2012 ވަނަ އަހަރުގެ ފެބުރުއަރީ މަހުގެ 7 ވަނަ ދުވަހު އޭރުގެ ވެރިކަން ވައްޓާލިކަމުގެ ތުހުމަތު ސަލާމާތި ބާރުތަކަށް އޭރުގެ ރައީސަކަށް ހުންނެވި، ނަޝީދު ކުރައްވާއިރު މިއަދު ވެރިކަމުގެ ކޯލިޝަން ހައްދަވައިގެންތިބީ ކޮންބަޔަކާއި ކަމާއިމެދު ސުވާލު އުފެއްދެވުން މާ އައުލާކަން ބޮޑުކަމަށް އިދިކޮޅު ޕީއެންސީގެ ނައިބް ރައީސް އާދަމް ޝަރީފް އުމަރު ވިދާޅުވެއްޖެއެވެ.
ފެބްރުއަރީ 7، 2012 ގައި ހިނގިފަދަ ސަލާމަތީ ބާރުތަކުން ބަޔަކު ގައުމަށްވީ ގައްދާރުވުން ތަކުރާރުވިޔަ ނުދިނުމަށް ކުރަންޖެހޭ ކަންކަން ނުކުރާހާ ހިނދަކު އަނެއްކާވެސް ބަޣާވާތެއް ނުކުރާނެ ކަމަށް ދަންނަވަން ކެރިވަޑައިނުގަންނަވާ ކަމަށް ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވިދާޅުވުމާއި ގުޅިގެން އާދަމް ޝަރީފް ވިދާޅުވީ އެމްޑީޕީއާއި ރައީސް ނަޝީދުގެ އަބަދުވެސް އަމަޒަކީ ސަލާމަތީ ބާރުތަކާއިމެދު ސުވާލު އުފައްދައި އުމުއައްސަސާތަކުގެ އިތުބާރު ގެއްލުވާލުންކަމަށެވެ.
މިއަދު ސަލާމަތީ ބާރުތަކާއިމެދު އޮތް އިތުބާރު ގެއްލޭ ގޮތަށް 7 ފެބުރުއަރީއާއި ގުޅޭގޮތުން ސުވާލު އުފައްވާއިރު ތިމާމެން ވެރިކަމަށް އައުމަށް ހެއްދެވި ކޯލިޝަންގައި މިއަދު އިސްކޮށް ތިއްބެވީ ކޮން ބައެއްކަމާއިމެދު ސުވާލު އުފެއްދެވުން މާ އައުލާކަން ބޮޑުކަމަށް އާދަމް ޝަރީފް ވިދާޅުވިއެވެ.
Ufedhunee ihthiraamaai ithubaaruge massalaeh? Feb 7gai iskoh ulhunu meehunnaaeku coalition hedhdhevee keevve? Dhenves salaamathee khidhumaiythah badhunaam kurevvumavvure edhe muassasaa ah ihthiraamukoh ithubaaru qaaimu kurevvun budhdhiveri @MohamedNasheedhttps://t.co/R5gFsBgpvO
— Adam Shareef Umar (@Adamshareefz) November 5, 2020
ދެހާސް ބާރަވަނަ އަހަރު ނަޝީދުގެ ވެރިކަން ބަދަލުވީ އެމަނިކުފާނު އަމިއްލަފުޅަށް އިސްތިއުފާ ދެއްވުމުން ނަމަވެސް ސިފައިންނާއި ފުލުހުންގެ ތެރެއިން ބަޔަކު ވަނީ ނަޝީދާ ދެކޮޅަށް ނިކުމެފައެވެ. އަދި ޖެހިގެން އައި ދުވަހު ރައީސް ނަޝީދު ވަނީ އެމަނިކުފާނުގެ ވެރިކަން ބަދަލުކޮށްލީ ބަޣާވާތަކުން ކަމަށް ވިދާޅުވެފައެވެ. އެކަން ރައީސް ވަހީދުގެ ސަރުކާރުގައި ތަހުގީގު ކުރިއެވެ. ބޭރުގެ މާހިރަކާއެކު ކުރިއަށް ގެންދިޔަ މިނިވަން ތަހުގީގުގައި ވެރިކަން ބަދަލުވީ ބަޣާވާތަކުން ނޫން ކަމަަށް ވަނީ ކަނޑައަޅާފައެވެ. ނަމަވެސް އެ ދުވަހު ހިނގާދިޔަ ކަންކަން ތަކުރާރު ވިޔަ ނުދިނުމަށް ފިޔަވަޅުތަކެއް އެޅުމަށް ރިޔާސީ ކޮމިޝަންގެ ރިޕޯޓްގައި ހިމަނާފައިވެއެވެ.
ކޯނީގެ ރިޕޯޓުގައި ވެސް ބުނެފައި ވަނީ ފެބްރުއަރީ 6، 7 އަދި 8 ވަނަ ދުވަހު ފުލުހުން އަނިޔާވެރިވެފައިވާ ކަމަށާއި ބަލައި ތަހުގީގުކޮށް ކުށްކުރި މީހުން އިންސާފުގެ ކުރިމައްޗަށް ގެންނަން ޖެހޭ ކަމަށެވެ. އެއީ ބައެއް ސިފައިންނާއި ބައެއް ފުލުހުންގެ ފަރާތުން އެ ދެ ތަނުގެ މަރުކަޒުތަކަށް ވެސް ގެއްލުން ލިބުނު ދުވަހެކެވެ. ނަމަވެސް މިހާތަނަށް އެކަންކަން ރަނގަޅު ތަހުގީގުކޮށް ފިޔަވަޅުތައް އަޅާފައެއް ނުވެ އެވެ.
މިމައްސަލާގައި ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ، ފުލުހުންނަކީ މިހާރު ޣައިރު ޤާނޫނި އަމުރުތަކަށް ކިޔަމަންވާނެ ބައެއް ނޫންކަމަށާއި، ޣައިރު ޤާނޫނީ އަމުރުތަކަށް ބޯލެނބުން އެއީ މާޒީކަމަށެވެ. އެމާޒީން ގިނަ ފިލާވަޅުތަކެއް މިހާރު ފުލުހުންނަށް ލިބިފައިވާކަމަށާއި، މިހާރު ފުލުހުންގެ މުއައްސަސާގައި ތިބި ފުލުހުންނާއި، ކުރިއަށް އޮތްތަނުގައި ފުލުހުންގެ މުއައްސަސާއާއި ގުޅޭނެ ފުލުހުންވެސް އެއްވެސް ސަރުކާރެއް ވައްޓާލަން ދެން ނުނިކުންނާނެކަމަށް ސީޕީ ޙަމީދު ވިދާޅުވިއެވެ. ފުލުހުންގެ މުއައްސަސާ މިހާރު އެތައް ގޮތަކުން ހަރުދަނާކޮށްފައިވާކަމަށާއި، އެފިޔަވަޅުތަކުގެ ސަބަބުން އެޔަޤީންކަން މިހާރު އޮތްކަމަށް ހަމީދު ފާހަގަކުރެއްވިއެވެ.
