އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލާފައިވަނީ އެމެރިކާއާއި އިޒްރޭލުގެ ޖާސޫސީ އިދާރާތަކުން އެތައް މަހެއް ވަންދެން ކުރި ފާރަލުންތަކަކަށްފަހުކަމަށް މި ހަމަލާގެ މައުލޫމާތު އެނގިހުރި ބައެއް ފަރާތްތަކާއި ހަވާލާދީ ބޭރުގެ ބައެއް މީޑިއާތަކުން ރިޕޯޓު ކޮށްފިއެވެ. އެ ގޮތުން މި ހަމަލާއާއި ގުޅޭގޮތުން ސީއެންއެންއިން އާންމުކުރި ރިޕޯޓެއްގައިވާ ގޮތުން މި ހަމަލާއަކީ ޚާމަނާއީގެ ހަރަކާތްތަކާއި ދިރިއުޅުއްވުމުގެ އާދަތައް ވަރަށް ގާތުން ބަލައި، ދުރާލާ ރާވައިގެން ހިންގި އޮޕަރޭޝަނެކެވެ.
މި އޮޕަރޭޝަން ކާމިޔާބު ކުރުމަށްޓަކައި ޖާސޫސީ އިދާރާތަކުން ވަނީ ޚާމަނާއީ ބައްދަލުކުރައްވާ ފަރާތްތަކާއި، މުއާސަލާތީ ވަސީލަތްތަކުގެ އިތުރުން ނުރައްކާތެރި ހާލަތްތަކުގައި ބޭނުންކުރައްވާ ތަންތަން ދެނެގަނެފައެވެ. ހަމަލާ ދިނުމަށް އެންމެ އެކަށީގެންވާ ފުރުސަތު ލިބުނީ، ތެހެރާންގައި ހުންނަ ރިޔާސީ ގަނޑުވަރާއި ސަލާމަތީ އިދާރާތައް ހިމެނޭ ސަރަހައްދުގައި، އީރާނުގެ އެންމެ އިސްވެރިންގެ ބައްދަލުވުމެއް ހޮނިހިރު ދުވަހު އޮންނާނެކަން ޔަގީންވުމުންނެވެ. އާންމުކޮށް ސަލާމަތީ ކަންކަން ވަރުގަދަކުރައްވާ ޚާމަނާއީ، ދުވާލުގެ ވަގުތު ނުރައްކާ ކުޑަވާނެކަމަށް ބަލައި ސަލާމަތީ ފިޔަވަޅުތަކަށް ލުޔެއް ދެއްވުމަކީ ހަމަލާ ދިނުމަށް ލިބުނު ރަނގަޅު ފުރުސަތެއް ކަމަށް އެމެރިކާއާއި އިޒްރޭލުގެ އޮފިޝަލުން ދެކުނެވެ.
"އޮޕަރޭޝަން ރޯރިންގ ލަޔަން" ގެ ނަން ދީފައިވާ މި ހަމަލާ ފެށީ ހޮނިހިރު ދުވަހުގެ ފަތިހުއެވެ. އިޒްރޭލު ގަޑިން ހެނދުނު ހައެއް ޖަހާކަންހާއިރު، ވައިގެ ސިފައިންގެ ޕައިލެޓުންނަށް ހަމަލާ ދިނުމުގެ ހުއްދަ ލިބުމާއެކު، ފައިޓަރު ޖެޓުތަކާއި ދުރު ރާސްތާގެ ޒަމާނީ މިސައިލް ބޭނުންކޮށްގެން އީރާނުގެ ވެރިން ތިއްބެވި ތިން ތަނަކަށް އެއްފަހަރާ ހަމަލާދިނެވެ. ކުރިން ރޭގަނޑު ދޭން ރޭވި މި ހަމަލާ ދުވާލުގެ ވަގުތަށް ބަދަލުކުރީ ލިބުނު ޖާސޫސީ މައުލޫމާތުގެ އަލީގައެވެ.
މި ހަމަލާއަށްފަހު، އެމެރިކާގެ ރައީސް ޑޮނަލްޑް ޓްރަމްޕް ވަނީ ޚާމަނާއީ އަވަހާރަވެފައިވާކަން އޭނާގެ 'ޓްރުތު ސޯޝަލް' މީޑިއާގައި ކަށަވަރުކޮށްދެއްވާފައެވެ. ޓްރަމްޕް ވިދާޅުވި ގޮތުގައި އެމެރިކާއާއި އިޒްރޭލުގެ ވަރުގަދަ ޖާސޫސީ ލޮލުން ސަލާމަތްވުމުގެ ފުރުސަތު އީރާނުގެ ވެރިންނަކަށް ނުލިބުނެވެ. މި ހަމަލާގައި ޚާމަނާއީގެ އިތުރުން އީރާނުގެ ޑިފެންސް މިނިސްޓަރާއި، އަސްކަރީ ކައުންސިލްގެ ވެރިޔާ އަދި ރިވޮލިއުޝަނަރީ ގާޑްސްގެ އިސް ކޮމާންޑަރުން ވެސް އަވަހާރަވިއެވެ. ނަމަވެސް މި ހުރިހާ އިސްވެރިން އެއް ވަގުތެއްގައި އެއްތަނަކަށް ޖަމާވީ ކޮން ސަބަބަކާ ހުރެކަން އަދި ސާފުނުވާކަމަށް ރިޕޯޓުތައް ބުނެއެވެ.
މިއީ ކުއްލިއަކަށް ހިނގި ކަމެއް ނޫން ކަމަށާއި، މިއީ ހަފުތާތަކެއް ކުރިން ރާވައި، އެމެރިކާއިން މެދުއިރުމައްޗަށް އިތުރު އަސްކަރީ ބާރުތައް ޖަމާކޮށްގެން ހިންގި އޮޕަރޭޝަނެކެވެ. ބޮޑުވަޒީރު ނަތަންޔާހޫއާއި ޓްރަމްޕް ބޭއްވި ބައްދަލުވުންތަކުގައި މިކަމަށް މަޝްވަރާކުރެވި، ޚާއްސަކޮށް އީރާނުގެ މިސައިލް ސައިޓްތަކަށް އަމާޒުކުރުމަށް ޓްރަމްޕް ރުހުން ދެއްވިކަމަށް މައުލޫމާތު ލިބެއެވެ. މި އޮޕަރޭޝަނުން އީރާނުގެ އެތެރޭގައި ހުޅަނގުގެ ޖާސޫސީ ނެޓްވޯކް ފެތުރިފައިވާ މިންވަރު ހާމަވެގެން ގޮސްފައިވާކަމަށް އަސްކަރީ މުހައްލިލުން ދެކެއެވެ.
ކޮމެންޓު ފޮނުވާ