ކޮމަންޑޫ ދާއިރާގެ ބައި އިލެކްޝަންގެ ކެމްޕެއިނުން ފެނިގެންދަނީ އެމްޑީޕީގެ މެންބަރުން ހާސްވެ، ގޮތް ހުސްވެފައިވާ މިންވަރުކަމަށް ޕީއެންސީގެ ނާއިބު ރައީސް އަދި ހުޅުމާލެ ދާއިރާގެ ކައުންސިލް މެންބަރު އިބްރާހީމް ޝުޖާޢު ވިދާޅުވެއްޖެއެވެ. ޝުޖާޢު މިހެން ވިދާލުވީ، ކުރިއަށް އޮތް ބައި އިލެކްޝަންގައި ވާދަކުރާ އެމްޑީޕީގެ ކެނޑިޑޭޓަށް ތަޢީދުހޯދުމަށް ރޭ ކޮމަންޑޫގައި ބޭއްވި ޖަލްސާގައި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު ޙަސަން އަޙްމަދު (ޙަސަންޓޭ) ބޭއަދަބީކޮށް ވާހަކަ ދެއްކުމާއި ގުޅިގެންނެވެ.
ޝުޖާޢު ވިދާޅުވީ ޙަސަންޓޭގެ އެ ވާހަކަތަކުން ފެންނަނީ އެމްޑީޕީގެ މެމްބަރުން ހާސްވެ، ގޮތްހުސްވެފައިވާ މިންވަރު ދައްކުވައިދޭ މަންޒަރެއްކަމަށެވެ. އުންމީދެއްނެތް، ދާނެ މަންޒިލެއްނެތް އޮޑިއެއްގެ ފަޅުވެރިއެއްކަމަށް ޝުޖާޢު ސިފަކުރެއްވިއެވެ. އޭނާ ވިދާޅުވީ ރައީސް ޔާމިނަކީ ވެވަޑައިގަންނަވާ ވަޢުދު ފުއްދަވާ ލީޑަރެއްކަމަށާއި، އެކަމަށް ރ.އަތޮޅުގެ ރައްޔިތުން ހެކިވާނެކަމަށްވެސް ޝުޖަޢު ވިދާޅުވިއެވެ.
ކޮމަންޑޫ ދާއިރާގެ ބައި އިލެކްޝަންގައި އެމްޑީޕީގެ އިތުރުން ޕީޕީއެމްއާއި އެމްއެންޕީން ވާދަކުރެއެވެ. އެދާއިރާގައި ތިން ޕާޓީންވެސް އަންނަނީ ވާދަވެރި ކެމްޕެއިނެއް ކުރަމުންނެވެ. އަދި ފޯރިގަދަވެފައިވާއިރު، ސަރުކާރުން ކުއްލިއަކަށް ކޮމަންޑޫ ދާއިރާގައި ގިނަ މަޝްރޫޢުތަކެއް ހިންގާތީވެސް ވަނީ ފާޑުކިޔުން އަމާޒުވެފައެވެ. މިއީ އިންތިޚާބަށް ނުފޫޒް ފޮރުވުންކަމަށް އިދިކޮޅުން ސިފަކުރެއެވެ.
ކޮމަންޑޫ ދާއިރާގެ އިންތިޚާބާ ދިމާކޮށް ދައުލަތުގެ އިސް ބޭފުޅުންނާއި ވަޒީރުންނާއި ކުންފުނިތަކުގެ ވެރިން އަންނަނީ ކޮމަންޑޫގައި ހަރަކާތްތެރިވެ އެމްޑީޕީގެ ކެނޑިޑޭޓަށް ކެމްޕެއިންކުރަމުންނެވެ. ހަމަ އެހެންމެ އިދިކޮޅު ލީޑަރު ރައީސް ޔާމީންވެސް ވަނީ އެ ދާއިރާއަށް ކެމްޕެއިނަށް ދަތުރުފުޅެއް ކުރައްވާފައެވެ.
ކޮމަންޑޫ ދާއިރާގެ ބައި އިލެކްޝަން އޮންނާނީ އަންނަ މަހުގެ 5ވަނަ ދުވަހުއެވެ.
