އެމެރިކާގެ މަޝްހޫރު ސޯޝަލް މީޑިއާ އިންފްލުއެންސާ އަދި ޒުވާން މަހުޖަނު، ކައިލީ ޖެނާއަށް އެންމެ މީރު މޭވާއަކީ ކޮބާކަން އެނގޭހެއްޔެވެ؟
23 އަހަރުގެ ވިޔަފާރިވެރިޔާ މީގެކުރިން މީޑިއާއަކަށް ދިން ހާއްސަ އިންޓަވިއުއެއްގައި ވަނީ، އެއްދުވަސް ތެރޭގައި އޭނާގެ ކެއިންބުއިން ހުންނަ ގޮތް ކިޔައިދީފައެވެ.
އެގޮތުން އޭނާއަކީ މޭވާއާއި ތަރުކާރީއަށް ވަރަށް ލޯބިކުރާ މީހެއްކަން އެ އިންޓަވިއުއިން އެނގިގެންދެއެވެ. ކައިލީ ނިދާ ހޭލާގޮތަށް އެންމެފުރަތަމަ ބޮނީ އަމިއްލައަށް ތައްޔާރުކުރާ ދުޅަހެޔޮ ޖޫހެއް ކަމަށް ބުނެއެވެ.
އެ ޖޫސް ތައްޔާރުކުރަނީ ލެވެންޑާ އާއި ލުނބޯ ބޭނުންކޮށްގެން ކަމަށް ކައިލީ ވަނީ ބުނެފައެވެ. އަދި ބައެއް ދުވަސް ދުވަހު ރޯ ސެލެރީ ފެލައިގެން އޭގެން ޖޫސް ހަދައިގެން ބޯ ކަމަށް އޭނާ ބުންޏެވެ.
ކައިލީގެ ރީތިކަމުގެ ސިއްރަކީ މޭވާއާއި ތަރުކާރީ ކަމުގައި ވެސް ވެދާނެއެވެ. މޭވާތަކުގެ ތެރެއިން އަންނާރަކީ އޭނާއަށް ވަރަށް މީރު އެއްޗެއް ކަމަށް ކައިލީ ބުނެއެވެ.
އެގޮތުން އަންނާރުގެ އޮށް އަޅަނީ ބިއްލޫރި ފުޅިއަށް ކަމަށާއި، ދުވާލަކު އޭގެ ދެތިން ފުޅީގެ އަންނާރު އޮށް ކެވޭ ކަމަށް ކައިލީ ބުނެއެވެ.
