އިރާނުން އެހީތެރިކަން ފޯރުކޮށްދޭ ހޫތިން ފާއިތުވެދިޔަ ހަފްތާގައި ޔުނައިޓެޑް އަރަބި އެމިރޭޓްސްއަށް ހަމަލާ ދީފައިވަނީ ކުރޫޒް މިސައިލުންނާއި ބެލެސްޓިކް މިސައިލްގެ ބޭނުން ކޮށްގެން ކަމުގައި ޔޫއޭއީން އެމެރިކާއަށް ކަޑައަޅާފައި ހުންނަވާ ސަފީރު ވިދާޅުވެއްޖެއެވެ. ފާއިތުވި ހަފްތާގެ ހޯމަދުވަހު ދިފައިވާ، ތިން މީހުން މަރުވެފައިވާ މިހަމަލާގައި ޑްރޯންވެސް ބޭނުން ކޮށްފައިވާ ކަމުގައި އޭނާ ވިދާޅުވެފައި ވެއެވެ.
"ޔޫއޭއީގެ އާންމުން ދިރިއުޅޭ ސަރަހައްދުތަކަށް ހަމަލާ ދީފައިވަނީ، ކުރޫޒް މިސައިލުންނާއި، ބެލިސްޓިކް މިސައިލުންނާއި އަދި ޑްރޯންގެ ބޭނުން ކޮށްގެން، ވަރަށް ގިނަ މިސައިލްތަކެއް ވަނީ ވައްޓާލެވިފަ، ނަސީބު ދެރަކަމުން މަދު މިސައިލްތަކެއް އަމާޒަށް ވާސިލްވީ، އަދި ތިން މީހެއްގެ ފުރާނަވަނީ ގެއްލިފައި،" ޖެވިޝް އިންސްޓިޓިއުޓް ފޯރ ނޭޝަނަލް ސެލިއުރިޓީ އޮފް އެމެރިކާއިން ބޭއްވި ޕެނަލްއެއްގައި ވާހަކަ ދައްކަވަމުން އެމްބެސެޑަރ ޔޫސުފް އަލް އޮޓައިބާ ވިދާޅުވެފައި ވެއެވެ.
މިއީ، ތިން ޕެޓްރޯލިއަމް ޓޭކްކަރެއްގައި އަލިފާން ރޯވެ އަދި އެ ޓޭކަރތައް ގޮވާ، އަދި އޭގެ އިތުރުން އަބޫ ދާބީގެ އިންޓަރނޭޝަނަލް އެއަރޕޯޓުގައި އަލަށް އިމާރާތް ކުރަމުންދާ ސައިޓުގައި އަލިފާން ރޯވާން މެދުވެރިވި މި ހަމަލާގައި ހޫތީ ހަގުރާމަވެރިން މިސައިލް ބޭނުން ކޮށްފައިވާކަން ޔުއޭއީގެ ސަރުކާރުގެ އިސް އޮފިޝަލަކު ހާމަ ކުރެއްވި ފުރަތަމަ ފަހަރެވެ.
މިހަމަލާގައި 3 މީހުން މަރުވުމުގެ އިތުރުން، 6 މީހަކު ޒަޚަމްވެފައި ވެއެވެ.
ޔަމަނުގައި ވަކިވެގަތުމަށް ހަގުރާމަ ކުރަމުންދާ ހޫތީ ހަގުރާމަވެރިން ވަނީ މިހަމަލާގެ ޒިންމާ ނަގާފައެވެ. ހޫތީ ހަނގުރާމަވެރިންގެ ތަރުޖަމާން ވިދާޅުވެފައިވަނީ، އެ ގުރޫޕުުން ޔޫއޭއީގެ އެތެރޭގައި އަސްކަރީ އޮޕަރޭޝަނެއް ހިންގާފައި ވާކަމަށާއި، މި އޮޕަރޭޝަންގައި 5 ބެލެސްޓިކް މިސައިލްއާއި ގޮވާތަކެތިން ބަރާ ކޮށްފައިހުރި ޑްރޯންތަކުން ހަމަލާ ދީފައިވާކަމަށެވެ.
އެމްބެސެޑަރ އޮޓައިބާ ވިދާޅުވެފެފައިވަނީ ހޫތީންނަކީ ޓަރަރިސްޓް ޖަމާއަތެއް ކަމަށާއި، އާންމު ރައްޔިތުންނަށް އަމާޒުކޮށް ހަމަލާ ދިނުމަކީ ހަގުރާމައެއް ނޫން ކަމުގައެވެ.
ޔޫއޭއީން 2009ވަނަ އަހަރު އެގައުމުގެ ސިފައިން ޔަމަނުން ބާލާފައިވި ނަމަވެސް، އެގައުމުން ތަމްރީންދީ އަދި އަސްކަރީ އެހީތެރިކަން ފޯރުކޮށްދީފައިވާ ޔަމަނުގެ އަސްކަރިއްޔާގައި އަދިވެސް ޔުއޭއީގެ ބޮޑު ނުފޫޒެއް އޮވެއެވެ.
ޑްރޯން ހަމަލާތަކަކީ ހޫތީން ސައުދީ އަރަބިއާއަށް ހަމަލާ ދިނުމުގައި ބޭނުން ކުރަމުންދާ އެންމެ ފާހަގަ ކޮށްލެވޭ އެއް ވަސީލަތެވެ. ޔަމަނުގައި ހިގަމުންދާ އަހުލީ ހަގުރާމާގައި، އެގައުމުގެ ސަރުކާރަށް އެހީތެރިކަން ފޯރުކޮށް ދިނުމަށް ސައުދީ އަރަބިއާ އިސްވެ އުފައްދާފައިވާ ކޯލިޝަނަށް ޔޫއޭއީންވެސް ދަނީ އެހީތެރިކަން ފޯރު ކޮށްދެމުންނެވެ.
ޔަމަނުގައި ހިގަމުންދާ އަހުލީ ހަގުރާމައިގެ ސަބަބުން އެގައުމުގެ އެތައް މިލިއަން ރައްޔުތުން ވަނީ އަމިއްލަ ގެދޮރު ދޫކޮށް ހިޖުރަ ކޮށްފައެވެ. އަދި އިތުރު އެތައް މިލިިޔަން މީހުންނަށް ވަނީ ބަނޑުހައި ހޫނުކަމާއި ކުރިމަޔިލާން ޖެހިފައެވެ. ޔޫއޭއީން ބުނެފައިވަނީ ޔަމަނަށް މިހާރު ކުރިމަތިވެފައިވަނީ ދުނިޔޭގައި މިހާރު ކުރިމަތިވެފައިވާ އެންމެ ބޮޑު އިންސާނީ ކާރިސާ ކަމުގައެވެ.
