އެންޓި-ކޮރަޕްޝަން ކޮމިޝަން (އޭސީސީ)ގެ މެންބަރުކަމަށް އައްޔަންކުރެއްވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވާ ލިސްޓުގައި ނަން ނުހިމެނުމުން އެކަން އަލުން މުރާޖާ ކުރެއްވުމަށް އެ ކަމަށް ކުރިމަތިލެއްވި އިސްމާއީލް ޒަރިޔަންދު، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ސިޓީއެއް ފޮނުއްވައިފިއެވެ.
އެކަން އިސްލާހުކޮށްދެއްވަން އެދިވަޑައިގެން ރައީސް އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ފޮނުއްވި ސިޓީގައި ޒަރިޔަންދު ވިދާޅުވީ, އޭސީސީގެ މެމްބަރު ކަމަށް އޭނާ ކުރިމަތިލެއްވީ ގާނޫނީ ހަމަތަކުގެ މަތިން ކަމަށެވެ.
ޒަރިޔަންދުގެ ސިޓީގައި ވިދާޅުވީ އޭސީސީގެ މެންބަރު ކަމުން އަލީ އަޝްރަފު އިސްތިއުފާ ދެއްވުމުން އެ ހުސްވި މަގާމަށް ޑިސެންބަރު 16، 2021 ގައި އޭނާ ކުރިމަތިލީ ތިން މަސް ދުވަހުގެ މުއްދަތު ހިމެނޭ ގާނޫނީ ފޯމްތަކަކާއި އެ މަގާމަށް ކުރިމަތިލުމަށް ދައުލަތާއެކު ވެވޭ އިގުރާރެއްގައި ސޮއިކޮށްފައި ކަމަަށެވެ. އަދި އެ ހުށައެޅުމާއެކު އެ އިގްރާރާއި އެ ފޯމްތަކާ ގުޅޭގޮތުން އޭނާއާ މުއާމަލާތް ކުރެވޭ ގޮތަށް އެޑްރެހާއި ފޯން ނަންބަރާއި އީމެއިލް އެޑްރެސް ރައީސް އޮފީހުގައި ރެކޯޑް ކުރެވިފައިވާނެ ކަމަށެވެ.
އެހެންނަމަވެސް އޭގެ ފަހުން ރައީސް އޮފީހުން ކުރި އިއުލާނެއްގައި ވަނީ ކުރީގެ ދެ ފުރުސަތު ބާތިލްކޮށް، އަލުން އެންޓި ކޮރަޕްޝަން ކޮމިޝަނަށް 5 މެންބަރުން ހޯދުމަށް އާ އިއުލާނެއް ކުރައްވާފައެވެ. މިކަމާއި ގުޅިގެން ދެ ރައީސުންނަށް ފޮނުއްވި ސިޓީގައި ޒަރިޔަންދު ވިދާޅުވީ އިއުލާން ބާތިލްކުރިޔަސް ހުށަހެޅި އިގްރާރާއި ގާނޫނީ ލިއުންތައް ބާތިލްކުރި ކަމަށް އެ އިއުލާންގައި ބަޔާންކޮށްފައި ނުވާ ކަމަށެވެ.
އަދި މެމްބަރަކު އިސްތިއުފާ ދެއްވައިފި ނަމަ 60 ދުވަހުގެ ތެރޭގައި އެ މަގާމަށް މީހަކު އައްޔަންކުރަން ޖެހޭ ކަމަށް ގާނޫނުގައި އޮންނަކަން ފާހަގަކުރައްވައި ޒަރިޔަންދު ވިދާޅުވީ މެމްބަރު އިބްރާހިމް ޝަކީލް އިސްތިއުފާ ދެއްވީ އެ މުއްދަތު ހިނގަނިކޮށް ކަމަށެވެ.
ޒަރިޔަންދުގެ ސިޓީގައި މަޖިލީހަށް ފޮނުވި ނަން ލިސްޓްގައި އޭސީސީގެ މެންބަރު ކަމަށް ކުރިމަތިލީ މީހެއްގެ ގޮތުގައި އޭނާގެ ނަން ހިމެނިފައި ނެތުމުން އޭނާގެ މަސައްކަތަށް ތާއީދުކުރާ އެތައް ބަޔަކު އެކަމުގެ ކަންބޮޑުވުން ފާޅުކޮށްފައިވާ ކަމަށެވެ. އެހެން ކަމުން ރައީސްގެ "ކޮރަޕްޝަން" ހުއްޓުވުމުގެ ވައުދު ފުއްދުމުގައި އޭސީސީގައި އިންނަވަން ރައީސަށް ފެނިވަޑައިގަންނަވާ ނަންތަކުގެ ތެރޭގައި އޭނާގެ ނަން ހިމެނިފައި ނެތަސް ގާނޫނުގައި ބަޔާން ކުރާ އުސޫލުން އޭސީސީގެ މެންބަރު ކަމަށް ކުރުމަތިލީ މީހެއްގެ ގޮތުގައި އޭނާގެ ނަން މަޖިލީހަށް އަންގައިވައިދެއްވުމަށް ޒަރިޔަންދު ވަނީ އެދިވަޑައިގެންފައެވެ.
މީގެ އިތުރުން ދައުލަތުގައި ހޭދަކުރި 32 އަހަރު މަސައްކަތް ކުރެއްވީ ކޮރަޕްޝަނާ ދެކޮޅަށް ކަން ފާހަގަކުރައްވައި ޒަރިޔަންދު ވަނީ ރައީސުލްޖުމްހޫރިއްޔާ އިސްކަން ދެއްވާ ތަރުތީބުގެ ލިސްޓުގައި އޭނާގެ ނަން ނެތަސް ކުރިމަތިލީ މީހުންގެ ތެރޭގައި އޭނާގެ ނަން ހިމަނުއްވައި މަޖިލީހަށް ފޮނުއްވައި ދެއްވުމަށް އެދިވަޑައިގަންނަވާފައެވެ.
އޭސީސީގެ މެންބަރުކަމަށް ކުރިމަތިލުމަށް ހުޅުވާލުމުން 40އަށްވުރެ ގިނަ ބޭފުޅުން ކުރިމަތިލައްވާފައި ވެއެވެ. ނަމަވެސް ރައީސުލްޖުމްހޫރިއްޔާ އިސްކަންދެއްވާ ތަރުތީބުން އިސްކަންދެއްވާފައިވަނީ ފަސް ބޭފުޅަކަށެވެ.
އޭގެ ތެރޭގައި ހިމެނެނީ:
1- އަލްއުސްތާޛް އާދަމް ޝާމިލް، ރަތްވިލާގެ/ ތ. ވިލުފުށި
2- – އަލްއުސްތާޛް އަބްދުއްސަލާމް، ހަވާ/ ށ. ނަރުދޫ
3- އަލްއުސްތާޛް ޠާހާ މުހައްމަދު، ކަޅިހާރުގެ/ އދ. މާމިގިލި
4- އަލްއުސްތާޛާ ޝަޒްނާ ހާޝިމް، ރިހިވިލު/ ހދ. ނޮޅިވަރަންފަރު
5- އަލްއުސްތާޛާ ޝިޔާމާ މުހައްމަދު، ނާރެސް/ ރ. ހުޅުދުއްފާރު
މި ނަންފުޅުތަކުގެ ތެރެއިން އެއްވަނާގައި އޮތް ޝާމިލް އާދަމަކީ އޭސީސީގައި އިންވެސްޓިގޭޓަރެއްގެ ގޮތުގައި ގިނަ ދުވަސްތަކެއް ވަންދެން މަސައްކަތްކުރެއްވި އިންވެސްޓި ގޭޓަރެކެވެ. އަދި ދެވަނާގައި އޮތް ޢަބްދުއްސަލާމް ޢަލީ މިހާރުވެސް އޭސީސީގެ އިންވެސްޓިގޭޓަރުންގެ ހެޑްގެ ގޮތުގައި ހުންނެވި ބޭފުޅާއެވެ.
މީގެ އިތުރުން ޠާހާ މުޙައްމަދަކީ ރައީސް އުފެއްދެވި ފްލެޓް ކޮމިޓީގެ މެންބަރެވެ. އަދި ޝިޔާމާ މުޙައްމަދަކީ އިލެކްޝަންސް ކޮމިޝަންގެ ލީގަލް ޑިޕާޓްމަންޓްގެ ހެޑެވެ.
އޭސީސީއަށް އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވި ފަސް ބޭފުޅުންގެ ނަންތައް ދިރާސާކުރުމަށް މިއަދުގެ ޖަލްސާގައިވަނީ މިނިވަން މުއައްސަސާތަކުގެ ކޮމިޓީއަށް ފޮނުއްވާފައެވެ.
