ބެލްޖިއަމްއިން އެގައުމުގައި މިހާރު ހުރި 7 ނިއުކުލިއަރ ރިއެކްޓަރ 2025ގެ ނިޔަލަށް ބަންދު ކުރުމަށް ނިންމައިފިއެވެ.
ބެލްޖިއަމްގެ ކޯލިޝަން ސަރުކާރުން ފާއިތުވެދިޔަ ހަފްތާގެ ބުރާސްފަތި ދުވަހު ބޭއްވި މަޝްވަރާތަކަށްފަހު ނިންމާފައިވަނީ، އެގައުމުގެ ނިއުކުލިއަރ ރިއެކްޓަރުތައް ބަންދު ކުރުމަށް ނިންމި ނަމަވެސް، ނިއުކުލިއަރ އާ ޓެކްނޮލޮޖީތަކަށް ހުޅުވިފައިވާ ދޮރުތައް ބަންދު ނުކުރުމަށެވެ.
ބެލްޖިއަމްގެ ސަރުކާރުގެ އިސް އޮފިޝަލުން އޭއެފްޕީއަށް މައުލުމާތު ދީފައިވާ ގޮތުގައި ގިނަ އިރުތަކެއް ވަންދެން ކޯލިޝަން ސަރުކާރުން ކުރިޔަށް ގެންދިޔަ މަޝްވަރާތަކުން ވަނީ، އެގައުމުން ކުދި މޮޑިއުލާ ރިއެކްޓަރުތައް ގާއިމް ކުރުމަށް 113 މިލިއަން އެމެރިކާ ޑޮލަރު އިންވެސްޓު ކުރުމަށް އެއްބަސްވެފައެވެ.
މީގެ އިތުރުން މި މަޝްވަރާތަކުން އެއްބަސްވެފައިވާ ކަންކަމުގެ ތަފްސީލުތައް ހާމަކުރުމަށް، ބޮޑުވަޒީރުގެ ގެކޮޅުގައި ކޯލިޝަން ސަރުކާރުން ނޫސް ކޮންފަރެންސެއް ބޭއްވުމަށް ވަނީ ހަމަޖެހިފައެވެ.
ބެލްޖިއަމްއިންވަނީ، 2003 ވަނަ އަހަރުން ފެށިގެން ނިއުލިއަރ ހަކަތަ ބޭނުންކުރާ މިންވަރު މަދުކުރަމުން އައިސް، ނިއުކުލިއަރ ހަކަތަ ބޭނުން ކުރުން އެކީހުއްޓާލުމަށް ގާނޫނު ފާސް ކޮށްފައެވެ.
2025 ވަނަ އަހަރުގެ އަމާޒަކީ، އެގައުމުގެ މިހާރުގެ ސަރުކާރު 2020ވަނަ އަހަރުގެ އޮކްޓޯބަރުހަމު ވެރިކަމާ ހަވާލުވިއިރު ވެފައިވާ ރިޔާސީ ވައުދެކެވެ.
އެހެންނަމަވެސް މި މައްސަލައަކީ، މިހާރު ވެރިކަން ކުރަމުންދާ، ގްރީން ޕާޓީއާއި، ސޯޝަލިސްޓުންނާއި އަދި ބޮޑުވަޒީރު އެލެގްޒެންޑަރ ޑީ ކުރޫސްގެ ލިބަރަލުން ހިމެނޭ ކޯލިޝަނަށް މިހާތަނަށް އެއްގަލަކަށް އެރިފައިވާ މައްސަލައެއް ނޫނެވެ.
