ރައްޔިތުންގެ މަޖިލިހުގެ ކޮމަންޑޫ ދާއިރާގެ މެމްބަރުކަން އަދާ ކުރައްވަމުން ގެންދެވި، އަދި އެދާއިރާއަށް އަގުހުރި ޚިދުމަތްތަކެއް ކުރައްވާފައިވާ، މެމްބަރު ހުސެއިން ވަހީދު ފާއިތުވި ޑިސެމްބަރ މަހުގެ 14ވަނަ ދުވަހު އަވަހާރަ ވުމާއި ގުޅިގެން، އެދާއިރާގެ ގޮޑިއަށް މެމްބަރަކު އިންތިޚާބު ކުރުމަށްޓާކާ ބޭއްވުމަށް ހަމަ ޖެހިފައިވާ ބައި އިލެކްޝަން މި ފެބްރުއަރީ މަހުގެ 5 ވާ ހޮނިހިރު ދުވަހު ބޭއްވުމަށް އިލެކްޝްންސް ކޮމިޝަނުން ވަނީ ނިންމާފައެވެ.

އަދި މި އިންތިޚާބުގައި ވާދަކުރާ 3 ޕާޓީންވެސް މި ގޮނޑި ކާމިޔާބު ކުރުމަށްޓަކާ ފޯރިޔާއެކު، މިދާއިރާގައި ކެމްޕޭން ކުރަމުން ދާއިރު ފާހަގަ ކޮށްލަންޖެހޭ އެންމެ މުހިންމު އެއްކަމަކީ، ރައްޔިތުންގެ މަޖިލިހުގެ ކޮންމެ އިންތިޚާބަކީވެސް، މަޖިލިހުގެ ކޮންމެ ގޮނޑިއަކީވެސް ހުރިހާ ސިޔާސީ ޕާޓިއަކަށްވެސް މުހިންމު، އަދި ވަކީން ޚާއްސަކަށް އޭރަކު އޮންނަ ސަރުކާރަކަށް ވަކީން މުހިންމުކަން ބޮޑު ގޮޑިއަކަށް ވެގެން ދާކަމެވެ.

މިގޮތުން މިއިންތިޚާބު ކާމިޔާބު ކުރުމަށްޓަކާ އިންތިޚާބުގައި ވާދަކުރާ 3 ޕާޓީންވެސްވަނީ ފޯރިއާއެކު ފާއިތުވެދިޔަ މަހެއްހާ ދުވަހު ކެމްޕޭން ކޮށްފައިވާއިރު، މި ކެމްޕޭންގެ ތެރެއިން އެންމެ ބޮޑަށް ފާހަގަ ކޮށްލަން ޖެހެނީ މި ގޮޑި ނެގުމަށް ސަރުކާރުން ކޮށްފައިވާ މަސައްކަތްތަކެވެ. އޭގެތެރޭގެ ސަރުކާރުގެ ބައެއް ވަޒީރުންނާއި، އަދި ރައްޔިތުންގެ މަޖިލިހުގެ އެމްޑީޕީއަށް ނިސްބަތްވާ ބައެއް މެމްބަރުން ދާއިމީ ގޮތެއްގައި ފާއިތުވެދިޔަ މަހެއްހާ ދުވަހު ކޮމަންޑޫ ދާއިރާގައި ތިބެފައި ވާއިރު، ކެމްޕޭން ތެރޭގައި ސަރުކާރުންވަނީ، ކޮމަންޑޫ ދާއިރާއަށް ބޭނުންވާ ތަރައްގީގެ ބޮޑެތި އެތައް މަޝްރޫޢޫތަކެއް ފަށާފައެވެ. މީގެ ތެރެއިންވެސް އެންމެ ޚާއްސަގޮތެއްގައި ފާހަގަ ކޮށްލެވެނީ، ފާއިތުވެދިޔަ ހުރިހާ އިންތިޚާބެއްގައިވެސް ހުރިހާ ސަރުކާރަކުންވެސް ކޮށްދޭނެ ކަމަށް ވައުދުވެ، އެހެންނަމަވެސް މިހާތަނަށް ފެށިފައި ނުވާ، ދެ ކޮމަންޑޫ ގުޅުވާލުމުގެ މަސައްކަތެވެ.

މިމަޝްރޫޢަކީ، މި ބޮޑު މަޝްރޫޢަށް ބެޖެޓް ކުރެވިފައި ނެތަސް، 240 މިލިއަން ރުފިޔާގެ ބަޖެޓް ހަމަޖައްސާ، މަހާ ޖައްރާފް އެސަރަހައްދަށް ގެންގޮސް، މި ކެމްޕޭންގެ ތެރޭގައި ފަށާފައިވާ، ނިސްބަތުން ބޮޑު މަޝްރޫޢެއްކަން ފާހަގަ ކޮށްލަން ޖެހެއެވެ.

އަދި މީގެ އިތުރުންވެސް، މަރޮށީ ބަދަރުގެ މަޝްރޫއުގެ އަމަލީ މަސައްކަތް ފެށިގެން ދިއުމުގެ އިތުރުން، މިކެމްޕޭނަށް އަމާޒުކޮށް އެމްޓީސީސީގެ ސީއެސްއާރުގެ ދަށުން ފޯކާއިދުގައި ފުޓްސެލް ދަނޑުގެ މަސައްކަތް ފެށުމުގެ އިތުރުންވެސް، ކުރިޔަށް އޮތްތަނުގައިވެސް މިދާއިރާއަށް ބޭނުންވެފައިވާ ތަރައްގީގެ ބޮޑެތި މަޝްރޫއުތައް މިއަހަރު ފަށްޓަވާ ދެއްވާނެކަމުގެ ފުރިހަމަ ޔަގީންކަން ސަރުކާރުން ވަނީ ދާއިރާގެ ރައްޔިތުންނަށް ދީފައެވެ.

އެމްއާރުއެމް ފިޔަވާ ކޯލިޝަން އެހެން ޕާޓީތަކުގެ ދައުރު!

މި ބައި އިލެކްޝަން ފާހަގަވެގެން ގޮސްފައިވަނީ، ކޯލިޝަންގައި ތިބި ޕާޓީތަކުގެ ދައުރު ކޯލިޝަންގައި އޮތް މިންވަރާއި، އަދި ރައީސް ސާހިލާއި ސިޔާސީ ގޮތުން ޚިޔާލު އެއްގޮތް މިންވަރުވެސް ހާމަވެގެން ދިޔަ ބައި އިލެކްޝަނެއްގެ ގޮތުގައިވެސް މެއެވެ.

މިގޮތުން އެންމެ ބޮޑު އެއް ތަފާތެއްގެ ގޮތުގައި ފާހަގަވާން އޮތް ކަމަކީ، ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީއާއި، އަދާލަތު ޕާޓީއާއި އެމްއާރުއެމް، މި ތިން ޕާޓީގެ ތެރެއިން، އެމްއާރުއެމް ފިޔަވާ އަނެއް ދެ ޕާޓީގެ ދައުރު އިންތިޚާބުން ވަރަށް ފުޅާ ދާއިރާއެއްގައި ފެނިގެން ދިޔަ ތަނެވެ. އެމްއާރުއެމްއިން އިންތިޚާބުގައި ވާދަކުރާ އެއްވެސް ކެނޑިޑޭޓަކަށް ތާއީދުކުރާކަން ހާމަނުކޮށް، ގޮވާލާފައިވަނީ، ނުފޫޒުން އެއްކިބާވެ ތިބެ ވޯޓު ދިނުމަށެވެ.

އެހެންނަމަވެސް އެއާއި ޚިލާފަށް، އަދާލަތު ޕާޓީންވަނީ އެޕާޓީގެ އިލްމުވެރިންގެ މަޖިލުހުން، އެމްޑީޕީގެ ކެނޑިޑޭޓަށް ތާއީދު ކުރުމަށް ރަސްމީކޮށް ނިންމާ، އަދި އެޕާޓީގެ ރައީސް، ހޯމް މިނިސްޓަރު ޝޭޚް އިމްރާންވަނީ ކޮމަންޑޫ ދާއިރައަށް ޒިޔާރަތް ކުރައްވާ އެމްޑީޕީގެ ކެނޑިޑޭޓަށް ކެމްޕޭން ކޮށްދެއްވާފައެވެ،

އަދި އަދާލަތު ޕާޓީއާއި ޚިލާފަށް، ޖުމުހޫރީ ޕާޓީގެ ލީޑަރުވަނީ، އެޕާޓީގެ ކައުންސިލުންވެސް ނިންމުމަކާ ނުލާ، ޖުމުހޫރީ ޕާޓީން އެމްޑީޕީގެ ކެނޑިޑޭޓަށް ތާޢީދުކުރާކަން އިއުލާންކޮށް، އެދާއިރާއަށް ވަޑައިގެ، ކޯވިޑްގެ ބަލިމަޑުކަމުގެ ތެރޭގައިވެސް، ކެމްޕޭން ނިމެންދެން ދާއިރާގައި ހުންނަވާފައެވެ.

މި ކެމްޕޭންގައި ޖުމުހޫރީ ޕާޓީގެ ލީޑަރު ގާސިމް އިބުރާހިމް ވިދާޅުވެފައިވަނީ، ރައީސް ހިތުގައި ޖައްސައިގެން ދާއިރާ ތަރައްގީ ނުވާނެ ކަމަށާއި، އާސަންދަވެސް ލިބޭނޭކަމުގެ އުއްމީދެއް އޮތީ މިފަހަރު އެމްޑީޕީގެ ކެނޑިޑޭޓަށް ވޯޓު ދީގެން ކަމުގައެވެ. ގާސިމް އިބުރާހިމްގެ މިވާހަކަފުޅުތަކަކީ، ފޯރިއާއެކު ކުރިޔަށްދިޔަ މި އިންތިޚާބަށް ކުރި ފައިދާއަށްވުރެ ގެއްލުން ބޮޑު ވާހަކަފުޅުތަކެއްގެ ގޮތުގައި ގިނަބަޔަކު ސިފަ ކުރި ކަމުގައިވި ނަމަވެސް، ގާސިމް މި ދާއިރާގައި ހުންވައިގެން އެހެން ގޮތްގޮތުން ކުރައްވަފައިވާ މަސައްކަތްތަކުން، ކެމްޕޭނަށް ފައިދާ ކޮށްފައިވާނެ ކަމުގައި ގިނަބަޔަކު ދެކެއެވެ.

އެހެންކަމުން، އެމްޑީޕީއަށް މިއިންތިޚާބުގައި 65ވަަނަ ގޮނޑި ގެއްލިގެން ދިއުމާއި ކާމިޔާބު ވެގެން ދިއުމުގައި، މިހާރު އޮތް، ރައީސް ސާލިހުގެ ކޯލިޝަންގެ ހިއްސާ ވަރަށްވެސް ފުރިހަމަޔަށް ޝާމިލްވެގެން ދާނެކަމީ ކަށަވަރުވެ ޔަގީންވާ ކަމެކެވެ.

65 ވަނަ ގޮނޑި މިހާ މުހިންމު ވަނީތަ؟

މިހާރުގެ ރައްޔިތުންގެ މަޖިލިހުގައި އެމްޑީޕީގެ ސާފު މެޖޯރިޓީ އޮވެފައި، މިބޮޑު އަޢުލަބިއްޔަތާއެކީވެސް، މިގޮޑި ނެގުމަށް ސަރުކާރުން ކުރި ހޭދައާއި، އަދި ދެއްކި ފޯރިއާއި، ފެނިގެންދިޔަ ޝައުރުވެރިކަން ވެގެން ދިޔައީ އެތައް ބައެއްގެ ހިތްތަކުގައި އެތަކެއް ސުވާލުތަކެއް އުފެއްދި ކަމަކަށެވެ. ސަބަބަކީ، މހާރު މަޖިލިހުގެ ކޮމްޕޮޒިޝަން އޮތް ގޮތުން، ހަގީގަތުގައި މަޖިލިގުގެ ތެރެއިން ސަރުކާރުން ކުރަން ބޭނުންވާ ކަމަކަށް ހުރަސް އެޅޭވަރުގެ، ނުވަތަ ގޮންޖެހުމެއް ކުރިމަތު ކުރުވޭވަރުގެ މެޖޯރިޓީއެއް، ސަރުކާރާ އިދިކޮޅަށް މަސައްކަތް ކުރަމުންދާ މެމްބަރުންގެ މެދުގައި ނެތްކަމެވެ.

މިގޮތުން މި މެމްބަރުންގެ އަދަދަށް ބަލާއިރު، ގާސިމް އިބްރާހިމްގެ ޖުމުހޫރީ ޕާޓީވެސް އޮތީ ރައީސް ސާލިހަށް ތާއީދު ކޮށްގެން ކަމަށް ވުމާއިވެސް އެކު، ދެން ބާކީ ތިއްބެވި މަދު މެމްބަރުން ކޮޅަށް އެންމެ ބޮޑުވަރަކަށްވެސް ކުރެވެން އޮތް ކަމެއްގެ ގޮތުގައި ފެންނަމުންދަނީ މަޖިލިސް ބޮއިކޮޓް ކޮށްލުމެވެ.

އެހެންކަމުން، ހަގީގަތުގައި ވެސް، މަޖިލިހުގެ ފްލޯއިން ބިލެއް ފާސްކުރުން ކަމުގައިވި ނަމަވެސް، ކޮމިޓީތަކުގެ މަސައްކަތް ސަރުކާރު ބޭނުންވާ ގޮތަށް ބައްޓަން ކުރުން ކަމުގައިވި ނަމަވެސް، އޮތް މެޖޯރިޓީއަށް ބަލާއިރު، ސަރުކާރަށް އެއްވެސް ވަރެއްގެ ގޮންޖެހުމެއް އޮވެގެންވާނެ ކަމުގައި ބެލެވޭކަށް ނެތެވެ.

އެހެންނަމަވެސް، މި ހުރިހާ ސަބަބުތަކާއެކުވެސް، 65ވަނަ ގޮނޑި ނެގުމަށް ސަރުކާރުން މިވަނީ އެތައް ސަތޭކަ މިލިއަން ރުފިޔާއެއްގެ ތަރައްގީގެ މަޝްރޫއުތައް ކޮމަންޑޫ ދާއިރާގައި މި ކެމްޕޭނާ ދިމާކޮށް ފަށާދީ، އަދި އެތައް ސަތޭކަ މިލިއަން ރުފިޔާއެއްގެ ތަރައްގީގެ މަޝްރޫއުތައް މިއަހަރު އެކަނިވެސް ފަށާދޭނެކަމަށް ވައުދުވެފައެވެ. މީގެ އިތުރުން، މި ގޮނޑިއަށް ސަރުކާރުގެ ޝައުގުވެރިކަން ހުރި މިންވަރަށް ބަލާއިރު، ތަރައްގީގެ ވައުދުތަކުގެ އިތުރުން ސީދާގޮތުންވެސް ފައިސާގެ ބޮޑު ޚަރަދެއް ސަރުކާރުން ކޮށްފައިވާނެ ކަމަށް ގަބޫލުކުރަން ޖެހެއެވެ.

އެހެންކަމުން، 65ވަނަ ގޮޑި ނެގުމަށް ސަރުކާރުން ކުރި މި ބޮޑު ހޭދައާއި، ކުރި މަސައްކަތަކީ، ގިނަ ބަޔަކު މިއަދު ގަބޫލު ކުރާގޮތުގައި، މަޖިލިސް މެޖޯރިޓީއަށްވުރެ ފުޅާކޮށް ސިޔާސީގޮތުން ތަރުޖަމާ ކުރަންޖެހޭ ހޭދައަކާއި މަސައްކަތެކެވެ. އެއީ އެމްޑީޕީގެ އެތެރޭގަ އޮތް ސިޔާސީ ކޯޅުމާއި ގުޅިފައި އޮތް ތަރުޖަމާއެކެވެ. އެޕާޓީގެ ތެރެއިން 2023ގެ ރިޔާސީ ޓިކެޓް ކަށަވަރު ވުމާއި ގުޅިފައި އޮތް ތަރުޖަމާއެކެވެ. އަދި އޭގެ އިތުރުން، ސަރުކަރާ ދެކޮޅަށް އިދިކޮޅު ޕީޕީއެމްއިން ކުރިޔަށް ގެންދާ އިންޑިއާ އައުޓު ކެމްޕޭނާވެސް ގުޅިފައި އޮތް ތަރުޖާމާއަކަށް ވުމުގެ އިތުރުން، މިއީ މި ސަރުކާރުގެ މުސްތަގުބަލާއި ގުޅިފައި އޮތް ނަތީޖާއެއްގެ ގޮތުގައި، މިކެމްޕޭން ތަރުޖަމާ ކުރަން މިއަދު މިވަނީ މަޖުބޫރު ވެގެން ގޮސްފައެވެ. ދެން މި ނަޖީތާއަށް ކުރަންޖެހިފައި އޮތް އިންތިޒާރެވެ. އެއީ އިންތިޒާރަށް މާދަމާ ނިންމުން އަންނާނެއެވެ.