މަޝްހޫރު ފިލްމީ ތަރި ރިޝްމީ ރަމީޒުގެ އަމިއްލަ ޕްރޮޑަކްޝަން ހައުސް އިން ގެނެސްދޭ ފުރަތަމަ ވެބް ސީރީޒްގެ ޓީޒާއެއް ދައްކާލައިފިއެވެ.
ރިޝްމީ ރަމީޒްގެ އަމިއްލަ ޕްރޮޑަކްޝަން ހައުސް "އާރްޓޫޒީ"ގެ ފުރަތަމަ ޕްރޮޑަކްޝަން "ޔާރާ"ގެ ޓީޒާ ދައްކާލީ ރިޝްމީގެ އިންސްޓަގްރާމް މެދުވެރިކޮށް މިމަހު ދެވަނަ ދުވަހުއެވެ.
މިއީ ބޮޑު ކާސްޓެއް ހިމެނޭ ރޮމޭންޓިކް ކޮމެޑީ، ވެބް ސީރީޒެކެވެ. މި ސީރީޒްގެ މުހިންމު ރޯލުތަކުން ރިޝްމީ އާއި އައްޒަގެ ކުރީގެ ފިރިންނާއި މިހާރުގެ ފިރިން ވެސް ފެންނާނެއެވެ. ރިޝްމީ މިހާރު ކައިވެނިކޮށްގެން އުޅޭ ރަވީ ފާރޫގާއި އައްޒަގެ ފިރިމީހާ އަބްދުﷲ މުއާޒް (މުއާ) އުޅޭއިރު، ރިޝްމީގެ ކުރީގެ ފިރިމީހާ އަހްމަދު އަޒްމީލް (އަޒޭ) އާއި އައްޒަގެ ކުރީގެ ފިރިމީހާ އިސްމާއިލް ޖުމައިހް ވެސް ފެންނާނެއެވެ.
View this post on Instagram
"ޔާރާ"ގެ ޑައިރެކްޝަންގައި އަޙްމަދު އިޤްބާލް، ރަވީ ފާރޫޤް އަދި ރިޝްމީ ވެސް ހަރަކާތްތެރިވާނެ ކަމަށްވެސް ރިޝްމީ މަޢުލޫމާތު ދެއެވެ.
ރިޝްމީ ޕްރޮޑިއުސްކޮށް ބައިސްކޯފުން ގެނެސްދިނުމަށް ތައްޔާރުވާ "ޔާރާ"ގެ ބޮޑު ކާސްޓުގައި ރިޝްމީގެ މަންމަ އާމިނަތު ރަޝީދާ ވެސް ހިމެނެއެވެ.
މީގެ އިތުރުން ބައިސްކޯފުގެ "އެހެނަސް" ވެބް ސީރީޒުން ބެލުންތެރިންގެ ބޮޑު މަގްބޫލުކަމެއް ހޯދި މުހައްމަދު ވިޝާލް (ރޯމަން)، ފާތިމަތު ޝަރާގެ އިތުރުން ހަމަ އެ ސީރީޒުން ފެނިގެންދިޔަ ނަތާޝާ ޖަލީލް، އާމިނަތު ޝަމާނާ، އާމިނަތު ސިލްނާ، މަރިޔަމް ވަހީދާ(ޔަމް) އަދި އަހުމަދު ޝާރިފް އާއި ނުޒުހަތު ޝުޢައިބް ވެސް ފެނިގެން ދާނެއެވެ.
