ޔަމަނުގައި ވަކިވެގަތުމަށް ހަގުރާމަ ކުރަމުންދާ ހޫތީ ހަގުރާމަވެރިންގެ ޑްރޯން ހަމަލާއެއް ކަމަށް ޝައްކު ކުރެވޭ ހަމަލާއެއް ޔޫއޭއީގެ އަބުދާބީގެ މުހިންމު ތެޔޮ ކާރުޚާނާއަކަށް އަމާޒުކޮށް، މި ހަމަލާގައި 3 މީހަކު މަރުވެއްޖެ ކަމަށް ޔޫއޭއީގެ ފުލުހުން މައުލޫމާތު ދީފިއެވެ. އަދި ފުލުހުން މައުލުމާތު ދީފައިވާ ގޮތުގައި އަބޫ ދާބި އިންޓަރނޭޝަނަލް އެއަރޕޯޓުގައި ވަނީ ބަޑިގެ ހަމަލާތައްވެސް ދީފައެވެ.

ޔުނައިޓެޑް އަރަބި އެމިރޭޓްސްގެ ފުލުހުން ހާމަ ކޮށްފައިވާ ގޮތުގައި މި ޑްރޯން ހަމަލާގައި މަރުވެފައިވަނީ މި ތެޔޮ ކާރުޚާނާގައި މަސައްކަތް ކުރަމުންދިޔަ އިންޑިއާގެ ދެމީހަކާއި ޕާކިސްތާން މީހެކެވެ.

އަބޫ ދާބީގެ އިންޑަސްޓްރިއަލް އޭރިއާގައި ހުންނަ ތިން ޕެޓްރޮލް ޓޭންކެއް ގޮވާފައިވާއިރު، މި ސަރަހައްދުން ވަނީ، ޑްރޯންގެ ބައިތައް ފެނިފައެވެ. އަދި ހަމަ އެވަގުތު އެއަރޕޯޓުގައި ބަޑީގެ ހަަމަލާތައް ދީފައިވާ ކަމަށްވެސް ފުލުހުން ހާމަކޮށްފައި ވެއެވެ. ހޫތީ ހަގުރާމަވެރިން މީގެ ކުރިންވަނީ، ޔޫއޭއީގައި އަސްރަކަރީ އޮޕަރޭޝަނެއް ކުރިޔަށް ގެންދާނެކަން އިއުލާން ކޮށްފައެވެ.

ޔޫއޭއީން 2009ވަނަ އަހަރު އެގައުމުގެ ސިފައިން ޔަމަނުން ބާލާފައިވި ނަމަވެސް، އެގައުމުން ތަމްރީންދީ އަދި އަސްކަރީ އެހީތެރިކަން ފޯރުކޮށްދީފައިވާ ޔަމަނުގެ އަސްކަރިއްޔާގައި އަދިވެސް ޔުއޭއީގެ ބޮޑު ނުފޫޒެއް އޮވެއެވެ.

ޑްރޯން ހަމަލާތަކަކީ ހޫތީން ސައުދީ އަރަބިއާއަށް ހަމަލާ ދިނުމުގައި ބޭނުން ކުރަމުންދާ އެންމެ ފާހަގަ ކޮށްލެވޭ އެއް ވަސީލަތެވެ. ޔަމަނުގައި ހިގަމުންދާ އަހުލީ ހަގުރާމާގައި، އެގައުމުގެ ސަރުކާރަށް އެހީތެރިން ފޯރުކޮށް ދިނުމަށް ސައުދީ އަރަބިއާ އިސްވެ އުފައްދާފައިވާ ކޯލިޝަނަށް ޔޫއޭއީންވެސް ދަނީ އެހީތެރިކަން ފޯރު ކޮށްދެމުންނެވެ.

ޔަމަނުގައި ހިގަމުންދާ އަހުލީ ހަގުރާމައިގެ ސަބަބުން އެގައުމުގެ އެތައް މިލިއަން ރައްޔުތުން ވަނީ އަމިއްލަ ގެދޮރު ދޫކޮށް ހިޖުރަ ކޮށްފައެވެ. އަދި އިތުރު އެތައް މިލިިޔަން މީހުންނަށް ވަނީ ބަނޑުހައި ހޫނުކަމާއި ކުރިމަޔިލާން ޖެހިފައެވެ. ޔޫއޭއީން ބުނެފައިވަނީ ޔަމަނަށް މިހާރު ކުރިމަތިވެފައިވަނީ ދުނިޔޭގައި މިހާރު ކުރިމަތިވެފައިވާ އެންމެ ބޮޑު އިންސާނީ ކާރިސާ ކަމުގައެވެ.