ޗައިނާއިން ކުރިޔަށް ގެންދާ އެގައުމުގެ ޑިޕްލޮމަސީގެ އެންމެ މުހިންމު އެއް އަމާޒުކަމުގައިވާ ސިލްކު ރޯޑުގެ މަޝްވަރާތައް ކުރިޔަށް ގެންދިއުމަށްޓަކާ ޗައިނާގެ ފޮރިންގ މިނިސްޓަރ ވަންގ ޔީ އާދީއްތަ ދުވަހު ސްރީ ލަންކާއަށް ވަޑައިގެންފިއެވެ. ވަންގ ޔީ ސްރީ ލަންކާއަށް ވަޑައިގެންފައި މިވަނީ، އޭނާ ދިވެހިރާއްޖެއަށް ކުރެވި ރަސްމީ ދަތުރުފުޅު ނިންމަވާ ލެއްވުމަށްފަހުއެވެ.
ޗައިނާގެ ފޮރިންގ މިނިސްޓަރުގެ މި ދަތުރުފުޅުގައި، ސްރީ ލަންކާއަށް ކުރިމަތިވެގެން ގޮސްފައިވާ، ޗައިނާގެ ދަރަނީގެ މައްސަލައަށް އަލި މަގެއްފެނޭތޯ މަސައްކަތް ކުރުމަކީ ސްރީ ލަންކާގެ އެންމެ މުހިންމު އެއް އަމާޒު ކަމުގައިވެސް އެގައުމުގެ މީޑިއާތަކުން ވަނީ ރިޕޯޓު ކޮށްފިއެވެ.
ވަންގގެ މި ދަތުރުފުޅުގައި ސްރީ ލަންކާއަށް ވަޑައިގެންފައި މިވަނީ، އޭނާ ގިނަ ގައުމުތަކަށް ކުރެއްވި މި ދަތުރު ފުޅުގެ އެންމެ މަންޒިލެއްގެ ގޮތުގައެވެ. މި ދަތުރުފުޅުގައި އޭނާވަނީ، ދިވެހިރާއްޖެއާއި ސްރީ ލަންކާގެ އިތުރުން، އެފްރިކާ ބައްރުގެ ބައެއް ގައުމުތައް ކަމުގައިވާ އެރިޓްރިއާ، ކެންޔާ އަދި ކޮމޯރޯސްއަށްވެސް ވަޑައިގެންފައެވެ.
ސްރީލަންކާއަށް ވަންގ ކުރައްވަމުން ގެންދަވާ މި ދަތުރުފުޅުގައި އެގައުމުގެ ރައީސް ގޮޓަބަޔަ ރާޖަޕަކްސައާއި ބޮޑުވަޒީރު މަހިންދަ ރާޖަޕަކްސަ އާއިވެސް ބައްދަލު ކުރައްވާ ގޮތަށްވަނީ ހަމަޖެހިފައެވެ. އަދި އެއަށްފަހު، ބޮޑުވަޒީރު މަހިންދަ ރާޖަޕަކްސައާއި އެކު، ސްރީ ލަންކާގައި ޗައިނާއިން އިންވެސްޓު ކޮށްގެން ހިއްކާ އަދި ތަރައްގީ ކޮށްފައިވާ ކޮލޮމްބޯ ޕޯޓު ސިޓީގައި ދެބޭފުޅުން ވާހަކަތައް ބޭއްވުމަށްވެސް ވަނީ ހަމަޖެހިފައެވެ.
ޗައިނާގެ ފޮރިންގ މިނިސްޓަރ ސްރީ ލަންކާއަށް ވަޑައިގެންފައި މިވަނީ، ސްރީ ލަންކާގެ ތާރީޚުގައި ކުރިމަތިވެފައިވާ އިގްތިސާދީ އެންމެ ބޮޑތި މައްސަލަތައް އެގައުމަށް ކުރިމަތި ވެފައިވާ ދަނޑިވަޅެއްގައެވެ.
ސްރީލަންކާގެ ފޮރިންގ ރިޒާވް މިވާރުވަނީ، 1.6 ބިލިއަން އެމެރިކާ ޑޮލަރަށް ދަށްވެފައެވެ. މިއީ އެގައުމުގެ ރައްޔިތުންނަށް މަދު ހަފްތާތަކަށް ބޭނުންވާ ކާބޯތަކެއްޗަށް ފުދޭވަރު ރިޒާވްއެކެވެ. އަދި 2022 ވަނަ އަަހަރު ސްރީ ލަންކާއިން ދައްކަންޖެހިފައިވާ ދަރަނި ވަނީ 7 ބިލިއަން އެމެރިކާ ޑޮލަރަށް އަރާފައި ވެއެވެ. މީގެ ތެރޭގައި މި ހިނގާ ޖެނުއަރީމަހު ބޮންޑުތަކަށް ދައްކަން ޖެހޭ 500 މިލިއަން އެމެރިކާ ޑޮލަރުގެ އިތުރުން އަންނަ ޖުލައި މަހުގެ ނިޔަަލަށް ދައްކަން ޖެހިފައިވާ 1 ބިލިއަން އެމެރިކާ ޑޮލަރުވެސް ހިމެނެއެވެ.
ސްރީ ލަންކާގެ ފޮރިންގ ރިޒާވް ދައްވަމުންދާ މައިގަޑު ސަބަބަކަށް ވެގެން ގޮސްފައިވަނީ، ޗައިނާއިން ލޯނު ނަގައިގެން އެގައުމުގައި ގާއިން ކޮށްފައިވާ، އާމްދަނީ އުފައްދާ ނުދޭ އިންފްރާ ސްޓްރަކްޗަރ ތަކެވެ. ޗައިނާއިން ބޮޑެތި ލޯނުތައް ނަގައިގެން ސްރީ ލަންކާއިން ތަރައްގީ ކޮށްފައިވަނީ، އެގައުމުގެ ދެކުނުގެ ހަމްބަންޓޯޓާގެ ސީ ޕޯޓާއި އަދި އެއަރ ޕޯޓުގެ އިތުރުން ރޯޑް ނެޓްވާރކެވެ.
ސްރީ ލަންކާގެ ސެންޓްރަލް ބޭންކުން އާންމު ކޮށްފައިވާ ހިސާބުތަކަށް ބަލާއިރު، އެގައުމުން ޗައިނާއަށް ދައްކަން ޖެހިފައިވާ ލޯންތަކުގެ އަދަދު 3.38 ބިލިއަން އެމެރިކާ ޑޮލަރަށް އަރައެވެ. މިއީ އަދި ޗައިނާގެ ސަރުކާރުގެ ކުންފުނިތަކަށް ދައްކަން ޖެހިފައިވާ ލޯންތަކުގެ އަދަދު ނުހިމަނާ ދައްކަންޖެހޭ އަދަދެވެ.
