އަންނަ މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަނާއި ގުޅިގެން މިހާތަނަށް 3 ޝަކުވާއެއް ހުށަހަޅާފައި ވާކަމަށް އިލެކްޝަންސް ކޮމިޝަނުން ހާމަކޮށްފިއެވެ.
އިންތިޚާބާ ގުޅިގެން އެއްވެސް ޝަކުވާއެއް އޮތްނަމަ ޝަކުވާ ހުށަހެޅޭނެ ގޮތަށް، އިލެކްޝަންސް ކޮމިޝަނުގައި ކޮމްޕްލެއިންސް ބިއުރޯއެއްވަނީ ގާއިމްކޮށްފައެވެ. އަދި ކޮމަންޑޫ ދާއިރާގެ ތިން ރަށުން ޝަކުވާ ހުށަހަޅަން އޮތްނަމަ އެރަށަކުން ޝަކުވާ ހުށަހެޅޭނެ ފޯކަލް ޕޮއިންޓްތަކެއްވެސް ވަނީ ކަނޑައަޅާފައެވެ.
އިލެކްޝަންސް ކޮމިޝަނުން ބުނެފައިވަނީ މިހާތަނަށް ހުށަހެޅުނު ތިން ޝަކުވާވެސް ހުށަހަޅާފައިވަނީ އިދިކޮޅު ޕީޕީއެމުންކަމަށެވެ. ޕީޕީއެމުން ހުށަހެޅި ޝަކުވާ އަމާޒުކޮށްފައިވަނީ ކެމްޕޭން ޖަލްސާއެއްގައި ވާދަވެރި ފަރާތަކުން ދެއްކެވި ވާހަކަތަކަށެވެ.
އިންތިޚާބުގެ ތައްޔާރީތައް ކޮމިޝަނުން ވަމުންދާއިރު މިއިންތިޚާބުގައި ވޯޓުލާ މީހުންގެ ފައިނަލް ލިސްޓު އާންމުކޮށް ރީ-ރަޖިސްޓްރީ ވުމަށް ވަނީ ހުޅުވާލާފައެވެ. އިލެކްޝަނުން ކަނޑައަޅާފައިވަނީ ރީ-ރަޖިސްޓްރީ ވުމަށް 5 ދުވަހުގެ މުއްދަތެއް ދިނުމަށެވެ. ކޮމަންޑޫ ދާއިރާގެ ބައި އިލެކްޝަންގައި ވޯޓުދިނުމުގެ ހައްގު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމަށް ހުޅުވާލުމުން މަރުވެފައިވާ 6 މީހެއްގެ ނަން އޮތްކަމުގެ ޝަކުވާ ލިބި، ލިސްޓުން އެނަންތަން މިހާރު ވަނީ އުނިކޮށްފައެވެ.
