ރާއްޖޭގައި އެންމެ ބާރަށް ތަރައްޤީގެ ކަންކަން މިވަގުތު ހިނގަމުންދާ އެއް ދާއިރާކަމުގައިވާ ށ.އަތޮޅު ކޮމަންޑޫ ދާއިރާގެ، ކޮމަންޑޫއަށް ސަރުކާރުން އެމްބިއުލާސްސެއް ފޮނުވައިފިއެވެ.

ހެލްތު މިނިސްޓްރީން ބުނެފައިވަނީ އަތޮޅުތެރޭގައި ބޭނުންކުރުމަށް އެސް.ޓީ.އޯ މެދުވެރިކޮށް ގެނެވިފައިވާ އެމްބިއުލެންސްގެ ތެރެއިން ށ.ކޮމަންޑޫއަށް ފޮނުވާ އެމްބިއުލެންސް ވަނީރޭ ފޮނުވާލެވިފައިކަމަށެވެ.

ކޮމަންޑޫ ދާއިރާގެ ބައި އިލެކްޝަނަށް ހަފްތާއަކަށް ކުޑަތަން ވެފައިވާއިރު، ސަރުކާރުން ދަނީ އެދާއިރާގައި ހުރި ގިނަ މައްސަލަތަކެއް ހައްލު ކުރުމަށް ބޮޑެތި މަސައްކަތްތަކެއް ކުރަމުންނެވެ. ކޮމަންޑު ދާއިރާގެ ތިން ރަށުގައި ބަޖެޓުގައި ނުވެސްނެތް ބޮޑެތި މަޝްރޫޢުތަކެއް ކުއްލިއަކަށް ފަށައިގެން ކުރިއަށްދާއިރު، މިއީ އިންތިޚާބަށް ނުފޫޒު ފޯރުވުމަށް ހިންގަމުންދާ ކަންތައްތަކެއްގެ ގޮތުގައި ގިނަ ބަޔަކު ދަނީ ތުހުމަތު ކުރަމުންނެވެ.

އެމްބިއުލާންސް ނެތް ރަށްތަކަށާއި އެމްބިއުލާންސް ހަލާކުވެފައިވާ ރަށްތަކަށް އެމްބިއުލާންސް ފޯރުކޮށްދިނުމުގެ މަސައްކަތުގެ ދަށުން ސަރުކާރުންވަނީ 96 އެމްބިއުލާންސް ރާއްޖެ ގެނައުމަށްޓަކައި އެސްޓީއޯއަށް ހަވާލުކުރީ މިދިޔަ އަހަރުގެ ޖޫންމަހުގެ 10 ވަނަ ދުވަހުއެވެ. މި އެމްބިއުލާންސްތަކުގެ ތެރެއިން ފުރަތަމަ ޝިޕްމަންޓްގައި 20 އެމްބިއުލާންސް ރާއްޖެ ގެނެސްފައިވަނީ މިިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުއެވެ. އަދި ދެވަނަ ޝިޕްމަންޓް ގެނެސްފައިވަނީ މިދިޔަ އަހަރުގެ ނޮވެމްބަރު މަހުގެ 29 ވަނަ ދުވަހުއެވެ.

އެސްޓީއޯ މެދުވެރިކޮށް ގެނައި އެމްބިއުލާސްތަކުގެ ތެރެއިން އަތޮޅު ތެރޭގެ 20 ރަށަކަށް ފޮނުވުމަށް ވަނީ ލިސްޓު ކަނޑައެޅިފައެވެ. ނަމަވެސް މިލިސްޓުގައި ކޮމަންޑޫގެ ނަމެއް ނުވެސްނެތެވެ.

20 އެމްބިއުލާންސްތައް ފޮނުވުމަށް މިދިޔަ އަހަރު ޑިސެމްބަރު މަހު ކަނޑައެޅި ރަށްތައް:

– ހދ.ކުމުންދޫ
– ށ.ބިލެތްފެހި
– ށ.ނަރުދޫ
– ނ.ފޮއްދޫ
– ނ.ކުޑަފަރީ
– ބ.ކެންދޫ
– އއ.މަތިވެރި
– އއ.ބޮޑުފުޅުދޫ
– އދ.މަންދޫ
– އދ.ފެންފުށި
– މ.ދިއްގަރު
– މ.ކޮޅުފުށި
– ފ.ފީއަލި
– ތ.މަންދޫ
– ތ.ބުރުނީ
– ތ.ދިޔަމިނގިލި
– ލ.ކުނަހަންދޫ
– ގއ.ކޮލަމާފުށި
– ގއ.ނިލަންދޫ
– ގދ.ރަތަފަންދޫ

އަތޮޅުތެރޭގައި ބޭނުންކުރުމަށް އެސް.ޓީ.އޯ މެދުވެރިކޮށް ގެނެވިފައިވާ އެމްބިއުލެންސް ގެ ތެރެއިން ށ.ކޮމަންޑޫ އަށް ފޮނުވާ އެމްބިއުލެންސް ވަނީ މިރޭ ފޮނުވާލެވިފައި. pic.twitter.com/bj7VHcWy7Y

— Ministry of Health (@MoHmv) January 24, 2022

އެމްބިއުލާންސްގެ ޚިދުމަތަކީ ކޮންމެ ރަށަކަށްވެސް މުހިންމު ޚިދުމަތަކަށް ވެފައި، ބައެއް ރަށްތަކުގައި އެމްބިއުލާންސް ހަލާކުވެ ޚިދުމަތް މެނދުކެނޑިފައި އޮތުމުގެ ސަބަބުން ގިނަ ދަތިތައް އަންނަނީ ކުރިމަތިވަމުންނެވެ. އަދި އަލަށް ގެންނަ އެމްބިއުލާންސްތަކުގެ ސަބަބުން ޚިދުމަތް އިތުރަށް ފުޅާވެ، އަތޮޅުތަކުގައި މިހާރު ކުރިމަތިވަމުންދާ ގިނަ ގޮންޖެހުންތަކަށް ޙައްލު ލިބިގެންދާނެކަމަށް ސަރުކާރުން ވިދާޅުވެއެވެ.