ރައީސުލްޖުމްހޫރިއްޔާގެ އޮފީހުގެ ސްޕޯކްސްޕަރސަން މުހައްމަދު މަބްރޫކް އަޒީޒު ކައިވެރި ބައްލަވައިގެންފިއެވެ.

މައުލޫމާތު ލިބިފައިވާގޮތުގައި އޭނާ ކައިވެނި ބައްލަވައިގަތީ ތައިލެންޑަށް ނިސްބަތްވާ ކަނބަލަކާއެވެ. މިވަގުތު މަބްރޫކް ހުންނެވީ ޗުއްޓީގައި ރާއްޖެއިން ބޭރުގައެވެ.

ޢާއްމުންގެ ތެރޭގައި މަބްރޫކް މަޤުބޫލުވެގެން ދިޔައީ ކޯވިޑް-19އާ ދެކޮޅަށް މަސައްކަތްކުރުމަށް ސަރުކާރުން އުފެއްދެވި ނެޝަނަލް އިމަރޖެންސީ އޮޕަރޭޝަން ސެންޓަރުގެ ތަރުޖަމާނަކަށް އޭނާ ހަމަޖެއްސެވުމާއެކުއެވެ. އެންއީއޯސީން މަސައްކަތް ކުރި މުއްދަތުގައި މަބްރޫކް ވަނީ ދިވެހި ރައްޔިތުންގެ ހިތުން ޚާއްސަ މަޤާމެއް ހޯއްދަވާފައެވެ. އޭރު އެންއީއޯސީއިން ކޮންމެ ރެޔަކު ބާއްވަމުންދިޔަ ނޫސްވެރިންގެ ބައްދަލުވުމަށް އެތައް ބަޔަކު ވަގުތު ހުސްކޮށް އިންތިޒާރުކުރަމުންއައީ މަބްރޫކްގެ ސަބަބުންނެވެ.

ނެޝަނަލް އެމަޖެންސީ އޮޕަރޭޝަން ސެންޓަރުން ބޭއްވި 160 ނޫސްވެރިންގެ ބައްދަލުވުމުގެ ތެރެއިން 111 ބައްދަލުވުމުގައި މަބްރޫކް ބައިވެރިވެވަޑައިގެން އެނޫސްވެރިންގެ ބައްދަލުވުންތައް މޮޑަރޭޓްކުރައްވައި، ނޫސްވެރިންގެ ސުވާލުތަކަށް ޖަވާބުދެއްވާފައިވެއެވެ. މި ނޫސްވެރިންގެ ބައްދަލުވުންތަކުގައި ޖުމުލަ 1200އަށްވުރެ ގިނަ ސުވާލަށް ޖަބާވުދީފައިވެއެވެ. އަދި ނޫސްވެރިންގެ ބައްދަލުވުންތައް ނިމުމުން ވަކިން ޖުމުލަ 681 ސުވާލަށް ޖަވާބުދީފައިވެއެވެ.

ރައީސް އޮފީހުގެ އަންޑަ ސެކެޓްރީގެ މަގާމުގައި ހުންނެވި މަބްރޫކަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހްގެ ތަރުޖަމާނުކަން ދެއްވީ 2021 ވަނަ އަހަރުގެ ޖަނަވަރީ މަހުގެ 01 ވަނަ ދުވަހުއެވެ.