ކަނޑުމަގުން ކަންނެލި ދޯންޏެއްގައި ރާއްޖެއަށް 130 ކިލޯގެ މަސްތުވާތަކެތި އެތެރެކުރަން އުޅުނު މައްސަލައިގައި ހައްޔަރު ކުރި މީހުންގެ ތެރެއިން އެކަމުގައި އިސްކޮށް ހަރަކާތްތެރިވި 2 މީހުން ދޫކޮށްލައިފިއެވެ.
ކްރިމިނަލް ކޯޓުން މިއަދު ދޫކޮށްލާފައިވަނީ މި ތަކެތި ރާއްޖެއަށް އެތެރެކުރުމުގައި އިސްކޮށްހުރި ދެ ފަރާތް ކަމަށްވާ ގއ. ވިލިނގިލި/ލައިޓްހައުސް، ޝަހީބް އިބްރާހިމް (42އ) އާއި ހއ. ހޯރަފުށި/ ވައިލެޓްވިލާ، އަހްމަދު މޫސާ (48އ) އެވެ.
މިއަދުގެ އަޑުއެހުމުގައި ޝިހާބްގެ ފަރާތުން ބުނެފައި ވަނީ އޭނާގެ ނަފްސާނީ މައްސަލަތަކަކާއި މައިބަދައިގެ ދެ ޑިސްކް ގުޑައިފައިވާ ކަމަށެވެ. އަހުމަދު މޫސާ ފާހަގަކުރި ކަންތައްތަކުގެ ތެރޭގައި، އޭނާގެ ނޭވާލާ ނިޒާމަށް މައްސަލަތަކެއް ދިމާވެ، ޓެސްޓްތަކެއް ހަދަން ޖެހޭކަން ފާހަގަކުރި އެވެ. ދެ މީހުން ވެސް ބުނެފައި ވަނީ އެކަށީގެންވާ ބޭސްފަރުވާ ނުލިބޭ ކަމަށެވެ.
އެހެންކަމުން ދެ ފަރާތުގެ ވާހަކަތައް އެއްސެވުމަށްފަހު އިސްގާޒީ އަހުމަދު ޝަކީލް ނިންމެވީ ޝަރުތުތަކަކާ އެކީ ބޭސްފަރުވާއަށް ދެ މަހަށް ދެ މީހުން ބަންދުން ދޫކޮށްލުމަށެވެ. އެގޮތުން ހުއްދަނެތި މާލެއިން ބޭރަށް ނުދިއުމަށާއި ރޭގަނޑު ގެއިން ބޭރަށް ނުނިކުތުމަށް ވަނީ ޝަރުތުކޮށްފައެވެ.
މި ދެ މީހުންގެ މައްޗަށް ދައުލަތުން އުފުލާފައި ވަނީ މަސްތުވާއެއްޗެއް ރާއްޖެއަށް އެތެރެކުރުމުގެ ކުށުގެ ދައުވާއާއި، މަސްތުވާއެއްޗެއް ޓްރެފިކްކުރުމުގެ ކުށުގެ ދައުވާގެ އިތުރުން ޑައިމޯފިން ޓްރެފިކްކުރުމުގެ ކުށުގެ ދައުވާ އެވެ. މިމައްސަލާގައި މީގެ ކުރިން ޝަހީބު ދޫކުރި ނަމަވެސް ފަހުން އޭނާ އާއި އަހުމަދު މޫސާ ވަނީ ޝަރީއަތް ނިމެންދެން ބަންދު ކޮށްފައެވެ.
މި މައްސަލައާއި ގުޅިގެން ފުލުހުން ވަނީ ހަތް މީހަކު ހައްޔަރު ކޮށްފައެވެ. އޭގެ ތެރެއިން ޝަހީބަކީ 2019 ނޮވެމްބަރު މަހުގެ ތެރޭގައި ރާއްޖެއަށް މަސްތުވާތަކެތި އެތެރެކުރާކަމަށް ތުހުމަތުކުރެވޭ މައްސަލައަކާ ގުޅިގެން ރާއްޖޭގެ ކަނޑުގެ ސަރަހައްދު ތެރެއިން ފުލުހުންގެ ބެލުމުގެ ދަށަށް ގެނައި އިރާން ބޯޓުގެ މައްސަލައާ ގުޅުން އޮތް ފަރާތެއް ކަމަށް ވެސް ފުލުހުން ވިދާޅުވިއެވެ.
