އީރާނަށް ހަމަލާދިނުމަށް ޑިއެގޯ ގާސިއާގައި ހުންނަ އަސްކަރީ މަރުކަޒު ބޭނުންކުރުމުގެ ހުއްދަ ދިނުމަށް އިނގިރޭސި ބޮޑުވަޒީރު ކީއާ ސްޓާމާ ލަސްކުރެއްވުމުން، އެމެރިކާގެ ރައީސް ޑޮނަލްޑް ޓްރަމްޕް އެކަމަށް ވަރަށް ބޮޑަށް ފާޑުވިދާޅުވެއްޖެއެވެ.
އީރާނަށް ހަމަލާދިނުމަށް އެމެރިކާއާއި އިނގިރޭސިވިލާތް ގުޅިގެން ހިންގާ ޑިއެގޯ ގާސިއާ ބޭސް ބޭނުންކުރުމަށް ފުރަތަމަ ދެކޮޅު ހެއްދެވުމަށްފަހު، އެ ނިންމެވުން ބަދަލުކުރެއްވުމަށް އިނގިރޭސި ބޮޑުވަޒީރު ކީއާ ސްޓާމާ "މާ ގިނަ ވަގުތު" ނެގިކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވެއެވެ.
އާދީއްތަ ދުވަހުގެ ރޭ ސްޓާމާ އިއުލާނު ކުރެއްވި ގޮތުގައި، އިނގިރޭސި ބޭސްތަކުން އީރާނާ ދެކޮޅަށް ހަރަކާތްތެރިވުމުގެ ފުރުސަތު އެމެރިކާ ސިފައިންނަށް ދެވޭނެއެވެ. ނަމަވެސް އެ ހުއްދަ ދީފައިވަނީ ހަމައެކަނި މިސައިލް ސައިޓްތަކަށް އަމާޒުކޮށް ހަމަލާދިނުމަށް، ވަކި މިންގަނޑެއްގެ ތެރެއިންނެވެ.
ޑެއިލީ ޓެލެގްރާފް ނޫހަށް ދެއްވި އިންޓަވިއުއެއްގައި ޓްރަމްޕް ވަނީ ޗާގޯސް އައިލެންޑްސްގައި އޮންނަ ޑިއެގޯ ގާސިއާއާ ގުޅޭގޮތުން ހުރި ކަންބޮޑުވުންތައް ފާހަގަކުރައްވާފައެވެ.
ޓްރަމްޕް ވިދާޅުވީ "މިއީ މީގެ ކުރިން ދެ ގައުމުގެ ދެމެދުގައި ހިނގާފައިވާ ކަމެއްހެން ހީނުވާ" ކަމަށާއި، "ބެލެވޭ ގޮތުގައި އޭނާ (ސްޓާމާ) ކަންބޮޑުވެވަޑައިގަތީ ގާނޫނީ ގޮތުން ދިމާވެދާނެ މައްސަލަތަކާ މެދު" ކަމަށެވެ.
ކޮމެންޓު ފޮނުވާ