުގައެވެ. އަދި ވެރިކަން ކުރާ ޕާޓީގެ ހާލަތު މިއަށްވުރެ ރަގަޅުވާން ޖެހޭނެ ކަމުގައެވެ.
ކޯވިޑްގެ ހާލަތު އިނގިރޭސިވިލާތުގައި އެންމެ ގޯސްވެގެން ދިޔައިރު، އެގައުމު ލޮކްޑައުން ކޮށްފައި ވަނިކޮށް، 2020 ވަނަ އަހަރުގެ މޭމަހުގެ 20 ވަނަ ދުވަހު، 10 ޑައުނިންގ ސްޓްރީޓުގެ ބަގީޗާއެއްގައި އޮތް ޕާޓީއަކަށް އިނގިރޭސި ބޮޑުވަޒީރު ބޮރިސް ޖޯންސަން ވަޑައިގެންފައިވާ މައްސަލާގައި އެގައުމުގެ ގާނޫނުހަދާ މަޖިލިހުގައި ގިނަ މެމްބަރުންގެ ފާޑުކިއުން އާނާއަށް އަމަޒުވެ އަމިއްލަ ފުޅު ޕާޓީ ތެރެއިންވެސް އިސްތިއުފާގެ އަޑުތައް ފާއިތުވެދިޔަ ތަނުގައި ވަނީ ގަދަވާން ފަށާފައެވެ.
އަދި އޭގެ އިތުރުން، ގައުމު ލޮކްޑައުންގައި ވަނިކޮށް ޕާޓީތަކަށް ވަޑައިގަތް މައްސަލާގައި ގާނޫނުހަދާ މަޖިލިހުގެ މެމްބަރުންނަށް އޭނާ ދޮގުހައްދަވާ އޮޅުވާލާފައިވާ ކަމަށް ވިދާޅުވެ އިތުރު މެމްބަރުންވެސް ވަނީ ބޮރިސް ޖޯންސަންގެ އިސްތިއުފާއަށް ގޮވާ، އަޑު އުފުލާފައެވެ.
ފާއިތުވެދިޔަ ޑިސެމްބަރުމަހު އާންމު ވެގެންގޮސްފައިވާ މައުލުމާތުތަކުން އެގިގެން ގޮސްފައިވާ ގޮތުގައި، ބޮރިސް ޖޯންސަންގެ ޕްރަައިވެޓް ސެކެޓްރީ މާރޓިން ރޭނީލްޑްސް ވަނީ، 2020 އަހަރުގެ މޭމަހުގެ 20ވަނަ ޑައުނިން ސްޓްރީޓްގެ ބަގީޗާއެއްގައި، "ގައި ދުރުކޮށް" ބޭއްވޭ ޕާޓީއަކަށް ޑައުނިންގ ސްޓްރީޓުގައި މަސައްކަތް ކުރާ 100 ވަރަކަށް މުވަޒިފުންނަށް އީމެއިލް މެދުވެރިކޮށް ދައުވަތު ފޮނުވާފައެވެ.
ބޮޑުވަޒީރުގެ ގެކޮޅުގައި މި ޕާޓީ ބާއްވާފައިވަނީ މުޅި ދުނިޔޭގައިވެސް ކޯވިޑްގެ ހާލަތު ގޯސްވެ، އިނގިރޭސިވިލާތްވެސް ވަރަށް ވަރުގަދަޔަށް ލޮކްޑައުން ކޮށްފައި އޮއްވައެވެ. އަދި މި ދުވަސްވަރަކީ އިނގިރޭސިވިލާތުގައި ގެއިން ބޭރުގައި އެކަކަށްވުރެ ގިނައިން އެއްތަނަކަށް ޖަމާނުވުމަށް އަންގާ، މިއެންގުމާ ޚިލާފަށް އަމަލްކުރާ ފަރާތްތަކާ ދެކޮޅަށް ގާނޫނީ ފިޔަވަޅު އަޅާނެކަންވެސް އާންމުކޮށް އިއުލާން ކޮށްފައިވާ ދުވަސްވަރެކެވެ.
މީގެކުރިން ޖޯންސަންވަނީ އޭނާއާއި އަދި އޭނާގެ އަނބިކަބަލުން ކެރީ ޖޯންސަން މި ޕާޓީއަށް ހާޒިރުވިކަން ދޮގު ކުރައްވަން އިންކާރު ކުރައްވާފައެވެ. އަދި އޭނާވަނީ، ޑައުނިންގ ސްޓީޓްގައި ބޭއްވުނު ޕާޓީތަކާބެހޭ ތަހުގީގެއް ކުރިޔަށް ދާތީ، މި މައްސަލައާއި ގުޅޭގޮތުން އިތުރަށް ކޮމެންޓް ކުރައްވަންވެސް އޭރު ދެކޮޅު ހައްދަވާފައެވެ.
އިގިރޭސި ސަރުކާރުގެ ވަޒީރަކު، މިނިސްޓީރިއަލް ކޯޑާއި ޚިލާފް ވެއްޖެނަމަ މަގާމުން އިސްތިއުފާ ދެއްވަން ޖެހިވަޑައި ގަންނަވައެވެ. ޖޯންސަންގެ އަމިއްލަފުޅު ޕާޓީގެ ބައެއް މެމްބަރުންވެސް ވަނީ، ބޮޑުވަޒީރު ޖޯންސަން މި ޕާޓީއަށް ވަޑައިގެންނެވިކަން ސާބިތުވެއްޖެނަމަ އިސްތިއުފާ ދެއްވަން ޖެހިވަަޑައިގަންނަވާނޭކަަމަށް ކުރިން ވިދާޅުވެފައެވެ.
