ރިސޯޓެއް ތަރައްގީ ކުރުމަށް ތ.އަތޮޅުގައި އޮންނަ ފަޅު ރަށެއް ކަމަށްވާ ކަނިމީދޫ ބީލަމަށް ހުށަހެޅި ނަމަވެސް އެއްވެސް ޕްރޮޕޯސަލްއެއް ލިބިފައި ނުވާކަމަށް ޓުވަރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މައުސޫމް މިހެން ވިދާޅުވީ ކަނިމީދޫގައި ރިސޯޓް ތަރައްޤީ ކުރުމަށް އެއްވެސް ފަރާތަކުން ޝައުޤުވެރިކަން ފާޅުކުރައްވާފައިވޭތޯ ސާފު ކުރެއްވުމަށް ލިޔުމުން ހުށަހެޅި ޖަވާބު ދެއްވަމުންނެވެ.
މިނިސްޓަރ މައުސޫމް ވިދާޅުވ ތ.ކަނިމީދޫ ތަރައްޤީ ކުރުމަށް ބީލަމުގެ އުސޫލުން 8 އޭޕްރީލް 2021 ގައި ހުޅުވާލެވުނު ކަމަށެވެ. ނަމަވެސް 24 ޖޫން 2021 ގައި ބީލަން ހުށަހެޅުމުގެ ސުންގަޑި ހަމަވިއިރު ކަނިމީދޫގެ 10 ހެކްޓަރުގެ ބިމަށް އެއްވެސް ފަރާތަކުން ބިޑް ޕްރޮޕޯސަލްއެއް ހުށަހަޅާފައި ނުވާކަމަށް މިނިސްޓަރ މައުސޫމް ވިދާޅުވިއެވެ.
ކަނިމީދޫ އަކީ މީގެ ކުރިން މަސްވެރިކަމާއި ދަނޑުވެރިކަމުގެ މަސައްކަތް ކުރުމަށް ދިގު މުއްތަކަށް އަމިއްލަ ފަރާތަކަށް ދޫކުރި ރަށެކެވެ.
