އެމެރިކާއާއި އިސްރާއީލުން އިސްވެ އީރާނަށް ދިން ވަރުގަދަ ވައިގެ ހަމަލާތަކާ ގުޅިގެން މެދުއިރުމަތީގެ ވައިގެ ދަތުރުފަތުރަށް ބުރޫއަރައި، އޮޕަރޭޝަންތައް ހުއްޓާލާފައި އޮތް އެމިރޭޓްސް އާއި ފްލައިދުބާއީން މިއަދު އަލުން ދަތުރުތައް ފަށައިފި އެވެ.
މިދިޔަ ހޮނިހިރު ދުވަހު އީރާނަށް އަމާޒުކޮށް ދިން ހަމަލާތަކުގެ ރައްދުގައި، އެ ސަރަހައްދުގައި ހުންނަ އެމެރިކާގެ އަސްކަރީ މަރުކަޒުތަކަށް އީރާނުން ވަނީ ހަމަލާދޭން ފަށާފަ އެވެ. މީގެ ތެރޭގައި ގަތަރު، ކުވެއިތު، އޮމާން، ޔޫއޭއީ އަދި އުރުދުން ފަދަ ގައުމުތައް ހިމެނޭއިރު، މި ނުރައްކާތެރި ހާލަތާ ގުޅިގެން ރާއްޖެއަށް ދަތުރުކުރާ މައިގަނޑު އެއާލައިންތައް ކަމަށްވާ ގަތަރު އެއާވޭސް، އިއްތިހާދު އަދި ކުވައިތު އެއާވޭސް ފަދަ އެއާލައިންތަކުން ވެސް ވަނީ ދަތުރުތައް މެދުކަނޑާލާފަ އެވެ. މިއާ އެކު ރާއްޖޭގައި ތިބި ގިނަ އަދަދެއްގެ ފަތުރުވެރިންނަށް ފުރޭނެ ގޮތެއް ނެތި ވަނީ ތާށިވެފަ އެވެ.
ނަމަވެސް، ދުބާއީ އެއާޕޯޓްސް އިން ނެރުނު ބަޔާނެއްގައި ބުނެފައި ވަނީ ދުބާއީ އިންޓަނޭޝަނަލް އެއާޕޯޓް (ޑީއެކްސްބީ) އާއި އަލް މަޚްތޫމް އިންޓަނޭޝަނަލް އެއާޕޯޓް (ޑީޑަބްލިއުސީ) އިން ލިމިޓެޑް އުސޫލަކުން އަލުން ފްލައިޓްތައް އޮޕަރޭޓް ކުރަން ނިންމާފައިވާ ކަމަށެވެ. ފްލައިދުބާއީން ވެސް ވަނީ ފަސިންޖަރުންގެ ސަލާމަތާއި ރައްކާތެރިކަމަށް އެންމެ އިސްކަންދީގެން، ކަމާބެހޭ އިދާރާތަކާ ގުޅިގެން ދަތުރުތައް ފެށުމަށް މަސައްކަތް ކުރަމުންދާކަން ހާމަކޮށްފަ އެވެ.
ދަތުރުތައް އަލުން ފެށި ނަމަވެސް، ޝެޑިއުލްތަކަށް ބަދަލު އައިސްފައިވުމާ އެކު، ފްލައިޓް އޮތްކަން ޔަގީންކޮށްފައި ނޫނީ އެއާޕޯޓަށް ނުދިއުމަށް އެއާލައިންތަކުން އިލްތިމާސްކުރެ އެވެ. ފްލައިޓްރޭޑާގެ ތަފާސްހިސާބުތައް ދައްކާ ގޮތުން މި ހަމަނުޖެހުންތައް ފެށުނު ފަހުން މެދުއިރުމަތީގެ ސަރަހައްދުން ދުވާލަކު 4،000 އަށް ވުރެ ގިނަ ފްލައިޓް ވަނީ ކެންސަލްކޮށްފަ އެވެ.
ކޮމެންޓު ފޮނުވާ