ބޮލީވުޑްގައި "ސައިޒް ޒީރޯ"ގެ ގޮތުގައި މަޝްހޫރު ކަރީނާ ކަޕޫރު ފަލަ ކަމަށް ބުނެ މަލާމާތް ކުރަން ފަށައިފިއެވެ.
ކަރީނާއަށް ދެވަނަ ދަރިއަކު ލިބިފައިވަނީ މިދަޔަ އަހަރުގެ ފެބުރުވަރީ ގައެވެ. ކޮންމެ މީހެއްގެ ހަށިގަނޑަށް ބަދަލު އަންނަ ފަދައިން ވިހެއުމަށް ފަހު ކަރީނާގެ ހަށިގަނޑަށް ވެސް ވަނި ބޮޑު ބަދަލެއް އައިސްފައެވެ.
ކުރީގައި ހުރި ސައިޒަށް އަނބުރާ އައުމަށް ވިހެއުމަށްފަހު ގިނަ މަސައްކަތްތަކެއް ތަރިން ކުރެއެވެ. އަބަދުވެސް ރީތި ކަމާއި ލޫޅާފަތި ހަށިގަނޑަށް މި ތަރިން ދޭ ސަމާލުކަން ބޮޑެވެ.
ބުދަ ދުވަހު ކަރީނާ ވަނީ މުމްބާއީގެ ރެސްޓޯރެންޓަކުން ނުކުންނަނިކޮށް ފެނިފައެވެ. އޭނާ ހުރީ ކަޅު ކުލައިގެ ޓޭން ޓޮޕަކާއި ފިޔާތޮށި ކުލައިގެ ޖޮގާއެއް ލައިގެންނެވެ.
ކަރީނާ ރެސްޓޯރެންޓުން ނުކުންނަނިކޮށް ނަގާފައިވާ ފޮޓޯ އާއި ވީޑިއޯ ތަކެއް ވަނީ ވައިރަލް ވެފައެވެ. އެއާއެކު އެންމެ ގިނަ ބައެއްގެ ލޯ އަމާޒުވީ 41 އަހަރުގެ ބަތަލާގެ ބަނޑަށެވެ. މަސްޖަހާފައިވާ ބަނޑު ބޮޑުކޮށް ހުރީ ފެންނާށެވެ.
View this post on Instagram
އެކަމާ ގުޅޭގޮތުން ސޯޝަލް މީޑިއާގައި ވަނި އޭނާއަށް މަލާމާތް ކޮށްފައެވެ. އޭނާ ކަސްތަރު ކުރަން ޖެހޭ ކަމަށާއި ލޮކި މަސްތައް ވިރުވަންޖެހޭކަމަށް ބުނެ އަންނަނީ މަލާމާތް ކުރަމުންނެވެ.
ދެ ފިރިހެން ކުދިންގެ މަންމަ ކަރީނާގެ ކުރިއަށް އޮތް ފިލްމައަކީ އާމިރު ޚާނާއެކު ފެނިގެން ދާ "ލާލްސިންގ ޗައްޑާ" އެވެ. މި ފިލްމުގެ އެއްބައި ޝޫޓްކުރިއިރުވެސް ކަރީނާ 2 ވަނަ ދަރިފުޅަށް ބަނޑު ބޮޑެވެ.
