ހުރިހާކަމެއް ހައްލުވާން އަންނަނީ ވެރިކަން ކުރާ މާއިޕާޓީ އެމްޑީޕީއަށް ހިބަކޮށްދީގެން ކަމަށްވާނަމަ، ރާއްޖޭގައި އެމްޑީޕީ ފިޔަވައި އެހެން ޕާޓީއެއް އޮތުމުގެ މާނައެއް ނެތްކަމަށް ވިދާޅުވެ ދީނީ އިލްމުވެރިޔާ ޝައިޚު އަލީ ޒައިދު ހޫނު ރައްދެއް ދެއްވައިފިއެވެ.

ޝައިޚު ޒައިދު މިފަދައިން ވިދާޅުވީ ކޮމަންޑޫ ދާއިރާގެ ބައި އިލެކްޝަންގައި މިއަދު އަދާލަތު ޕާޓީ ހިމެނޭހެން ވެރިކަން ކުރާ ކޯލިޝަނުން ބޭއްވި ޖަލްސާގައި ބައެއް ބޭފުޅުން ދެއްކެވި ވާހަތަކަށް އިޝާރާތް ކުރައްވާކަމަށް ބެލެވެއެވެ. ކޮމަންޑޫގައި ބޭއްވި މިޖަލްސާގައި ކޯލިޝަން ލީޑަރު ޤާސިމްވަނީ އެމްޑީޕީގެ ކެނޑިޑޭޓަށް ވޯޓު ދިނުމަކީ ދުނިޔެވީ ގޮތުން ބަލާކަމުގައިވާނަމަ އެއީ ވާޖިބެއްކަމަށް ވިދާޅުވެފައެވެ.

ކޮމަންޑޫގައި ބައެއްބޭފުޅުން ދެއްކެވި ވާހަކަތަކަށް އިޝާރާތް ކުރައްވައި، ޒައިދު ވިދާޅުވީ ސިޔާސީ ގޮތުން ބައެއް ބޭފުޅުން މިއަދު ދައްކަވަމުންދާ ވާހަތަކުން ރާއްޖޭގައި އެމްޑީޕީނޫން އެހެން ޕާޓީއެއް އޮތުމުގެ މާނައެއް ނެތްކަމަށެވެ. ކޮންމެކަމެއް ވާން އަންނަނީ އެމްޑީޕީއަށް ތާއީދުކޮށް، އެޕާޓީއަށް ވަދެގެންކަމަށް ބައެއް ބޭފުޅުންނަށް ހީވާނަމަ، އެހެން ސިޔާސީ ޕާޓީ ތައް އުވާލުމަކީ ކުރުން އެންމެ ބުއްދިވެރި ކަންތައްކަމަށް ޒައިދު ވިދާޅުވިއެވެ.

އެއްވެސް ކަމެއް ވާންއަންނަނީ ހުރިހާ ކަމެއް އަލިފުން ޔާ އަށް MDP އަށް ހިބަކޮށްދިނުމުން ކަމަށްވާނަމަ ޕާޓީތައް އުވާލާފަ ވުޖޫދުގައި އޮންނަންވީ ހަމައެކަނި MDP ނޫންތޯ؟! އެންމެން އެޕާޓީއަށްވަނީނަމަ އަދި މާރަނގަޅެއް ނޫންތޯ؟ އަންތަރީސްނުވޭތޯ ބައެއް ބޭފުޅުން އެދައްކާ ވާހަކައިން؟!

– ޒައިދު ވިދާޅުވިއެވެ.

ކޮމަންޑޫގެ ބައި އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓްގެ ކެމްޕެއިންގައި ކޮމަންޑޫ ރައްޔިތުންނާ ބައްދަލު ކުރައްވައި ގާސިމް ވިދާޅުވީ ރައްޔިތުން ތަރައްގީއާ ކުރިއެރުން ބޭނުންވާނަމަ ކޮމަންޑޫ ދާއިރާއަށް އެމްޑީޕީގެ ކެންޑިޑޭޓް އިންތިޚާބު ކުރަން ޖެހޭ ކަމަށެވެ. ކޮމަންޑޫއަށް މިއަދު ލިބެންހުރި ކަންކަމާއި، ކުރަމުންދާ ކަންކަމަށް ބަލާއިރު ކޮމަންޑޫ ދާއިރާގެ ރައްޔިތުން މިއިންތިޚާބު އެމްޑީޕީގެ ކެނޑިޑޭޓަށް ކާމިޔާބް ކޮށްދިނުމަކީ ވާޖިބް ކަމެއްކަމުގައި ޤާސިމް ވިދާޅުވިއެވެ.

ޤާސިމް ވިދާޅުވީ ސަރުކާރަށް ކޮމަންޑޫދާއިރާގެ ގޮޑި މުހިންމު ނޫންކަމަށާއި، މިހާރުވެސް މަޖިލީހުގެ ސާފު އައުލަބިއްޔަކު އެމްޑީޕީއަށް އެބައޮތްކަމަށެވެ. ނަމަވެސް މިއީ ސަރުކާރުން މިހާތަނަށް ތަމްސީލް ކުރި ގޮޑިއަކަށް ވެފައި މިގޮޑި ކާމިޔާބް ކުރުމަށްޓަކައި ސަރުކާރުން ކުރަމުންދާ މަސައްކަތަކީ މިދާއިރާގެ ރައްޔިތުންގެ ލާބަޔަށް ކުރަމުންދާ މަސައްކަތްތަކެއްކަމުގައި ޤާސިމް ވިދާޅުވިއެވެ.