އެމެރިކާގެ ތާރީޚުގައި ފުރަތަމަ ފަހަރަށް އަންހެން ބޭފުޅަކަށް ސެކެޓްރީ އޮފް ސްޓޭޓްގެ މަގާމް އަދާ ކުރެއްވި، މެޑަލިން އަލްބްރައިޓް އުމުރުން 84 އަހަރުގައި ނިޔާ ވެއްޖެއެވެ. މެޑަލިން އަލްބްރައިޓް ފާހަވަގެން ދިޔައީ، ދުނިޔޭގެ ފިނި ހަނގުރާމަ ނިމި ދިއުމަށްފަހު، ހުޅަނގުގެ ޚާރިޖީ ސިޔާސަތު ޒަމާނާ އެއްގޮތަށް ބައްޓަން ކުރުމުގައި މުހިންމު ދައުރެއް އަދާކުރެއްވި ބޭފުޅެއްގެ ގޮތުގައެވެ.
އަލްބަރައިޓްގެ އާއިލާއިން ބުދަ ދުވަހު ނެރެފައިވާ ބަޔާނުގައި ބުނެފައިވަނީ، އޭނާ ނިޔާވެފައިވަނީ، ކެންސަރު ބައްޔާއި ހަނގުރާމަ ކުރައްވަމުން ގެންދަވަނިކޮށް ކަމުގައެވެ.
އަލްބްރައިޓް ސިޔާސީ މައިދާނުން އެންމެ ފުރަތަމަ ފާހަގަ ވެގެން ގޮސްފައިވަނީ، އެމެރިކާގެ ކުރީގެ ރައީސް ބިލް ކުލިންޓަންގެ ދައުރުގައެވެ. މިގޮތުން ކުލިންޓަންގެ ފުރަތަމަ ދައުރުގައި އޭނާ އަދާ ކުރައްވާފައިވަނީ، އެމެރިކާއިން ޔޫއެންއަށް ކަނޑައަޅުއްވާފައި ހުންނަވާ ސަފީރުގެ މަގާމެވެ. އަދި ކުލިންޓަންގެ ދެވަނަ ދައުރުގައި އަލްބްރައިޓް ވަނީ އެމެރިކާގެ ފުރަތަމަ އަންހެން ސެކެޓްރީ އޮފް ސްޓޭޓްގެ މަގާމް އަދާ ކުރައްވާފައެވެ.
އަލްބަރައިޓްގެ ސެކެޓްރީ އޮފް ސްޓޭޓް ކަމުގައި އެކަމަނާވަނީ ނޭޓޯ ފުޅާކޮށް ވަރުގަދަ ކުރުމުގައި މުހިންމު ދައުރެއް އަދާ ކުރައްވާފައެވެ. އަދި ބޯލްކަންސްގައި ހިގަމުން އައި ނަސްލު ނައްތާލުމާއި ގަތުލު އާންމުތައް ހުއްޓުވުމުގައި ނޭޓޯގެ ދައުރު ފުޅާ ކުރެއްވުމަށް ޚާއްސަ މަސައްކަތްތަކެއް ކުރައްވާފައިވެއެވެ. އަދި މީގެ އިތުރުން އަލްބްރައިޓް ވަނީ ދުނިޔެއިން ނިއުކުލިއަރ ހަތިޔާރުތައް މަދުކުރުމަށް މަސައްކަތް ކުރެއްވުމުގެ އިތުރުން ދުނިޔޭގެ ގައުމުތަކުގައި އިންސާނީ ހައްގުތައް ކުރިއަރުވާ، ޑިމޮކްރަސީ ހަރުދަނާ ކުރުމަށްވެސް މުހިންމު މަސައްކަތްތަކެއް ކުރައްވާފައެވެ.
Below is a statement from the family of @Madeleine: pic.twitter.com/C7Xt0EN5c9
— Madeleine Albright (@madeleine) March 23, 2022
މެޑަލިން އަލްބްރައިޓް ނިޔާވުމާއި ގުޅުގެން އެމެރިކާގެ ރައީސް ޖޯ ބައިޑްން ވަނީ ޚާއްސަ ބަޔާނެއް ނެރުއްވާފައެވެ. މި ބަޔާނުގައި ބައިޑްންވަނީ، އަލްބްރައިޓަށް ވަރަށް ބޮޑަށް ތައުރީފް ކުރައްވާ، އެކަމަނާއަކި ވަރުގަދަ "ބާރެއް"ކަމަށް ވިދާޅުވެފައެވެ. އަދި 1990ގެ އަހަރުތަކުގައި ބައިޑްން އެމެރިކާގެ ސެނެޓްގެ ފޮރިންގ ރިލޭޝަން ކޮމިޓީގައި މަސައްކަތް ކުރެއްވިއިރު، އަލްބްރައިޓްއާއެކީ މަސައްކަތް ކުރެއްވުމުގެ ފުރުސަތު ލިބިވަޑައިގެންނެވިކަމަށް ވިދާޅުވަމުން، ބައިޑްން ވިދާޅުވެފައިވަނީ އެއީ އޭނާގެ ގައުމީ ޚިދުމަތުގައި އެންމެ ފާހަގަ ކޮށްލެވޭ މަސައްކަތްތައް ކަމުގައެވެ.
