ކޮމަންޑޫއާއި މަތިކޮމަންޑޫ ގުޅާލުމަށް ހިންގާ މަޝްރޫޢު ހުއްޓުވުމަށް ބަޔަކު މަސައްކަތްކުރައްވާކަމަށް އިކޮނޮމިކް މިނިސްޓަރ ފައްޔާޟް އިސްމާޢީލް ތުހުމަތުކުރައްވައިފިއެވެ.
ދެ ކޮމަންޑޫ ގުޅާލުމަށް ކޮމަންޑޫގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ފައްޔާޒް ވިދާޅުވީ، ދެކޮމަންޑޫ ގުޅާލުމަށް ސަރުކާރުން ހިންގާ މަޝްރޫޢު ހުއްޓުވުމަށް ބަޔަކު މަސައްކަތްކުރަނީ ސަރުކާރަށް ކަމެއް ނުކުރެވޭކަން ދެއްކުމަށްކަމަށެވެ. ފައްޔާޒް ވިދާޅުވީ، މިސަރުކާރުން ކޮމަނޑޫއަށާއި އެހެން ދާއިރާތަކަށް ވެފައިވާ ވަޢުދުތައް ފުއްދާނެކަމަށާއި، ސަރުކާރަށް ލިބިފައި އޮތް ވަގުތުގައި އެކަން ކުރައްވާނެކަމަށްވެސް ފައްޔާޒް ވިދާޅުވިއެވެ.
ކުރީގެ ސަރުކާރަށް ފާޑުވިދާޅުވެ ވާހަކަފުޅު ދައްކަވަމުން ފައްޔާޒް ވިދާޅުވީ، އެ ސަރުކާރުގެ ޚުދުމުހުތާރުކަން ރައްޔިތުންނަށް ފެނިފައިވާކަމަށެވެ. މިގޮތުން ޤާނޫނުތައް ބޭނުން ވަގުތަކު ބޭނުންގޮތަކަށް ބަދަލުކޮށް، އާރާ ބާރު އޮވެ ހުރިހާ މުއައްސަސާތަކަށް އަތް ބާނާފައިވާކަމަށް ފައްޔާޒް ތުހުމަތުކުރެއްވިއެވެ. ނަމަވެސް މިސަރުކާރުގެ މައްޗަށް ފާރަވެރިވާ އެތައް މުއައްސަސާއެއް އޮވެ މިސަރުކާރުން އެއްވެސް ނުފޫޒެއް ނުފޯރުވާކަމަށްވެސް ފައްޔާޒް ވިދާޅުވިއެވެ. މިގޮތުން މިހާރު ސަރުކާރަށް ފާޑުކިޔަމުން ކޮންމެ ވާހަކައެއްވެސް މީޑިއާއަށް މިހާރު ދެއްކޭނެކަމަށް ފައްޔާޒް ވިދާޅުވުއެވެ.
ކޮމަންޑޫއާއި މަތި ކޮމަންޑޫ ގުޅާލުމަށް ބޭއްވި ރަސްމިއްޔާތުގައި ފައްޔާޒް ވަނީ ކުރީގެ ސަރުކާރަށާއި އިދކޮޅު ފަރާތްތަކަށް ވަރަށް ބޮޑަށް ފާޑުވިދާޅުވެފައެވެ. ދެ ކޮމަންޑޫ ގުޅާލުމުގެ މަސައްކަތް ފަށްޓަވައިދެއްވީވެސް އިކޮނޮމިކް މިނިސްޓަރ ފައްޔާޒް އިސްމާޢީލްއެވެ.
އަންނަ މަހުގެ 5ގައި ކޮމަންޑޫ ދާއިރާގެ ބައި އިލެކްޝަން ބޭއްވުމަށް ނިންމާފައިވަނިކޮށް ސަރުކާރުން މި މަޝްރޫޢުތައް ކުއްލިއަކަށް ހިންގާތީ އިދިކޮޅުން އަންނަނީ ކަންބޮޑުވުން ފާޅުކުރަމުންނެވެ. މިއީ އިންތިޚާބަށް ނުފޫޒް ފޯރުވުންކަމަށް އެފަރާތްތަކުން ބުނެއެވެ. ނަމަވެސް ރައީސް އިބްރާހީމް މުޙައްމަދު ޞާލިޙް ވަނީ މިއީ އިންތިޚާބަށް ނުފުޒް ފޯރުވުންކަމަށް އިދކޮޅުން ބުނިނަމަވެސް މިއީ ބާރު ސްޕީޑުގައި ކޮންމެހެން ކުރަންޖެހޭ ކަމެއްކަމަށް ވިދާޅުވެފައެވެ.
