އައްޑޫ ސިޓީގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި ހައްޔަރުކޮށް، ގިނަ ދުވަސްތަކެއް ވަންދެން ބަންދުކޮށްފައި ތިބި ބަޔަކު، އެމީހުންގެ މައްޗަށް ކުށް ސާބިތުކުރެވޭ ވަރަށް ހެކި ނެތުމުން ބަންދުން ދޫކޮށްލަން ޕްރޮސެކިއުޓާ ޖެނެރަލް (ޕީޖީ) ގެ އޮފީހުން ލަފާދީފިއެވެ.
މި މައްސަލައިގައި ތުހުމަތުކުރެވޭ ފަރާތްތައް ހައްޔަރުކޮށްފައިވަނީ، އައްޑޫގައި މަސްތުވާތަކެތީގެ ވިޔަފާރި ހިންގާ ބޮޑުން ހޯދުމަށް ސަރުކާރުން "އޮޕަރޭޝަން އަލިމަގު" ގެ ނަމުގައި މިދިޔަ ޑިސެންބަރު މަހުގެ 4 ވަނަ ދުވަހު ހިންގި ޚާއްސަ ހަރަކާތެއްގައެވެ. މި އޮޕަރޭޝަނުގައި ޖުމްލަ 7 މީހަކު ހައްޔަރުކުރިއިރު، އޭގެ ތެރޭގައި އެ ސިޓީގައި މަސްތުވާތަކެތީގެ ވިޔަފާރީގައި އިސްކޮށް އުޅޭކަމަށް ތުހުމަތުކުރެވޭ ފަރާތްތައް ހިމެނެއެވެ.
ޕީޖީ އޮފީހުން ހާމަކޮށްފައިވާ ގޮތުގައި، މި މައްސަލައިގެ ތަހުގީގަށް ގާނޫނުން ކަނޑައަޅާފައިވާ މުއްދަތު ހަމަވިއިރު، ތުހުމަތުކުރެވޭ ފަރާތްތަކާ ދެކޮޅަށް އެކަށީގެންވާ ހެކި ހޯދިފައެއް ނުވެއެވެ. އެމީހުންގެ މައްޗަށް ތުހުމަތުކޮށްފައިވަނީ ކުށްކުރާ ޖަމާއަތެއްގައި ބައިވެރިވުމާއި މަނީ ލޯންޑްރިންގެ ކުށެވެ. ނަމަވެސް މައްސަލައިގެ މުއްދަތުގައި ލިބިފައިވާ ހެކިތައް ވަޒަންކުރިއިރު، ގާނޫނީ މިންގަނޑުން ޝަރީއަތަށް ސާބިތުކޮށްދެވޭ މިންވަރަށް ހެކި ލިބިފައިނުވާތީ، ބަންދުގައި ތިބި މީހުން ދޫކޮށްލަން ވަނީ ނިންމާފައެވެ.
ހެކި ނެތުމުގެ ސަބަބުން ދޫކޮށްލަން ލަފާދީފައިވާ މީހުންގެ ތެރޭގައި ހިމެނެނީ ސ. ހިތަދޫ، ކޮންމުލި، ޢަލީ ނަދީމް (މައިލޯ ނަދަމާ) އާއި، ވެޔޮފެހެބުރުގެ، އިބްރާހީމް ސިރާޖާއި، ދޮރުފޮތިމާގެ، ހަސަން އަލްފާފުގެ އިތުރުން ކެކުރިމާގެ، އަމީން މުހައްމަދެވެ. މީގެ އިތުރުން ހިތަދޫ ލޮބްސްޓަމް، ސަލާމް ސައީދާއި، ފަލާހް، ހާފިޘް ފައުޒީ އަދި ދ. ހުޅުދެލި، އަންބަރީގެ، ޒަހްނާ އަހްމަދު ވެސް މި ލިސްޓުގައި ހިމެނެއެވެ.
ކޮމެންޓު ފޮނުވާ