ރާއްޖޭގައި ތިބި އިންޑިއާ ސިފައިން ބޭރުކުރުމަށް ގޮވާލާ ފަށާފަައިވާ އިންޑިއާ އައުޓް ކެމްޕެއިން ހުއްޓުވެން ކުރެވެންހުރި ހުރިހާކަމެއް ކުރުމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު، ސަލާމަތީ ޚިދުމަތްތަކުގެ ކޮމިޓީ (241)އަށް އަންގައިފިއެވެ.

ރައީސް ނަޝީދު ސޮއިކުރައްވާ 241 ކޮމިޓީގެ މުޤައްރިރު އަދި ހިތަދޫ އުތުރު ދާއިރާގެ މެންބަރު މުޙައްމަދު އަސްލަމަށް ފޮނުއްވި ސިޓީގައި ވަނީ، އިންޑިއާ ސިފައިން ބޭލުމަށް ރައީސް ޔާމީން އިސްވެ ފަށްޓަވާފައިވާ އިންޑިއާ އައުޓް ހަރަކާތަކީ އެކަމުގެ ސަބަބުން ޤައުމީ ސަލާމަތަށް ނުރައްކަލެއް ކުރިމަތިވެދާނެ ކަމެއްކަމަށް ދެކެވަޑައިގަންނަވާކަމަށެވެ. އެފަދަ ޢަމަލުތަކަކީ ތަހްޒީބް އެއްވެސް މުޖުތަމަޢުއެއްގައި ބަލައި ގަންނާނެކަމެއް ނޫންކަމަށާއި، އެއީ ރާއްޖޭގެ މަސްލަހަތާއި ޚިލާފު، އަދި އެކަމުގެ ސަބަބުން ދިވެހި ސަރުކާރާއި އިންޑިއާ ސަރުކާރާ ދެމެދު ޒަމާނުއްސުރެ އޮތް ގާތް ގުޅުމަށް ހީނަރުކަން އައުމުގެ ފުރުސަތު އޮތް ކަމެއްކަމަށް ރައީސް ނަޝީދު ވިދާޅުވެފައިވެއެވެ.

ރައީސް ނަޝީދު ވަނީ "އިންޑިއާ އައުޓް"ގެ ނަމުގައި ކުރިއަށް ގެންދާ ހަރަކާތުގެ ސަބަބުން އެ ގައުމުގައި ދިރިއުޅޭ ދިވެހިންނަށް ވަރަށް ގިނަ ދަތިތަކާ ކުރިމަތިލާންޖެހޭނެކަމަށްވެސް ވިދާޅުވެފައެވެ.

އިންޑިއާ އައުޓް ހުއްޓުވުމަށް ރައީސް ނަޝީދު 241 ކޮމިޓީއަށް އަންގަވާފައިވާއިރު، ސަރުކާރުންވެސް އަންނަނީ އެކަން ހުއްޓުވުމަށް ގިނަ މަސައްކަތް ކުރަމުންނެވެ. ނަމަވެސް އިދިކޮޅުން ހިންގާ އިންޑިއާ އައުޓް ހަރަކާތުގައި ގިނަ ޢަދަދެއްގެ ބަޔަކު އަންނަނީ ބައިވެރިވަމުންނެވެ.

އިންޑިއާ އައުޓް ހަރަކާތް ހުއްޓުވުމަށް، ޖޫރިމަނާކޮށް ޖަލު އަދަބު ލިބޭގޮތަށް ޤާނޫނެއް އެކުލަވާލުމުގެ މަސައްކަތްވެސް އެމްޑީޕީން އަންނަނީ ކުރަމުންނެވެ.