މިދިޔަ އަހަރުގެ ފަހުކޮޅު އިތުބާރު ނެތްކަމަށް އެމްޑީޕީގެ ޕީޖީ ގްރޫޕުން ފާސްކުރަން މަސައްކަތް ކުރި އިކޮނޮމިކް މިނިސްޓަރ ފައްޔާޟު އިސްމާއިލަށް އެމްޑީޕީގައި ބޮޑު ތާއީދެއް އޮތްކަން ހާމަކޮށްދީފިއެވެ.
އެމްޑީޕީގެ ޗެއާޕާސަންގެ މަޤާމަށް ވާދައްކުރައްވާ ފައްޔާޟަށް އެމްޑީޕީގައި ތާއީދު އޮތްކަން ހާމަކޮށްދެއްވީ ޗެއާޕާސަންގެ އިންތިޚާބު ރޯދަމަހަށް ދިމާވާތީ އިންތިޚާބުު ފަސްކުރުމަށް ފައްޔާޟުގެ ކެމްޕެއިން މެނޭޖަރު ޤައުމީ މަޖިލީހަށް ހުށަހެޅި ހުށަހެޅުން ޤައުމީ މަޖިލީހުގެ ބޮޑު ޣައުލަބިއްޔަތަކުން ފާސްކުރުމުންނެވެ.
ފައްޔާޒުގެ ކެމްޕެއިން މެނޭޖަރު އިބްރާހިމް ވަހީދު (އިބްރޭ) ހުށައެޅުއްވީ 14 މެއި ގައި އިންތިހާބު ބޭއްވުމަށެވެ. އެ ހުށައެޅުމަށް ތާއީދު ކުރެއްވީ ކިނބިދޫ ދާއިރާގެ މެންބަރު މުހައްމަދު ނާޝިޒް އެވެ. މިރޭގެ ގައުމީ މަޖިލީހުގައި 115 މެންބަރުން ބައިވެރިވެވަޑައިގަތެވެ. އިންތިހާބު ފަސްކުރަން ފެންނަ ކަމަށް 100 މެންބަރުން ވޯޓް ދެއްވިއެވެ. ވޯޓް ނުދެއްވާ ތިއްބެވީ 15 މެންބަރުންނެވެ.
މިނިސްޓަރ ފައްޔާޟުގެ އިތުބާރު ނެތްކަމަށް މަޖިލީހަށް ވެއްދުމަށް މިދިޔަ އަހަރު ކުރެވުނު މަސައްކަތުގައި އެންމެ ފުރަތަމަ ސޮއިކުރައްވާފައިވަނީ މަޖިލިސް ރައީސް މުހައްމަދު ނަޝީދެވެ. ނަޝީދު ވަނީ މީގެ ކުރިން ފައްޔާޒަކީ އެމްޑީޕީ ތެރޭގައި "ބްރޯ" ހެދިގެން އުޅުއްވާ ބޭފުޅެއްކަމަށް ވިދާޅުވެ ބަހުގެ ހޫނު ހަމަލާތަކެއްވެސް ދެއްވާފައެވެ.
ފައްޔާޟުވަނީ ރޭގެ ބައްދަލުވުމުގައި އެވާހަކަތަކަށްވެސް ރައްދު ދެއްވާފައެވެ. ފައްޔާޟު ވިދާޅުވީ އޭނާއާ ޓީމު އޮތީ ސަރުކާރާއެކު ގަދަކޮށް ކަމަށެވެ. އަދި އޭނާއަށް ނިސްބަތްކޮށް ނުފޫޒު ފޯރުވަނީ ކަމަށާ އެއީ "ބްރޯ" ކަމަށް ލޭބަލް ކުރެވިދާނެ ކަމަށެވެ. ނަމަވެސް "އަސްލު ބްރޯ" އަކީ ކާކުކަން ރައްޔިތުންނަށް މިއަދު އެނގޭ ކަމަށް ވިދާޅުވިއެވެ.
އަޅުގަނޑުމެން މި ތިބީ ސަރުކާރާއެއްކޮށް ގަދަކޮށް. އަޅުގަނޑުމެންނަށް ބްރޯއޭ ވެސް ކިޔިދާނެ. ނުފޫޒު ފޯރުވަނީއޭ ވެސް ކިޔިދާނެ. ނަމަވެސް ބްރޯއަކީ ކާކުކަން އަސްލު ބްރޯއަކީ ކާކުކަން ދިވެހި ރައްޔިތުންނަށް މިއަދު އެނގޭނެ. އަޅުގަނޑުމެން ކޮންމެހެނެއް ނޫޅެން ތާހިރު ކެމްޕެއިނެކޭ ކިޔައިގެން އެއަކަށް އެއްޗެއް ކިޔާކަށް. އަޅުގަނޑުމެން ވަރަށް ބޮޑަށް ބަލަމުން މި އައީ އެއްޗެއް ނުބުނެ މިކަން ކުރެވޭތޯ.
– ފައްޔާޟު ވިދާޅުވިއެވެ.
ފައްޔާޟަކީ މިސަރުކާރުގެ އެންމެ ނުފޫޒުގަދަ ވަޒީރަށް ވާއިރު، ފައްޔާޟާއި ދެކޮޅަށް ރައީސް ނަޝީދު ނިކުންނެވުމުން އޭނާގެ ދިފާއުގައި ނިކުންނެވީ ސީދާ ރައީސް ޞާލިހުއެވެ. ރައީސުލްޖުމްހޫރިއްޔާ ވިދާޅުވީ މިނިސްޓަރ ފައްޔާޟް އިސްމާއިލްއަކީ މިސަރުކާރުގެ ވައުދުތައް ފުއްދުމުގަޔާއި، ތަންފީޒީ މަރުހަލާގައިވެސް އެންމެބުރަކޮށް މަސައްކަތް ކުރައްވާ އެއްވަޒީރުކަމަށެވެ. އަދި ކޯވިޑް19ގެ ހާލަތުގައިވެސް ދިމާވި މައްސަލަތައް ހައްލުކޮށް ދެއްވުމުގައި މިނިސްޓަރ ފައްޔާޟު ވަރަށްބުރަކޮށް މަސައްކަތް ކުރައްވާފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި ފައްޔާޟަށް އެމަނިކުފާނުގެ ފުރިހަމަ އިތުބާރު އޮތްކަމަށެވެ.
ރޭއެމްޑީޕީގެ ޤައުމީ މަޖިލީހުން ފެނިގެންދިޔަ އަދަދަކީ ރައީސް ނަޝީދާއި، މިނިސްޓަރ ފައްޔާޟާއި ދެމެދު ނެގުނު ވޯޓެއްކަމަށްވެސް ބައެއް ފަރާތްތަކުން ދެކެއެވެ. އަދި މިހާރު މަޖިލިސް ރައީސްގެ މަޤާމުން ނަޝީދު ދުރުކުރަން ބޭނުން ނަމަ އެކަން ކުރުމަކީވެސް އެމްޑީޕީގެ ރައީސް ޞާލިހު ފެކްޝަނަށް އެހާ އުދަގޫ ކަމަކަށް ނުވާނެކަމަށް ގިނަ ބަޔަކު ދެކެއެވެ. އެމްޑީޕީގެ ޗެއާޕާސަން އިންތިޚާބު ފަސްކުރުމަށް ރޭ އެމްޑީޕީގެ ޤައުމީ މަޖިލީހުން ފެނިގެންދިޔަ އަދަދަކީ މިއިންތިޚާބުގެ ނަތީޖާ ފެނިގެންދާނެ ގޮތްކަމަށްވެސް ގިނަ ބަޔަކު ދެކެއެވެ.
