ލާމަރުކަޒީ އުސޫލުން އިދާރީ ދާއިރާތައް ހިންގުމަށް ޤާނޫނުން މާލެ ސިޓީ ކައުންސިލަށް ކަނޑައަޅާފައިވާ އިޚުތިސާސްގައި ހިމެނޭ ކަންކަމުގައިވެސް ޖެހެނީ ސަރުކާރުގައި އާދޭސް ކުރަން ކަމުގައި މާލެ ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒު ވިދާޅުވެއްޖެއެވެ.
މާލެ ސިޓީ ކައުންސިލުން މިއަދު ބޭއްވި ކައުންސިލް ބައްދަލުވުމުގައި މޭޔަރު ވަނީ ސަރުކާރުން ކައުންސިލަށް އެއްބާރުލުން ނުދީ ކުރަމުންދާ ޖެއްސުން ހުއްޓާލުމަށް ދަންނަވާފައެވެ. އަދި ކައުންސިލުން ކުރާ ކޮންމެ މަސައްކަތަކީ މާލެ ސިޓީގެ ރައްޔިތުންނަށާއި، މާލޭގައި ދިރިއުޅެމުންދާ ހުރިހާ ރައްޔިތުންނަށް ލުއިފަސޭހަކަން ހޯދުމަށް ކުރަމުންދާ މަސައްކަތްތަކެއް ކަމަށް ވިދާޅުވެފައެވެ.
މާލޭގައި ހުރި ބިންތަކުން ރައްޔިތުންނަށް މަންފާވާނޭ ގޮތްތައް ފަހި ކުރުމަށް މަސައްކަތް ކުރި ނަމަވެސް އަދި ހުޅުމާލޭގައި ހުރި ބިންތަކުން މަންފާވާނޭ ގޮތެއް ފަހި ކުރުމަށް މަސައްކަތް ކުރިނަމަވެސް ސަރުކާރާއި، އެޗްޑީސީން ކުރަމުންދަނީ ޖެެއްސުންކަމަށް މުއިއްޒު ވިދާޅުވިއެވެ.
ހުޅުމާލެ ފޭސް 2 ގައި ސިޓީކައުންސިލްގެ ޚިދުމަތް ދެވޭނެ ބިމެއް ހަމަޖައްސައި ދިނުމަށް އެޗްޑީސީ އަދި ރައީސް އޮފީހުގައި އެދުމުންވެސް އަޅައެއްނުލި.
– މޭޔަރ މުޢިއްޒު ވިދާޅުވިއެވެ.
މުއިއްޒު ވިދާޅުވީ ސަރުކާރާއި، ސަރުކާރުގެ އިދާރާކުން ޖެއްސުން މިކުރަނީ ހަގީގަތުގައި މާލެ ސިޓީ ކައުންސިލަށް ނޫންކަމަށެވެ. މި ޖެއްސުން ކުރެވެނީ މާލެ ރައްޔިތުންނާއި، މާލޭގައި ދިރިއުޅޭ އެތައްހާސް ރައްޔިތުންނަށް ކަމަށެވެ. ސަރުކާރުން ޖެއްސުން ކުރިނަމަވެސް މާލޭގެ ރައްޔިތުންނަށް ބޭނުންވާ ކަންކަން ކޮށްދިނުމަށް ލިބެންއޮތް ޖާގަތަކުގެ ބޭނުން ހިފައި ކުރެވެން ހުރިހާ ކަމެއް ކޮށްދެއްވަމުންދާނެކަމަށް މުއިއްޒު ވިދާޅުވިއެވެ.
މުއިއްޒުވަނީ މާލޭގެ މާލެ ސިޓީ ކައުން ސިލަށް އާންމުދަނީ ލިބެން ހުރި ނޯރތު ހާބަރާ ޓީޖެޓީ ނުދޭން ނިންމާ ރައީސް އޮފީހުން ސިޓީ ފޮނުވުމުން އެކަމަށްވެސް ފާޑުވިދާޅުވެފައެވެ. މިފަދަ ކޮންމެ ކަމަކީ ރައްޔިތުންނާއި ގުޅުންހުރި ކަންކަމަށްވާއިރު މިފަދަ ކަންކަން ހުއްޓުވުމަކީ ރައްޔިތުންގެ ކުރިއެރުމަށް ސަރުކާރުން އަޅާ ހުރަހެއްކަމަށް މުއިއްޒު ވިދާޅުވިއެވެ. އަދި މުސްތަޤުބަލުގައިވެސް އުންމީދު ކުރައްވަނީ، ސަރުކާރުން ކައުންސިލަށް އެއްބާރުލުންދީ ޤާނުނުގައި ބުނެފައިވާ ގޮތަށް ކައުންސިލަށް ބާރުވެރިކަން ދޭނެކަމަށެވެ.
