މަޝްހޫރު ކޮމޭޑިއަން މުޙައްމަދު އަބްދުﷲ (މުހަންމާ)ގެ ދެކެދެކެވެސް ޕްރޮޑަކްޝަން ހަދާ ވެބް ސީރީޒް "ލަފުޒު"ގެ ޓްރެއިލާ ދައްކާލައިފިއެވެ.
ދުވަސް ތަކަކަށް ފިލްމީ ދާއިރާއާ ދުރުގައި ހުރުމަށްފަހު މުހަންމާ ގެނެސްދޭ "ލަފުޒު" ބަލާލެވޭނީ މީޑިއާނެޓްގެ އޯޓީޓީ ޕްލެޓްފޯމް، މަލްޓިސްކްރީނުންނެވެ.
މިވަގުތަށް 15 އެޕިސޯޑް ނިމިފައިވާ މި ވެބް ސީރީޒްގެ ޕްރިމިއާ ނައިޓް މިމަހު 26ގައި ބާއްވަން ނިންމާފައިވާކަން ވަނީ ހާމަކޮށްފައެވެ.
މަޝްހޫރު ޑައިރެކްޓަރ އަދި އެކްޓަރ އަޙްމަދު ނިމާލް ޑައިރެކްޓްކުރާ މި ވެބް ސީރީޒްގައި ޖުމްލަ 30 އެޕިސޯޑް ހިމެނޭނެއެވެ. މިއީ މަޝްހޫރު ވާހަކަލިޔުންތެރިޔާ މަރިޔަމް މޫސާ ލިޔެފައިވާ 30 އެޕިސޯޑްގެ ސްކްރިޕްޓެއްގެ މައްޗަށް ތައްޔާރުކުރާ ވެބް ސީރީޒެކެވެ.
މި ސީރީޒް ކެމެރާކޮށް އެޑިޓްކުރަނީ މަޝްހޫރު ކެމެރާމަން އަދި ޕޯސްޓްޕްރޮޑަކްޝަން މަސައްކަތުގައި ތަޖުރިބާކާރު ޢަލީ ރަޝީދު (ގޮޅާ އައްޔަ) އެވެ.
ސީރީޒްގެ ލީޑް ތަރިންގެ ތެރޭގައި އަލީ އާޒިމް (ދޮން އައްޔަ)، މަރިޔަމް ޝިފާ، ނިމާލްގެ އިތުުރުން ބައެއް ފިލްމުތަކުން ފެނިފައިވާ އަބްދުﷲ ނަސީރާއި ފިލްމީ މަސައްކަތުން މުޅިން އަލަށް ފެންނަ ފާތިމަތު ލަތީފާ އާއި އާރިފާ އަލީ ވެސް ހިމެނެއެވެ.
