އިޒްރޭލުގެ ޕާލަމެންޓުގައި ބޮޑުވަޒީރު ބެންޖަމިން ނަތަންޔާހޫގެ އިއްތިހާދަށް ފުރިހަމަ އަގުލަބިއްޔަތެއް ނުލިބުނު ނަމަވެސް، ވަގުތީ ބޮޑުވަޒީރުގެ މަގާމުގައި އޭނާ ދެމިހުންނާނެކަން ގާތްގަނޑަކަށް ކަށަވަރުވެއްޖެ އެވެ.
ބުދަ ދުވަހު ވޯޓުގެ 86 އިންސައްތަ ގުނާ ނިމުނުއިރު، އިޒްރޭލުގެ މައިގަނޑު މީޑިއާތަކުން ލަފާކުރާ ގޮތުގައި ނަތަންޔާހޫގެ ކަނާތު ފިޔައިގެ، ހަރުކަށި ފިކުރުގެ އަދި އަލްޓްރާ އޮތޮޑޮކްސް ޕާޓީތަކުގެ އިއްތިހާދަށް 120 ގޮނޑިން 53 ގޮނޑި ލިބޭނެ އެވެ. އޭނާގެ މައިގަނޑު ވާދަވެރިޔާ ގާޑީ އައިޒެންކޮޓްގެ އިއްތިހާދަށް ލިބޭނެ ކަމަށް ބެލެވެނީ 48 ގޮނޑި އެވެ.
މި އިންތިހާބުގައި އަރަބި ޕާޓީތަކުން މީގެ ކުރިން ނުލިބޭ ވަރަށް 19 ގޮނޑި ހޯދިއެވެ. ނަމަވެސް ގިނަ ޔަހޫދީ ލީޑަރުން އަރަބި ޕާޓީތަކާ އެކު ކޯލިޝަން ހެދުމާ ދެކޮޅު ހަދާތީ، އައިޒެންކޮޓް ވެރިކަމަށް އައުމުގެ ފުރުސަތު ވަނީ ވަރަށް ހަނިވެފަ އެވެ.
އާ ސަރުކާރެއް އެކުލަވާލުމުގެ މަޝްވަރާތައް ކުރިއަށްދާ މުއްދަތުގައި، އަދި ފަހަރުގައި އަންނަ އަހަރު ބާއްވާ އިންތިހާބާ ހަމައަށްވެސް ނަތަންޔާހޫ ވަގުތީ ބޮޑުވަޒީރުކަމުގައި ހުންނާނެ އެވެ. ވަގުތީ ސަރުކާރަކަށް ބައެއް އިދާރީ ހުރަސްތައް ހުރި ނަމަވެސް، އީރާނާ އެކު ކުރަމުންދާ ހަނގުރާމައާ ގުޅޭ މުހިންމު ނިންމުންތައް ނިންމުމުގެ ފުރިހަމަ ބާރު އެ ސަރުކާރަށް ލިބިގެންވާނެ ކަމަށް ސިޔާސީ މާހިރުން ފާހަގަކުރެ އެވެ.
ކޮމެންޓު ފޮނުވާ