އާންމުންގެ މެދުގައި ބޮޑު މަޝްހޫރު ކަމެއް ހޯދާފައިވާ ލަވަ ކިއުންތެރިޔާ ޝަލަބީ އިބްރާހިމްގެ އާ ކަވަރ ސޯންގް "އޯ ނަދާ" އެހުންތެރިންނަށް ދޫކޮށްލައިފިއެވެ.
މި ލަވަ ސައުންޑްކްލައުޑުން މިހާރު އަޑުއެހޭނެއެވެ.
ޝަލަބީ ވިދަލާއިގެން ދިއައީ މޯލްޑިވިއަން އައިޑޮލް ގެ ފުރަތަމަ ސީޒަންގެ ފައިނަލްގައި ހިމެނިގެންނެވެ. ގިނަ ބައެއްގެ މެދުގައި މަގުބޫލު ލަވަ ކިއުތެރިއާގެ މި ލަވައަކީ ފޭނުންގެ އެދުމަށް އޭނާ ކިޔައިދީފައިވާ ލަވައެކެވެ.
ސައުންޑްކްލައުޑް ގައި މި ލަވަ އަންނަނީ މަގުބޫލު ކަން ހޯދަމުންނެވެ. އެގޮތުން ވަރަށް ގިނަ ބަޔަކު މި ލަވަ އަޑުއަހާފައި ވާކަން މިދިއަ ދެތިން ދުވަސްގެ ތެރޭގައި އެނގެއެވެ. މިއަދާއި ހަމައަށް އެ ލަވަ ވަނީ ސައްބީސް ހާހަށްވުރެ ގިނަ މީހުން އަޑު އަހާފައިއެވެ.
"އޯ ނަދާ" ކޮމްޕޯސްކުރީ ހުސައިން ތައުފީގެވެ. މިއުޒިކް ހެދީ ޢަބްދު ﷲ ޒުފާން ޒާހިދެވެ. މިކްސްކޮށް މާސްޓަރ ހެދީ ވިންފާޒް އެވެ.
"އޯ ނަދާ"ގެ އޮރިޖިނަލް ލަވަ ކިޔައިފައި ވަނީ ކުރީގެ ލަވަ ކިއުންތެރިޔާ އުމަރު ޒާހިރެވެ. މިލަވައިގެ ވީޑިއޯ ލަވައެއް ވެސް ވަނީ ހަދާފައެވެ. އެލަވައިން ފެނިގެން ގޮސްފައިވަނީ މަޝްހޫރު ދެ ތަރިން ކަމުގައިވާ ޔޫސުފް ޝަފީއު (ޔޫއްޕެ) އާއި ފަރީލާއެވެ.
ދުނިޔޭގެ އެކި ކަންކޮޅުތަކުގައި މިހާރު ކަވަރ ސޯންގް އަންނަނީ މަގުބޫލު ވަމުންނެވެ. ބައެއް ފަހަރަށް އޮރިޖިނަލަށް ވުރެ ކަވަރ ސޯންގަށް ލިބޭ ތަރުހީބު ބޮޑެވެ.
