އެއްވެސް ޝަޚުޝަކީ ޤާނޫނަށްވުރެއް މަތީގައި ހުރެވޭ މީހަކަށް ވެގެން ނުވާނެ ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ޝައިޚު ޒައިދު މިފަދައިން ވިދާޅުވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ގުޅޭގޮތުން ރައްޔިތުންގެ އިއްތިހާދުން ހުށަހެޅި މައްސަލަ ނުބަލަން ފުލުހުންގެ އިދާރާއިން ނިންމި ނިންމުމަށް އިޝާރާތް ކުރައްވައެވެ. ޒައިދު ވިދާޅުވީ ކޮންމެ މީހެއްގެވެސް މައްސަލައެއް ކަމާއިބެހޭ އިދާރާއަކަށް ހުށަހެޅުމުން އެއްވެސް ތަފާތު ކުރުމެއްނެތި އެކަމެއް ބެލެންޖެހޭނެކަމަށެވެ.
ޤާނޫނުގެ ކުރިމަތީގައި އެންމެންނަކީ ހަމަހަމަ ބަޔަކަށްވާއިރު، ވަކި މީހެއްގެ މައްސަ ހުށަހެޅޭ ހިސާބުން މައްސަލަތައް ނުބަލައި ޖަވާބުދާރީ ކުރެވޭނެ ގޮތެއް ނެތުމަކީ ކަންބޮޑުވާންޖެހޭ ކަމެއްކަމަށެވެ. ވަކި މީހަކަށް ވުމުން ޤާނޫނު ހިނގާފައި ވަކި މީހަކަށްވުމުން ޤާނޫނު ނުހިނގުމަކީ ހަމަޖެހޭ ކަމެއް ނޫންކަމަށާއި، އިންސާފަކީ އެންމެންނަށް ހަމަހަމަ އުސޫލަކުން ލިބެންޖެހޭ އެއްޗެއްކަމަށް ޝައިޚު ޒައިދު ވިދާޅުވިއެވެ.
އެއްވެސް ޝަޚުޝަކީ ޤާނޫނަށްވުރެއް މަތީގައި ހުރެވޭ މީހަކަށް ވެގެން ނުވާނެ! ޤާނޫނީ ހަމަތަކުގެ މަތިން ދައުލަތުގެ އޮނިގަނޑުގެ ތެރެއިން މައްސަލަ ހުށައަޅާއެއަށް ޖަވާބުދާރީ ކުރެއްވުމާއި، އަދަބު ދިނުމަކީ ވަކި މީހަކާއި ޖެހުނީމާ ނުކޮށް ދޫކޮށްލަންޖެހޭ ކަމެއްތޯ! ކޮބައިތޯ ހަމަހަމަ ކަމާއި އިންސާފް.
– އަލީ ޒައިދު ވިދާޅުވިއެވެ.
ފުލުހުންގެ މީޑިއާ އޮފިޝަލް ވިދާޅުވެފައިވަނީ ޖަމިއްޔަތުލް އިއްތިހާދުގެ ނަމުގައި ދިވެހި ފުލުހުންގެ ހިދުމަތަށް ހުށަހަަޅާފައިވާ ސިޓީގައި ބަޔާންކޮށްފައިވާ ކަންތައްތައް ބެލިބެލުމުން ޖިނާއީ ތަހުގީގެއް ހިންގަން ޖެހޭފަދަކަމެއް ފާހަގަކުރެވިފައި ނުވާ ކަމަށެވެ. އެހެންކަމުން އެސިޓީގައި ބަޔާންކޮށްފައިވާ ކަންކަމާ ގުޅިގެން ތަހުގީގެއް ކުރިއަށް ނުގެންދާ ކަމަށް އޮފިޝަލް ވިދާޅުވިއެވެ. އެ މައްސަލަ ހުށަހަޅާފައި ވަނީ ރަޖިސްޓްރީކޮށްގެން ހިންގާ ޖަމްއިއްޔާއަކުން ކަމުގައިނުވާތީ، އެ މައްސަލައާ މެދު ނިންމިގޮތް އެފަރާތަށް އަންގާފައިނުވާނެ ކަމަށް ވެސް އޮފިޝަލް ވިދާޅުވިއެވެ.
ރައްޔިތުންގެ އިއްތިހާދުން ފުލުހުންނަށް ހުށަހެޅީ 2020 ވަނަ އަހަރު ރައީސް ނަޝީދު ކްރިސްމަސްގެ ތަހުނިޔާ ފާޅުގައި ދިވެހީންނަށް ފޮނުވާފައިވާ މައްސަލައެވެ. އަދި މިދިޔަ އަހަރު ވެސް އަނެއްކާ ކްރިސްމަސްގެ ތަހުނިޔާ ކިޔުން ތަކުރާރުކޮށް ފޮޓޯ އާންމުކޮށްފައިވާ ކަމަށް އެ މައްސަލާގައިވެއެވެ.
One Response
އަދިވެސް ޝައިޚަކަށް ނޭނގޭތަ ގާނޫނުން އިސްތިސްނާ މީހުން މިގައުމުގައި ތިބިކަން. ފޮތުގައި އޮންނާނީ ލިޔެފަ. ޝައިޚު މެންނަށް ޖެހޭނީ ތިހެން ވާހަކަ ދައްކަ ދައްކާ ތިބެން. ލާދީނިއްޔަތު ދާނީ ކުރިޔަށް ބާރަށް.