ވެރިކަން ކުރާ މައި ޕާޓީ އެމްޑީޕީގެ ޗެއާޕާސަންގެ މަޤާމަށް އިކޮނޮމިކް މިނިސްޓަރ މިނިސްޓަރ ފައްޔާޒު ވާދަކުރައްވަން ނިންމަވައިފިއެވެ.
އެމްޑީޕީގެ ޗެއާޕާސަންގެ މަޤާމު މިހާރު ފުރުއްވަމުންދާ ހަސަން ލަތީފްގެ ދައުރު މިއަދަށް ހަމަވާނެއެވެ. އެމްޑީޕީންވަނީ އެޕާޓީގެ އިސް މަޤާމުތަކަށް ބޭފުޅުން ކަނޑައެޅުމަށްޓަކައި އިންތިޚާބުތައް ބާއްވާނެ ތަރީހުތައް ކަނޑައެޅުމަށް މިރޭ ޤައުމީ މަޖިލީހުގެ ބައްދަލުވުމެއް ބާއްވަން ނިންމަވާފައެވެ.
މިނިސްޓަރ ފައްޔާޒް އެމްޑީޕީގެ ޗެއާޕާސަންގެ މަޤާމަށް ވާދަކުރައްވާނެކަމަށް ވަނީ އެމްޑީޕީގެ އިސްބޭފުޅުން ހިމެނޭ ވަޓްސްއަޕް ގްރޫޕެއްގައި އިއުލާންވެސް ކުރައްވާފައެވެ. އެމްޑީޕީގެ ޗެއާޕާސަންގެ މަޤާމަށް މިހާތަނަށް އިއުލާންކުރައްވާނެކަމަށް ހާމަކުރައްވަނީ އެސްޓީއޯގެ މެނޭޖިން ޑިރެކްޓަރު ހުސައިން އަމްރުއެވެ.
އެމްޑީޕީގެ ޗެއާޕާސަންގެ މަޤާމަށް ފައްޔާޒު ވާދަކުރައްވާއިރު، އޭނާއަކީ މިސަރުކާރުގެ ވަޒީރުކަމުން ވަކި ކުރުމަށް ރައީސް ނަޝީދު ވަރަށް ބޮޑަށް މަސައްކަތް ކުރެއްވި ބޭފުޅެކެވެ. ރައީސް ނަޝީދު ފައްޔާޒު ސިފަކުރައްވަނީ "ބްރޯ"ގެ ގޮތުގައެވެ. ރައީސް ނަޝީދުވަނީ ބްރޯ ހެދިގެން ނޫޅެވޭނެކަމަށްވެސް ވިދާޅުވެފައެވެ. އަދި ފައްޔާޒުގެ އިތުރުބާރު ނެތްކަމުގެ ވޯޓު ނެގުމަށްވެސް މަޖިލިސް ތެރެއިން ވަނީ މަސައްކަތް ކޮށްފައެވެ.
ނަމަވެސް ފައްޔާޒުގެ ދިފާއުގައި ރައީސް ޞާލިހު ވަނީ ނިކުންނަވައި، ފައްޔާޒަށް ފުރިހަމަ އިތުބާރު އޮތްކަމަށް ވިދާޅުވެފައެވެ. ފައްޔާޒު އެމްޑީޕީގެ ޗެއާޕާސަންގެ މަޤާމަށް ވާދަކުރެއްވުމަކީ އެމްޑީޕީގައި ރައީސް ނަޝީދާއި، ރައީސް ޞާލިހުގެ އިތް ވާދަވެރިކަން ވަރަށް ބޮޑަށް ހާމަވެގެންދާނެ އިންތިޚާބެއްކަމަށް ގިނަ ބަޔަކު ދެކެއެވެ.
އެމްޑީޕީގެ އަސާސީގަވާއިދުގައި ބުނެފައިވަނީ، އިންތިޚާބު ބޭއްވުމުގެ 60 ދުވަސްކުރިން އެއިންތިޚާބަކަށް ވާދަކުރުމުގެ ފުރުސަތު ގުޅުވާލައި، ކެމްޕެއިން ކުރުމުގެ ފުރުސަތު ދޭންވާނެކަމަށެވެ.
މިރޭ ބާއްވާ އެމްޑީޕީގެ ޤައުމީ މަޖިލީހުގެ ޖަލްސާގައި ޕާލިމަންޓްރީ ގްރޫޕްގެ ލީޑަރުގެ އިންތިޚާބު ޗެއާޕާސަންގެ އިންތިޚާބާއި، ރިޔާސީ ޕްރައިމަރީގެ އިންތިޚާބާއި، އަންހެނުންގެ ރޫޚުގެ އިންތިޚާބުގެ އިތުރުން ޒުވާނުންގެ ހިތްވަރުގެ އިންތިޚާބު ބޭއްވާނެ ތަރީހެއް ކަނޑައެޅުމަށް ވަނީ ނިންމާފައެވެ.
