ރައީސް އިބުރާހިމް މުހައްމަދު ސާލިހުގެ ވެރިކަމަށް 3 އަހަރުފުރި، ވެރިކަމުގެ މިދައުރުގެ ފަހު ދެއަހަރު ގުނަން ފަށާފައިވާއިރު، އެމަނިކްފާނުގެ ވެރިކަމުގެ ދައުރުގެ ތެރެއިން ފާހަގަވާން އޮތް އެންމެ އާދަޔާ ޚިލާފު އެއްކަމެއްގެ ގޮތުގައި އޮތީ ރައްޔިތުންގެ މަޖިލިހުގައި އޮތް އެޕާޓީގެ ސުޕަރ މެޖޯރިޓީއެެވެ.

ރައްޔިތުންގެ މަޖިލުހުގެ ތާރީޚުގައިވެސް، މިހާތަނަށް އެމަޖިލިހުގައި އެއް ޕާޓީއަކަށް ސުޕަރ މެޖޯރިޓީ ލިބިގެންދިޔަ ހަމަ އެކަނި އިންތިޚާބަކަށް ވެގެންދިޔައީ 2019ވަނަ އަހަރު ބޭއްވިގެންދިޔަ ރައްޔިތުންގެ މަޖިލިހުގެ އިންތިޚާބެވެ. 2018ވަނަ އަހަރުގެ ރިޔާސީ އިންތިޚާބުގައި ވެވުނު ކޯލިޝަން އެއްބަސްވުމާއިވެސް ޚިލާފަށް، ރައީސް މުހައްމަދު ނަޝީދު އިސްވެ ހުންނަވާ، އެމްޑީޕީން ރައްޔިތުންގެ މަޖިލިހުގެ ހުރިހާ ދާއިރާއަކަށް ވާދަކޮށް، 19ވަނަ މަޖިލިހުގެ ސުޕަރ މެޖޯރިޓީ ހޯއްދެވި ހިސާބުން، ގިނަބަޔަކަށް ސިފަ ކުރެވިގެން ދިޔައީ، މި މަޖިލިސް ވެގެންދާނީ، ރައީސް ސާލިހަށް ހުރިހާ ގޮތަކުންވެސް އެއްބާރުލުންދީ، އަދި ސަރުކާރުކާރަށް ކަންކަން ފަހި ކުރުމުގައި އަތުކުރި އޮޅާލާނޭ މަޖިލީހެއްގެ ގޮތުގައެވެ.

އަދި ވަކީން ޚާއްސަކޮށް، ރައްޔިތުންގެ މަޖިލިހުގެ ރައީސްކަމުގެ މަގާމަށް އެމްޑީޕީގެ ރައީސް މުހައްމަދު ނަޝީދު، އެ ޕާޓީގެ ޕާލަމެންޓްރީ ގުރޫޕުގެ ތަނަވަސް އައުލަބިއްޔަތުން އައްޔަން ކުރެވިގެން ދިއުމާއެކު، މަޖިލިހުގެ ތެރެއިން ސަރުކާރަށް ކަންކަން ފަހިކޮށްދީ، އަދި ރައީސް ސާލިހަށް ސަރުކާރު ހިންގުމުގައި އެހީތެރިކަން ފޯރުކޮށްދިނުމުގައި ވަކީން ބޮޑަށް ސުޕަރ މެޖޯރިޓީން އަތުކުރި އޮޅާލާނޭކަމުގައި ގިނަ ބަޔަކު އުއްމީދު ކޮށްފައި ވެއެވެ.

އެހެންނަަމަވެސް ސުޕަރ މެޖޯރިޓީއަށް، އެކުއެކީގައި، އެކުވެރިކަމާއެކު މަސައްކަތް ކުރެވުނުތަން ފެނިގެންދިޔައީ އަހަރެއްހާ ދުވަހުގެ މުއްދަތަކަށެވެ. އެންމެ ފުރަތަމަ ކުރިމަތިލާންޖެހުނު އެއް ޚިޔާލު ތަފާތު ވުމަކަށް ވެގެންދިޔައީ މަޖިލިސް މެދުވެރިކޮށް، ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް އަބުރާލުމަށް މަޖިލިސް ރައީސް ނަޝީދު ކުރައްވަން ފެއްޓެވި މައްސައްކަތްތަކެވެ. އެއަށްފަހު މަޖިލިހަށް ހުށަހެޅިގެންދިޔަ ނަފްރަތުގެ ބިލެވެ. އެއަށްފަހު، 6 މޭގެ ޓެރަރިސްޓު ހަމަލާއެވެ.

މިކަންކަމުގައި އުފެދިގެންދިޔަ ބޮޑެތި ޚިޔާލު ތަފާތުވުންތަކުގައި، މަޖިލިހުގެ ސުޕަރ މެޖޯރިޓީ ދެބައިވެ، އެންމެފަހުން ރައީސް ނަޝީދަށް ތާއީދު ކުރައްވައިގެން ތިއްބެވި މެމްބަރުން ވަނީ މަޖިލިސް ފްލޯގައި ރައީސް ސާލިހުގެ އިސްތިއުފާއަށްވެސް ގޮވާފައެވެ. އަދި މިގޮތުން އެޅަންފެށި ރެނދުތައް އިތުރަށް ފުޅާވެ، މިހާރު ކުރެވެމުންދާ އެމްޑީޕީގެ ޗެއަރޕާރސަން އިންތިޚާބުގެ ކެމްޕޭނާއެކީ ނަޝީދު ފެކްޝަނަށް ނިސްބަތްވާ މެމްބަރުން މިވަނީ، އެމްޑީޕީގެ ޕާލަމެންޓްރީ ގުރޫޕްގެ ވިޕްތަކަށް ބަލާލުމެއްނެތި، މަޖިލިހުގެ އިދިކޮޅު މެމްބަރުންނާއެކީ ފާޅުކަން ބޮޑު ގޮތެއްގައި މަޖިލިސް ފްލޯގައި މަސައްކަތް ކުރައްވަން ފައްޓަވާފައެވެ.

ޕާލަމެންޓްރީ ގުރޫޕް ހާވިޔާވެފައި!

އެމްޑީޕީގެ ޗެއަރޕާރސަން އިންތިޚާބުގެ ކެމްޕޭނާ ހަމައިން، އެޕާޓީގެ އެތެރޭގައި އޮތް ވާދަވެރިކަމުގެ ހުޅުގަޑު އަލުން މިވަނީ ފަޅައިގެން ގޮސްފައެވެ. ޗެއަރޕާރސަންގެ މަގާމަށް ރައީސް ސާލިހުގެ ތާއީދާއެކީ އިކޮނޮމިކް މިނިސްޓަރު ފައްޔާޒު އިސްމާއިލް ވާދަކުރައްވަމުން ގެންދަވާއިރު، އެ މަގާމަށް ރައީސް ނަޝީދުގެ ތާއީދާއެކީ ވާދަ ކުރައްވަމުން ގެންދަވަނީ މާފަންނު އުތުރު ދާއިރާ މެމްބަރު އިމްތިޔާޒު ފަހުމީއެވެ.

އަދި މި ކެމްޕޭންގައި އުފެދިގެން ގޮސްފައިވާ ވާދަވެރިކަމުގެ ތެރެއިން، ރައީސް ނަޝީދަށް އިޚްލާސްތެރި، އެމްޑީޕީގެ އިސް ބައެއް އޮފިޝަލުން އިމްތިޔާޒު ފަހުމީއަށް ކެމްޕޭން ކުރައްވަމުން ގެންދަވާއިރު، ސަރުކާރުގެ ވަޒީރުންނާއި، އެމްޑީޕީގެ ޕާލަމެންޓްރީ ގުރޫޕުގެ ގިނަ އަދަދެއްގެ މެމްބަރުންނާއި، ސަރުކާރުގެ ކުންފުނިތަކުގެ އެމްޑީންނާއި އަދި އޭގެ އިތުރުން އެމްޑީޕީގެ ގައުމީ މަޖިލިހުގެ ގިނަ އަދަދެއްގެ މެމްބަރުންވެސް ތާއީދުކޮށް އަދި ފާޅުގައި ކެމްޕޭން ކުރަމުންދާ މަންޒަރު ފެންނަމުންދަނީ ފަޔާޒް އިސްމާއިލު ޗެއަރޕާރސަންކަމުގެ މަގާމަށް އިންތިޚާބު ކުރުމަށެވެ.

އަދި މިވާދަވެރިކަމުގައި ޕާޓީގެ ޕާލަމެންޓްރީ ގުރޫޕް ދެފެކްޝަނެއްގެ ގޮތުގައި އަލުން އާފެށުމަކުން މަސައްކަތް ކުރަން ފަށާފައި ވާއިރު، އެމްޑީޕީގެ ޕާލަމެންޓްރީ ގުރޫޕުގެ، ރައީސް ނަޝީދުގެ ފެކްޝަނަށް ނިސްބަތްވާ މެމްބަރުން މިހާރުވަނީ، އިދިކޮޅުން ހުށަހެޅާ މައްސަލަތަކަށް މަޖިލިސް ފްލޯގައި ތާއީދުކޮށް، އެއްކޮޅަށް ވަކާލާތުކޮށް، އެމްޑީޕީގެ ވިޕްލައިންތަކާއި ޚިލާފަށް، އިދިކޮޅު މެމްބަރުންގެ ހުށަހަޅުންތަކަށް ވޯޓުވެސް ދެއްވަން ފައްޓަވާފައެވެ.

މިގޮތުން އިއްޔެ ރައްޔިތުންގެ މަޖިލިހުގެ މާވަށު ދާއިރާގެ މެމްބަރު މުހައްމަދު ސައީދު މަޖިލީހަސް ހުށަހެޅުއްވި، ލ. ގަމު ރީޖަނަލް ހޮސްޕިޓަލަށް ކުރިމަތިވެފައިވާ މައްސަލަތައް ދެނެގަނެ، ސިއްޙީ ޚިދުމަތުގެ ފެންވަރު ރަނގަޅުކޮށް ހިންގުން ހަރުދަނާކޮށް، ހުރި މައްސަލަތައް ވީހާވެސް އަވަހަށް ޙައްލުކޮށްދިނުމަށް ގޮވާލައި ހުށަހެޅި މައްސަލަ ރައީސް ނަޝީދު ފެކްޝަނަށް ނިސްބަތްވާ، މަޖިލިސް ނާއިބު ރައީސް އީވާ އަބުދުﷲއަށް ފެނިވަޑައިގަތީ ސަރުކާރާ އެއްވެސް ދެކޮޅުވެރިކަމެއް ނެތް މައްސަލައެއްގެ ގޮތުގައެވެ.

އަދި މައްސަލަ ބަލައި ނުގަތުމަށްވެސް ޕާލަމެންޓްރީ ގުރޫޕުން ވިޕް ނެރެފައި ވަނިކޮށް، ރައީސް ނަޝީދު ފެކްޝަނަށް ނިސްބައތްވާ ބައެއް މެމްބަރުންގެ ތާއީދާއެކީ، މައްސަލަ ވަނީ މަޖިލީހަށް ބަލައިވެސް ގެންފައެވެ. މި މައްސަލަ މަޖިލީހަށް ބަލައިގަތުމާއެކު، އިދިކޮޅުން މެމްބަރުންނާއެކީ، ނަޝީދުގެ ފެކްޝަނަށް ތާއީދުކުރާ މެމްބަރުންވަނީ މަޖިލިސް ފްލޯގައި އަތްޖަހާ އުފާފާޅުކޮށް ހަދާފައެވެ.

އެހެންނަމަވެސް ފާހަގަ ކޮށްލާންޖެހޭ އެއްކަމަކީ، ޕާލަމެންޓްރީ ގުރޫޕްތަކުން ނެރޭ ވިޕްލައިންތަކާއި އެއްގޮތަށް އަމަލު ކުރުމަކީ، ޕާލަމެންޓްރީ ގުރޫޕުތަކުގެ ގަވައިދުތަކުގައި މެމްބަރުންގެ މައްޗަށް ލާޒިމްކޮށްފައި އޮންނަ ކަމެއްކަމެވެ. އަދި އެމްޑީޕީގެ ޕާލަމެންޓްރީ ގުރޫޕުގެ ގަވާއިދުގައިވެސް މިއުސޫލު މިގޮތުގައި އެކަށައެޅިފައި އޮތްއިރު، އެޕާޓީގެ ޕާލަމެންޓްރީ ގުރޫޕު ދެ ފެކްޝަނަކަށް ބެހި، އުފެދިގެން ގޮސްފައިވާ ޚިޔާލުތަފާތުވުން ތަކާއެކީ، ޕާލަމެންޓްރީ ގުރޫޕުން ނެރޭ ވިޕް ލައިނަކަށް ބެލުމެއްނެތި، މަޖިލިހުގެ ސުޕަރ މެޖޯރިޓީ އޮތް 65 މެމްބަރުން ފެންނަމުންދަނީ އެކީއެކަށް ހާވިޔާވެފައި އޮތް މަންޒަރެވެ. އެއްވެސް އަމާޒެއް، އުސޫލެއް ނެތި، ހުންގާނުނެތި ދަތުރު ކުރަމުންދާ އޮޑިއެއްގެ މިސާލުގައެވެ.

ސުޕަރ މެޖޯރިޓީ، ފެށުނީއްސުރެ ރައީސް ސާލިހުގެ ބޮލުގެ ރިހުމަކަށް!

2019ވަނަ އަހަރުގެ މަޖިލިސް އިންތިޚާބަށްފަހު، އެމްޑީޕީގެ ޕާލަމެންޓްރީ ގުރޫޕަކީ ސަރުކާރުގެ އެންމެ ވަރުގަދަ އައްޑަނަ ކަމުގައި ގިނަބަޔަކަށް ހީކުރެވިގެން ދިޔަނަމަވެސް، 19ވަނަ ޕާލަމެންޓުގެ ދައުރު ދެބައިވެ، ދައުރުގެ ފަހު ހާފުގައި ކުޅެން ފަށާފައިވާއިރު، ފާއިތުވެދިޔަ ތަނުގައި، ރައީސް ސާލިހަށް ކުރިމަތިލައްވަން ޖެހިވަޑައިގެންނެވި އެންމެ ބޮޑު އެއް ބޮލުގެ ރިހުމުގެ ގޮތުގައި ފާހަގަވާން އޮތީވެސް ސުޕަރ މެޖޯރިޓިކަމުގައި މިއަދު ގިނަބަޔަކު ދަނީ ގަބޫކުރަމުން ކަމުގައި ދަންނަވާން ޖެހެއެވެ.

19ވަނަ މަޖިލިހުގެ ސުޕަރ މެޖޯރިޓީ ސަރުކާރަށް ލިބިގެން ދިޔަނަމަވެސް، މި ސުޕަރ މެޖޯރިޓީ ސަރުކާރާއެކީ ދެމިއޮތްތަނެއް ފާއިތުވެދިޔަ ތަނުގައި ފެނިގެން ގޮސްފައެއް ނުވެއެވެ. އެކަތިގަޑެއްގެ ގޮތުގައި އޮވެ، ސަރުކާރު ހިންގުމަށް އެއްބާރުލުން ދިނުމުގެ ބަދަލުގައި، ސުޕަރ މެޖޯރިޓީގެ އެއްބައި މެމްބަރުން ފާހަގަވެގެން ގޮސްފައިވަނީ، މަޖިލިސް ރައީސް މުހައްމަދު ނަޝީދުގެ ސިޔާސީ އެޖެންޑާ ހަގީގަތަކަށް ހެދުމުގައި އަވަދިނެތި މަޖިލިހުގެ ތެރޭގައި މަސައްކަތް ކުރައްވަމުން ގެންދަވާ މެމްބަރުންގެ ގޮތުގައެވެ.

މިގޮތުން، ފެށުނީއްސުރެ، އިދިކޮޅު މެމްބަރުންނެކޭ އެއްބީދައަކުން، މެދު ނުކެޑި ރައީސް ސާލިހަށް ފާޑު ވިދާޅުވަމުން ގެންދަވާ މެމްބަރުން އެމްޑީޕީގެ ޕާލަމެންޓްރީ ގުރޫޕުގައި ތިއްބެވިކަން މިއީ ވަރަށްވެސް ސާފުކޮށް ފެންނާން އޮތް ހަގީގަތެކެވެ. އަދި މިގޮތުން ފާހަގަވާ މެމްބަރުންނަކީ، ހިތާއި ނަފްސުން ރައީސް ނަޝީދަށް ތާއީދު ކުރައްވައިގެން ތިއްބެވި މެމްބަރުންކަންވެސް ފާހަގަ ކޮށްލާން ޖެހެއެވެ.

އޭގެ ނަތީޖާއެއްގެ ގޮތުން، ރައްޔިތުންގެ މަޖިލީހުގެ ތެރެއިން މިއަދު ފެންނަމުންދާ އެންމެ ބޮޑު އެއް ހަގީގަތަކީ، އެމްޑީޕީގެ ޕާލަމެންޓްރީ ގުރޫޕުގެ ތެރޭގައި ތިއްބެވި، ނަޝީދަށް ތާއީދު ކުރައްވާ މެމްބަރުން އިދިކޮޅު ޕީޕިއެމް ޕިއެންސީގެ މަޖިލިސް މެމްބަރުނާއެކު ފާޅުގައި މަސައްކަތް ކުރައްވަން ފައްޓަވާފައިވާ މަންޒަރެވެ. އިދިކޮޅު މެމްބަރުންނާ އެކީ، ސަރުކާރާ ދެކޮޅަށް ވަކާލާތުވެސް ކުރައްވަމުން ގެންދަވާ މަންޒަރެވެ. އެއުސޫލުން ވޯޓުވެސް ދެއްވަން ފައްޓަވާފައިވާ މަންޒަރެވެ.

އެހެންނަމަވެސް އެމްޑީޕީގެ ޕީޖީގެ ނަޝީދު ފެކްޝަންގެ ހަގީގީ އަމާޒު އަދި މުޅީން ސާފުވާން ނެތްކަމުގައިވި ނަމަވެސް، ނަޝީދަށް ތާއީދުކުރައްވާ ބައެއް މެމްބަރުން މިގޮތުން ކުރަންފެށި މަސައްކަތްތަކުގައި ހަގީގީ މަންޒިލް މަގުސޫދު، ޗެއަރ ޕާރސަން އިންތިޚާބު ނިމިގެންދާއިރު ވަރަށްވެސް ރަގަޅަށް ސާފުވެގެން ދާނެކަމުގައި ބެލެވެއެވެ. އެދުވަހަކަށް ގިނަބަޔަކު ތިބީ އިންތިޒާރީގައެވެ.