ރަޝިއާގެ ރައީސް ލާޑިމިރު ޕުޓިންއަށް ދެން އިތުރަށް ވެރިކަމުގައި ދެމި ހުނުރެވޭނެ ކަމުގައި އެމެރިކާގެ ރައީސް ޖޯ ބައިޑްން ވިދާޅުވެއްޖެއެވެ. ބައިޑްން މިހެން ވިދާޅުވެފައިވަނީ ޔޫރަޕަށް މިހާރު ކުރައްވަމުން ގެންދަވާ ދަތުރުފުޅުގައި، ޔޫކުރެއިންއާއި އިންވެގެން އޮތް ޕޮލޭންޑުގެ ވެރިރަށް ވާސޯގައި ވާހަކަފުޅު ދައްކަވަމުންނެވެ.
އެހެންނަމަވެސް، ރަޝިއާގެ ވެރިކަމުގައި ޕުޓިންއަށް ނުހުންނެވޭނަކަމަށް ބައިޑްން ވިދާޅުވި ވިދާޅުވުން، ވައިޓްހައުސްއިން ފަހުންވަނީ ތަފްސީލުކޮށް ދީފައެވެ. ވައިޓްސްހައުސްއިން ބުނެފައިވަނީ، ބައިޑްން އިޝާރާތް ކުރައްވާފައިވަނީ، ރަޝިއާގެ ވެރިކަން ބަދަލުކުރުމުގެ ވާހަކައަށް ނޫންކަމުގައެވެ.
"އޭނާއަކަށް ވެރިކަމުގައި ދެން ދެމި ނުހުރެވޭނެ،" ޕޮލޭންޑުގެ ވެރިރަށް ވާރސޯގެ ރޯޔަލް ކާސަލްގައި ވާހަކަ ދައްކަވަމުން ބައިޑްން ވިދާޅުވެފައި ވެއެވެ.
"ރައީސް ވާހަކަ ފުޅުގައި އިޝާރާތް ކުރައްވާފައިވަނީ، ޕުޓިންއަށް އޭނާގެ އަވައްޓެރި ގައުމުތަކުގެ މައްޗަށް ބާރު ހިންގުމުގައި ދެމި ނުހުރެވޭނެ ވާހަކަ، އިޝާރާތް ކުރައްވާފައިވަނީ ރަޝިއާގައި ޕުޓިންއަށް އޮތް ބާރުގެ ވާހަކައެއް ނޫން، އަދި އެގައުމުގެ ވެރިކަން ބަދަލުކުރުމުގެ ވާހަކައަކަށްވެސް ނޫން،" ވައިޓް ހައުސްގެ އޮފިޝަލް ވިދާޅުވެފައި ވެއެވެ.
ވައިޓް ހައުސްއިން ބުނެފައިވަނީ، ޕުޓިންއަށް ވެރިކަމުގައި ދެމި ނުހުރެވޭނެކަމަށް ވިދާޅުވެ ބައިޑްން ދެއްކެވި ވާހަކަ ފުޅަކީ، ކުރިން ތައްޔާރު ކޮށްފައިވާ ޚިތާބުގެ ބައެއް ނުންކަމަށެވެ.
ޕުޓިން ރަޝިއާގެ ވެރިކަމުން ދުރުކުރުމަކީ، އެގައުމުގެ މަގުސަދެއް ނޫންކަމަށް އެމެރިކާގެ އޮފިޝަލުން މީގެ ކުރިންވެސް ވިދާޅުވެފައި ވެއެވެ.
"އަހަރެމެންގެ މަގުސަދަކީ ރަޝިއާގެ ވެރިކަން ބަދަލު ކުރުމެއް ނޫން. އެމީހުންގެ ވެރިއަކީ ކާކުކަން އިޚްތިޔާރު ކުރުމަކީ ރަޝިއާގެ ރައްޔިތުންގެ ޒިންމާއެއް،" އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކަން މިމަހުގެ ކުރީކޮޅު ވިދާޅުވެފައި ވެއެވެ.
ބައިޑްންގެ ވާހަކަފުޅާއި ގުޅިގެން ކްރެމްލިންއިން ބުނެފައިވަނީ، އެގައުމުގެ ރައީސް އިޚްތިޔާރު ކުރުމަކީ ރަޘިއާގެ ރައްޔިތުންގެ އިޚްތިޔާރުގައި އޮތް ކަމެއް ކަމަށެވެ. "އެއީ ބައިޑްން އިޚްތިޔާރު ކުރާ ކަމެއް ނޫން،" ކްރެމްލިންގެ ތަރުޖަމާން ޑިމިޓްރ ޕެސްކޯވް ވިދާޅުވެފައި ވެއެވެ.
