އެމެރިކާ އާއި އިޒްރޭލުން ގުޅިގެން ހިންގި އަސްކަރީ އޮޕަރޭޝަނެއްގައި އީރާނުގެ ރޫހީ ލީޑަރު އާޔަތުﷲ އަލީ ހާމަނާއީ އަވަހާރަކޮށްލުމާ ގުޅިގެން، ކުރީގެ ރައީސް މައުމޫން އަބްދުލްގައްޔޫމް އެކަން ހަރުކަށި އިބާރާތުން ކުށްވެރި ކުރައްވައިފި އެވެ.
ރައީސް މައުމޫން "އެކްސް" ގައި ކުރެއްވި ޕޯސްޓެއްގައި ވިދާޅުވީ، އިހުލާސްތެރި މުސްލިމެއްގެ ހައިސިއްޔަތުން އީރާނުގެ އެންމެ އިސް ވެރިޔާ އަވަހާރަކޮށްލި ކޮށްލުން ކުށްވެރިކުރައްވާ ކަމަށެވެ. އަދި މާތްﷲ އެމަނިކުފާނުގެ ފުރާނަފުޅަށް ހެޔޮ ރަހުމަތް ލައްވައި، މި ހިތާމަވެރި ދަނޑިވަޅުގައި އާއިލާއަށާއި އީރާނުގެ ރައްޔިތުންނަށް ކެތްތެރިކަން ދެއްވުން އެދި ދުއާކުރައްވާފައިވެއެވެ.
އުމުރުފުޅުން 86 އަހަރުގެ ހާމަނާއީ އަވަހާރަވީ، ހޮނިހިރު ދުވަހު އެމެރިކާ އާއި އިޒްރޭލު ގުޅިގެން އީރާނަށް ދިން ވަރުގަދަ ވައިގެ ހަމަލާތަކެއްގައި އެމަނިކުފާނުގެ އޮފީހަށް ބޮން އެޅުމުގެ ސަބަބުންނެވެ. މި ހަމަލާގައި ލިބުނު ޒަހަމްތަކަށް ފަރުވާ ހޯއްދަވަމުން ގެންދަވަަނިކޮށް ހާމަނާއީގެ އަނބިކަނބަލުން ވެސް ވަނީ އަވަހާރަވެފަ އެވެ. މީގެ އިތުރުން ހާމަނާއީގެ 14 މަހުގެ ތުއްޕުޅު ކާފަދަރިކަލުންނާއި އާއިލާގެ އިތުރު މެމްބަރުންތަކެއް ވެސް މި ހަމަލާގައި އަވަހާރަވެފައިވާކަން ފާހަގަކޮށްލެވެއެވެ.
ހާމަނާއީ އަވަހާރަކޮށްލުމާ ގުޅިގެން މަސްރަހު ހޫނުވެ، އީރާނުން މިހާރު ގެންދަނީ އޭގެ ރައްދުގައި އިޒްރޭލަށާއި މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާތައް ދެމުންނެވެ.
ކޮމެންޓު ފޮނުވާ