ކޯލިޝަން ސަރުކާރެއްގައި އެކުލަވާލެވޭ ވަޒީރުންގެ މަޖިލީހުގެ މެންބަރުން ކަންޑައެޅުމުގެ ޝަރުތުތަކެއް ޤާނޫނު އަސާސީގައި ބަޔާންކުރުން މުހިންމުކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ މުޅި ރާއްޖޭގެ ފަރާތުން ވަކާލާތު ކުރުން ނަމުގައި އިއްޔެ އާންމު ކުރި ލިޔުއްވުމުގައެވެ.
ރައީސް ނަޝީދުގެ ވިދާޅުވީ، އިއްތިހާދު އަކީ ރާއްޖޭގެ ޤާނޫނުއަސާސީ ދަންނަކަމެއް ނޫންކަމަށާއި، އެއް ގޮތަކަށްވެސް ބަޔާންކޮށްފައިވާ ކަމެއްވެސް ނޫންކަމަށެވެ. އެހެންނަމަވެސް މިހާރު އަމަލުކުރާ ޤާނޫނުއަސާސީގެ ދަށުން އުފެދުނު ތިން ވެރިކަންވެސް ހިންގާފައިވަނީ ރައީސުލްޖުމްހޫރިއްޔާ އާއި "އޭނާގެ" ވަޒީރުންގެ މަޖިލީހަކުން ނޫންކަމަށާއި، ވެރިކަންތައް ހިންގާފައިވަނީ ރައީސުލްޖުމްހޫރިއްޔާ އާއި އޭނާއަށް ތާއިދު ކުރާ ޕާޓީތަކެއްގެ މެންބަރުންގެ މައްޗައްއެކުލެވިގެންވާ ވަޒީރުންގެ މަޖިލީހަކުންކަމަށް ރައީސް ނަޝީދު ވިދާޅުވިއެވެ.
ނަޝީދު ވިދާޅުވީ އިއްތިހާދު މެދުވެރިކޮށް ކާމިޔާބު ކުރާ ރިޔާސީ އިންތިހާބަށް ފަހުގައި، އެކުލަވާލެވޭ ވަޒީރުންގެ މަޖިލީހުގެ މެންބަރުން ކަންޑައެޅުމުގެ ޝަރުތުތަކެއް ޤާނޫނު އަސާސީއަށް އިތުރުކުރުން ބޭނުންތެރި ކަމަށެވެ. އެ ޕާޓީއަކުން މަޖިލީހުގައި ތަމްސީލްވާ މިންވަރާއި އަދި ކައުންސިލްތަކުގައި ތަމްސީލްވާ މިންވަރު އެއީ ޕާޓީތަކަށް ތާއިދު އޮތް މިންވަރު އަންގުވާދޭ ތަރާދުތަކެއްކަމަށެވެ.
އެކުލަވާލެވޭ އިއްތިހާދު ސަރުކާރުގައި ވަޒީރުން ނާއި އަދި އެހެނިހެން ސިޔާސީ މަޤާމްތަކަށް މީހުން ކަޑައެޅުމުގެ ހެޔޮ ގޮތަކީ އެ ޕާޓީއަކަށް ރައްޔިތުންގެ ތާއިދު އޮތް މިވަރެއްގެ މައްޗަށްބިނާކޮށް، ޕާޓީ ތަކަށް ޖާގަ ދިނުންކަމަށް ނަޝީދު ވިދާޅުވިއެވެ.
ރައީސް ނަޝީދު މިހެން ވިދާޅުވެފައިވާއިރު، އެމްޑީޕީ ހިމެނޭހެން ބޮޑު ކޯލިޗަނަކާއެކު މިސަރުކާރު ގެނައުމަށްފަހު، ރައީސް ނަޝީދާއި އެމްޑީޕިއަށް ނިސްބަތްވެވަޑައިގަންނަވާ ބައެއް ފަރާތްތަކުން ގެންދަވަނީ ކޯލިޝަނަށް ފާޑުވިދާޅުވަމުންނެވެ.
އެމްޑީޕީއަށް ނިސްބަތްވެވަޑައިގަންނަވާ ބައެއް މަޖިލިސް މެންބަރުން ވިދާޅުވާގޮތުގައި ކޯލިޝަން ސަރުކާރުގެ ސަބަބުން ރާއްޖޭގެ ރައްޔިތުން އުއްމީދުކުރި ފުރިހަމަ ހެޔޮބަދަލު ފެނިގެން ނުދެއެވެ.
ކޯލިޝަންގެ ޕްލެޓް ފޯމެއްގައި ވެރިކަމަށް ވަޑައިގެންނެވި، ރައީސް އިބުރާހިމް މުހައްމަދު ސޯލިހުގެ ވެރިކަން މިހާރު ވަނީ ތިން އަހަރު ވެފައެވެ.
ފާއިތުދިޔަ ތިން އަަހަރުގެ ތެރޭގައިވެސް، ކޯލިޝަންގައި ހިމެނޭ ޕާޓީތަކުގެ އެތަކެއް ވަޒީރުންނެއް މަގާމުން ދުރުކޮށްފައިވެއެވެ. މަގާމުން ދުރުކުރެވުނު ގިނަވަޒީރުން މާގަމުން ދުރުކުރެވިގެން ދިޔައީ، އެވަޒީރުންނަށް ރައްޔިތުންގެ މަޖިލިހުގެ ނުރުހުން އަމާޒު ވެގެންނެވެ. މިގޮތުން ސަރުކާރު ކެބިނެޓުގައި ތިއްބެވި، ޖުމުހޫރީ ޕާޓީއާއި، އަދާލަތު ޕާޓީ އަދި އެމްއާރުއެމްގެ، ވަޒީރުންތަކެއް މަޤާމުން ދުރުކޮށްފައިވެއެވެ.
ކޯލިޝަންގެ އެންމެ ބޮޑު ޕާޓީއެއްގެ ގޮތުގައި އަދިވެސް އޮތް އެމްޑީޕީގެ ލީޑަރޝިޕްގެ އިސް ބޭފުޅުންނާއި އަދި މަޖިލިސް ރައީސް ނަޝީދުގެ ފާޑުކިއުން މެދުކެޑުމެއްނެތި އަދާލަތު ޕާޓީއަށް އަމާޒުވަމުން ދާއިރު، އަދިވެސް އެޕާޓީ އޮތީ ކޯލިޝަންގެ މުހިންމު ޕާޓްނަރެއްގެ ގޮތުގައެވެ.
އެހެންނަމަވެސް، މަޖިލިސް ރައީސް ތުހުމަތު ކުރައްވަމުން ގެންދަވަނީ ރައީސް އިބުރާހިމް މުހައްމަދު ޞާލިހު ހުންނެވީ ހަރުކަށި ފިކުރުގެ މީހުންގެ މެދުގައި ތާށިވެފައިކަމުގައެވެ. އަދި އެއަށްފަހު ވިދާޅުވަމުން ގެންދަވަނީ، އަދާލަތުޕާޓީން ރައީސް އިބުރާހިމް މުހައްމަދު ސޯލިހުގެ ނިންމެވުންތަކަށް ނުފޫޒު ފޯރުވަމުން ގެންދަވާ ކަމަށެވެ.
