އެމްޑީޕީ މެމްބަރުންގެ ތާއީދާއެކު އިދިކޮޅު މެމްބަރުންގެ މައްސަލަތައް މަޖިލީހަށް ބަލައިގަންނަން ފަށައިފިއެވެ.
އެމްޑީޕީގެ ތެރޭގައި އުފެދިފައިވާ ޚިޔާލު ތަފާތުވުން ބޮޑުވެފައިވާ މިދަނޑިވަޅުގައި ރައީސް ނަޝީދަށް ތާއީދު ކުރާ މަޖިލިސް މެމްބަރުން ދަނީ ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ. މަޖިލީހަށް މީގެ ކުރިން އިދިކޮޅު މެމްބަރުން ހުށަހަޅާ މައްސަލަތައް ބަލައި ނުގަނެ ބޭރުކޮށްލި ނަމަވެސް މިހާރު އިދިކޮޅު މެމްބަރުން ހުށަހަޅާ ގިނަ މައްސަލަތައް މަޖިލީހުން ބަލައި ގަނެ ބަހުސް ކުރަން ފުރުސަތު ލިބެއެވެ.
އިއްޔެ ޕީއެންސީންގެ ނައިބް ރައީސް އަދާމް ޝަރީފް ހުށަހެޅި މައްސަލަވެސް ވަނީ ބަލައިގަނެފައެވެ. އަދި މިއަދު ސައީދު ހުށަހެޅުއްވި މައްސަލަވެސް ވަނީ ބަލައި ގަނެ ބަހުސްކޮށްފައެވެ.
މިއަދު ސައީދު ހުށަހެޅި މައްސަލައަކީ ލ.ގަމު ރީޖަނަލް ހޮސްޕިޓަލަށް ކުރިމަތިވެފައިވާ މައްސަލަތައް ދެނެގަނެ، ސިއްޙީ ޚިދުމަތުގެ ފެންވަރު ރަނގަޅުކޮށް ހިންގުން ހަރުދަނާކޮށް ހުރި މައްސަލަތައް ވީހާވެސް އަވަހަށް ޙައްލުކޮށްދިނުމަށް ގޮވާލައި ހުށަހެޅި މައްސަލައެކެވެ.
މިމައްސަލާގައި ވާހަކަ ދައްކަވަމުން މަޖިލީހުގެ ނައިބް ރައީސް އީވާ ވިދާޅުވީ މިމައްސަލާގައި ސަރުކާރާއި އިދިކޮޅު ކަމެއް އޮތްކަމެއް ފާހަގަ ނުވާކަމަށެވެ. މިއީ ރައްޔިތުންނާއި ގުޅުން އޮތް މައްސަލައެއް ކަމަށްވުމުން މިމައްސަލަ މަޖިލީހުގައި ބަހުސް ނުކުރެވެންވީ ސަބަބެއް ނެތްކަމަށެވެ. އަދި ސައީދު މިމައްސަލަ ހުށަހެޅި ނަމަވެސް މީގައި ފާގަހަކޮށްފައިވާ ކަންބޮޑުވުންތައް ހައްލު ނުވާހާ ހިނދަކު މިވާހަކަ ރައްޔިތުން ދައްކާނެކަމަށެވެ.
މަޖިލީހުގައި ހިމެނޭ ރައީސް ޞާލިހަށް ތާއީދު ކުރާ މެމްބަރުން ވަނީ ރާއްޖޭގެ ޞިއްޚީ ނިޒާމުގެ ހާލަތު ރަނގަޅު ކުރުމަށް ގިނަ މަސައްކަތްތަކެއް ކުރާކަން ފާހަގަކޮށްފައެވެ. ނަމަވެސް ރައީސް ނަޝީދަށް ތާއީދު ކުރާ މެމްބަރުން ވަނީ ވެފައިވާ ވައުދުތައް އެންމެ އެކަށީގެންވާ ބާރު މިނުގައި ކުރިއަށް ނުދާކަން ފާހަގަކޮށްފައެވެ.
