ކަޒްމިކް އިންޓަނޭޝަނަލުން އުފައްދައި ގެނެސްދޭ ވެބް ސީރީޒް "ދަރަކަ"ގެ ޓީޒާ ޓްރެއިލަރ އާއްމުކޮށްފިއެވެ.
ޑައިރެކްޝަނަށް އަލަށް ނުކުތް އަޒްހާން އިބްރާހީމް ޑައިރެކްޓްކޮށްފައިވާ މި "ކްރައިމް ތްރިއްލާ" ވެބް ސީރީޒަކީ 08 އެޕިސޯޑްގެ ސީރީޒެކެވެ. މި ސީރީޒްގެ ވާހަކަ އަކީވެސް އަޒްހާންގެ ވާހަކައެކެވެ.
ސީރީޒްގެ ތަރިންގެ ތެރޭގައި، އިބްރާހީމް ޖިހާދު (ޖިމީ) އާއި "ބަވަތި" ގެ ބަތަލު އިފްނާޒް ފިރާގާއި "ތިން ބިބީ" އިން ވިދި ވާޝިޔާ މުހައްމަދު (ޝިޔާ) އާއި ނަތާޝާ ޖަލީލާއި، އަލީ އުސާމް (ދޮނާ) އާއި އައިޝަތު އަލީގެ އިތުރުން ބައިސްކޯފުން ގެނެސްދިން ވެބް ސީރީޒް "ގަމިނި"ގެ ރޯލެއް ކުޅުނު ސޫޒަން އިބްރާހިމް ހިމެނެއެވެ.
DHARAKA – Teaser Trailer
Coming soon to a streaming service ???? pic.twitter.com/ShkCJXUWYz— Kazmik (@KazmikInt) December 19, 2021
މުނިފޫހިފިލުވުމުގެ ދާއިރާއިން އާ ހުނަރުވެރިންނަށް ފުރުސަތު ދިނުމުގެ ގޮތުން އުފެއްދި ކަޒްމިކް އިންޓަނޭޝަނަލުން މީގެ ކުރިން ވަނީ އައި ފިލްމްސްއާ ގުޅިގެން ”މަޒްލޫމް“ގެ ނަމުގައި އެންތޮލޮޖީ ސީރީޒެއްވެސް ގެނެސްދީ ބެލުންތެރިންގެ މަގުބޫލު ކަން ހޯދާފައެވެ.
މީގެއިތުރުން އެ ސްޓޫޑިއޯއިން ވަނީ މިހާރު އެމީހުންގެ ފުރަތަމަ ފީޗަރ ފިލްމް ވެސް އިއުލާން ކޮށްފައިއެވެ. ނަމަވެސް ފިލްމާއި ބެހޭގޮތުން މާގިނަ މައުލޫމާތު ހިއްސާ ނުކުރިނަމަވެސް މި ފިލްމް އަކީ ބެލުންތެރިންގެ އިތުބާރު ހޯދައިފައިވާ ޑައިރެކްޓަރ އިލްޔާސް ވަހީދު (އިއްލެ) ޑައިރެކްޓްކުރާ "ޖޯޑެއްގެ ސާފު ލޯބި" އެވެ.
