ލެޖެންޑަރީ ލަވަކިއުންތެރިޔާ ލަތާ މަންގޭޝްކަރް އަދިވެސް ހޮސްޕިޓަލުން ދޫކޮށް ނުލާކަމަށް ފަހުގެ ޚަބަރުތައް ބުނެފިއެވެ.
މީގެ ހަފްތާއެއްހާ ދުވަސް ކުރިން ލަތާ ހޮސްޕިޓަލަށް ގެންގޮސް ފަރުވާ ދެމުން އައީ އައިސީޔޫގައެވެ. މިހާރު ލަތާގެ ހާލު ކުރި އަށްވުރެ ރަނގަޅުކަމަށް ޚަބަރުތައް ބުނެއެވެ.
ލަތާ އެޑްމިޓްކޮށްފައިވަނީ ކޯވިޑަށް ޕޮޒިޓިވް ވުމާއި ގުޅިގެންނެވެ. މުމްބާއީގެ ބްރީޗް ކެންޑީ ހޮސްޕިޓަލްގެ އައިސީޔޫގައި ފަރުވާދެމުން އަންނަ ލަތާ ކޯވިޑަށް ޕޮޒިޓިވްވީ އޭނާގެ މުއްވަފަކު ޕޮޒިޓިވްވުމާ ގުޅިގެން ހެދި ޓެސްޓުތަކުންނެވެ.
ލަތާގެ ޑޮކްޓަރަކާ ހަވާލާދީ ޓައިމްސް އޮފް އިންޑިއާއިން މީގެކުރިން ބުނީ އޭނާއަށް ކޯވިޑްގެ އިތުރުން ނިއުމޯނިއާއަށް ވެސް ފަރުވާދެމުން ގެންދާ ކަމަށެވެ.
އިންޑިއާގެ އާންމު ރައްޔިތަކަށް ދޭ އެންމެ މަތީ ދަރަޖަ ބާރަތު ރަތުނާ، 2001 ވަނަ އަހަރު ދީފައިވާ ލަތާގެ އެތައް ހާސް ލަވަތަކެއް މިހާތަނަށް ވަނީ ރެކޯޑް ކޮށްފައެވެ. މިހާރުވެސް ލަތާގެ ލަވަތަކަކީ މަގުބޫލު ލަވަތަކެކެވެ.
