ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފައިސާއިން އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް ޕެންޓްހައުސްއެއް ގަތް މައްސަލައިގައި، އަމިން ކޮންސްޓްރަކްޝަންގެ މައްޗަށް ކުށް ސާބިތުނުވާކަމަށް ނިންމި ނިންމުން ޕްރޮސެކިއުޓަރ ޖެނެރަލް (ޕީޖީ) ގެ އޮފީހުން ދިވެހިރާއްޖޭގެ ހައިކޯޓުގައި އިސްތިއުނާފު ކޮށްފިއެވެ.
އެފްއޭއެމްގެ ފައިސާ ބޭނުންކޮށްގެން ބައްސާމް، އަމިން އެވެނިއުއިން ދެ އެޕާޓްމެންޓް ގަތް މުއާމަލާތުގައި އަމީން ކޮންސްޓްރަކްޝަން ކުންފުނިން އޮޅުވާލައި މަނީ ލޯންޑްރިންއަށް އެހީތެރިވެދީފައިވާ ކަމަށް ބުނެ ދައުލަތުން ދައުވާކުރިއެވެ. ނަމަވެސް، މިދިޔަ ޖަނަވަރީ މަހު ކްރިމިނަލް ކޯޓުން ހުކުމްކުރީ އެ ކުންފުނީގެ މައްޗަށް އެ ކުށް ސާބިތުނުވާ ކަމަށެވެ. މި ނިންމުމާ މެދު ހިތްހަމަނުޖެހިގެން ޕީޖީ އޮފީހުން މިއަދު ވަނީ މައްސަލަ ހައިކޯޓަށް ހުށަހަޅާފައެވެ.
މި މައްސަލަ އިސްތިއުނާފުކުރަން ނިންމި ސަބަބެއްކަމަށް ޕީޖީ އޮފީހުން ބުނެފައިވަނީ، ދަށު ކޯޓުގައި މައްސަލަ ސާބިތުކުރުމަށް ދައުލަތުން ހުށަހެޅި ގިނަ ހެކިންގެ ހެކިބަސް ނުނެގުމަށް ކޯޓުން ނިންމާފައިވުމެވެ. އަދި މައްސަލައިގެ ހެކި ޤަރީނާ ވަޒަންކޮށްފައިވަނީ ޝަރުއީ އަދި ޤާނޫނީ އުސޫލުތަކާ ޚިލާފަށްކަމަށް ފެންނާތީ ކަމަށްވެސް އެ އޮފީހުން ފާހަގަކުރެއެވެ.
އިސްތިއުނާފީ މައްސަލައިގެ އިތުރުން، މަނީ ލޯންޑްރިންގެ ތުހުމަތުކުރެވޭ އަމީން އެވެނިއުގެ އެޕާޓްމަންޓުން އެއްވެސް މުއާމަލާތެއް ކުރުން ހުއްޓުވުމުގެ އަމުރެއް ނެރެދިނުމަށް ވެސް ދައުލަތުން ވަނީ ހައިކޯޓުގައި އެދިފައެވެ. ފާހަގަކޮށްލެވޭ ގޮތުގައި މި މައްސަލައިގައި ބައްސާމްގެ މައްޗަށް ކުށް ސާބިތުވެފައިވާއިރު، އޭނާގެ ފަރާތުންވެސް ވަނީ އެ މައްސަލަ އިސްތިއުނާފުކޮށްފައެވެ.
ކޮމެންޓު ފޮނުވާ