ރާއްޖޭގެ ރައްތަކުގައި ދިމާވެފައިވާ ބޯހިޔާވަހިކަމުގެ މައްސަލައަށް ހަލު ހޯދުމަށް ރަށްތައް ހިއްކުމުގެ ބަދަލުގައި، އެއްރަށް އަނެއްރަށާއި ގުޅާލުން މާބުއްދިވެރި ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ކުރެންދޫ ދާއިރާގެ ބައި އިލެކްޝަންގައި އެމްޑީޕީގެ ކެނޑިޑޭޓަށް ތާއީދު ހޯދުމަށް ރޭ ބޭއްވި ޖަލްސާގައި ވާހަކަ ދައްކަވަމުންނެވެ. ނަޝީދު ވިދާޅުވީ ކުރެންދޫއަކީ ބޯހިޔާވަހިކަމުގެ މައްސަލަ ބޮޑު ރަށެއްކަމަށެވެ. މިކަމަށްވެސް ހައްލެއް އަންނަންޖެހޭކަމަށް ވިދާޅުވެ ނަޝީދުވަނީ އެސަރަހައްދުގެ ރައްތައް ގުޅާލައިގެން މިކަމުގެ ހައްލު ހޯދުމުގެ ވާހަކަތަޖެއް ދައްކަވާފައެވެ.
ރައީސް ނަޝީދު ވިދާޅުވީ ޅ.އަތޮޅު ނައިފަރު، ހިންވަރު، ފެލިވަރުން ކުރެންދޫ ރައްޔިތުންނަށް ގޯތި ލިބެންޖެހޭނެ ކަމަށެވެ. އަދި މިކަމުގައި އޮތް އެންމެ ބޮޑު ހައްލަކީ ނައިފަރާއި، ހިންނަވަރު ގުޅާލުންކަމަށާއި، ހިކިފަސް އޮތްތަނެއްގައި މީހުންނަށް އާބާދުކުރެވޭނެ ގޮތެއް ހޯދުމަކީ މިއަދު ކުރަންޖެހިފައިވާ ކަމެއްކަމަށެވެ. އެކަން ކުރުމަށް އޮތް ހައްލަކީ ރަށްތައް ނުހިއްކައި ގުޅާލުންކަމަށް ނަޝީދު ވިދާޅުވިއެވެ.
މިއީ މިސަރަހައްދުން ނޫނެކޭ ބުނާނެ ޕްލޭނެއް ނޫން. ހިންނަވާރައި ނަފަރާއި ގުޅާލެވިއްޖެނަމަ ރާއްޖޭގެ ތަރައްގީއަށް ބޮދެތި ބަދަލު އަންނާނެ. ރަށް ހިއްކުމަށްވުރެ ރަށްތައް ގުޅާލުން މާ ބުއްދިވެރި.
– ނަޝީދު ވިދާޅުވިއެވެ.
ނަޝީދު ވިދާޅުވީ ޕީޕީއެމްއަކީ ލާމަރުކަޒީ އުސޫލާއި އިދިކޮޅު ބައެއް ކަމަށެވެ. ލާމަރުކަޒީ ނިޒާމާއި ދެކޮޅު ބަޔަކު ކައުންސިލް އިންތިޚާބުތަކުގައި ވާދަކުރާތީ އަޖައިބުވާކަމަށްވެސް ނަޝީދު ވިދާޅުވިއެވެ.
ނަޝީދު ވިދާޅުވީ މިސަރުކާރުން ރާއްޖޭގެ އެތައް ރަށަކަށް އެތައް ރައްޔިތަކަށް ބޮޑެތި ތަރައްޤީގެ ކަންކަން ގެނެސްދީފައިވާކަމަށެވެ. އެގޮތުން އެންމެ ކުޑަ އުޖޫރައާއިއެކު އެތައް މަސައްކަތްތެރިންގެ ހައްގު ވަނީ ހޯދައިދެވިފައި ކަމަށާއި، ކުރެންދޫގެ އެތައް ބަޔަކަށް މިކަމުން މަންފާ އިތުރުވެެފައިވާކަމަށެވެ. އަދި ކުރެންދޫ އެތައް ކުދިންނަށް މަތީ ތައުލީމުގެ ފުރުސަތު ވަނީ ތަނަވަސް ކުރެވި، ހިލޭ ޑިގްރީއަށް ކިޔަންވަން ފެށިފައިކަމަށެވެ. މިއީ މިސަރުކާރުން ރައްޔިތުންނަށް ހޯދައިދިން ތަރައްޤީކަމަށް ނަޝީދު ވިދާޅުވިއެވެ.
މިރޭގެ ޖަލްސާގައި ރައީސް ނަޝީދު ކުރެންދޫގައި ހުރި މައްސަލަތަކަށް ހައްލު ހޯދައި ދެއްވާނެ ގޮތެއް، އަދި ރައްޔިތުންގެ ކަންބޮޑުވުން ހުރި މައްސަލަތަކަށް ހައްލު ހޯދުމަށް ސަރުކާރުތެރެެއިން ކުރެވިދާނެ ކަންކަމަށް ވާހަކަ ދެއްކުމަށްވުރެއް ބޮޑަށް އަލި އަޅުވާލީ ދުރު ރާސްތާ ޕްލޭނެއްގައި ކުރެވިދާނެ މަސައްކަތްތަކާއި ގުޅޭގޮތުންނެވެ. އެގޮތުން ފްލޯޓިން އައިލެންޑް ތަރައްޤީ ކުރުމާއި، ރަށްތައް ގުޅާލުންފަދަ ބޮޑެތި ތަރައްޤީގެ މަޝްރޫޢުތަކުގެ ވާހަކަތައް ނަޝީދު ވަނީ މިޖަލްސާގައި ރައްޔިތުންނާއި ހަމައަށް ހިއްސާ ކުރައްވާފައެވެ.
މިޖަލްސާގައި ކުރެންދޫގައި ހުރި މައްސަކަތައް ހައްލު ހޯދުމަށް ސަރުކާރުން ގެންގުޅުއްވާ އެއްވެސް ވިސްނުމެއް ރައްޔިތުންނާއި ވާހަކަ ދެއްކެވި އެއްވެސް ބޭފުޅަކު ހިއްސާ ކުރައްވާފައި ނުވެއެވެ.
